Vaovao Tsara Nisoratin’i Lioka
18 Jesosy baka tiô nan̈ano fan̈oharan̈a tamindrô, han̈aboahan̈a fa irô mila mivavaka fo aviô tsy mila rivan̈a foeky. 2 Ho izy: “Tamy tanàna araiky zay nisy mpitsara tsy navozo Zan̈ahary sady tsy nijery olo foeky. 3 Tamy tanàna io koa nisy man̈angy naty vady zay tsy vôly nandeha taminany tan̈y nivolan̈a: ‘Mba ataova kony raha hazahoako rariny amin’olo miady aminaka amy fitsaran̈a e!’ 4 Tsy nety foeky antsendriky mpitsara io tan̈atin’ny fotoan̈a elaela. Fa tafara tatỳ, ho izy tamy jerinany tan̈y:* ‘Zaho ndray tsy mavozo Zan̈ahary sady tsy mijery olo, 5 hamezako rariny fo man̈angy maty vady ty fôtony izy tsy vôly mideranzy zaho. Izikoa tsy zen̈y baka izy tsy ho vôly ho avy aminaka eto, ke handonja zaho amy fangatahan̈anany tsy mahay efa.’” 6 Tômpo nivolan̈a: “Tandrin̈esa raha volan̈in’ny mpitsara zen̈y; izy amy zen̈y olo tsy marin̈y! 7 Ke Zan̈ahary edy tsy han̈ano raha hazahoandrô olo nifidiny sady mitarain̈y aminany matsan̈a alin̈y aby io ny rariny, natà izy maharidraha amindrô? 8 Ambarako anarô fa, hataony raha hazahoandrô olo aby io ny rariny farany malaky. Ndray zen̈y, lera Zanak’olo ho avy, hahita finoan̈a karaha zen̈y ankitin̈y ma izy ambony tany eto?”
9 Ty koa fan̈oharan̈a nataony tamin’olo sasany nihevitry fa irô olo marin̈y sady nieritreritry fa tsisy dikany foeky olo hafa: 10 “Nisy lelahy aroe nandeha* nivavaka tamy tempoly: Araiky Fariseo, fa araiky ndraiky mpamory hetra. 11 Fariseo io nitsangana aviô izy nivavaka karaha ty tam-pônany tao: ‘A Zan̈ahary e, man̈ano mersy anao zaho fôtony zaho tsy karaha irô olo hafa jiaby mpandrava, mpan̈ano raha tsy marin̈y, mpandiadia vady, na koa karaha mpamory hetra io. 12 Zaho mifady hanin̈y* indroe isaka herin̈iandra, aviô zaho man̈amia ampahafolon’ny raha jiaby azoko.’ 13 Fa mpamory hetra in̈y ndraiky nitsangana lavidavitry. Izy tsy nasaky nisan̈andra lan̈itry, fa izy tsy vôly namango tratranany sady nivolan̈a: ‘A Zan̈ahary e, mamindrà fô aminaka fa zaho ty olo mpanota.’ 14 Zaho man̈ambara anarô fa lera lelahy zen̈y nody* tan-tran̈onany, izy marimarin̈y tozay Fariseo in̈y. Fôtony lan̈iany olo man̈ambony ten̈a halain̈a baràka, fa lan̈iany olo manetry ten̈a ndraiky hamezan̈a voninahitry.”
15 Nisy olo nitondra zanakandrô madiniky tamy Jesosy baka izy hikasiky irô. Fa irô mpianatra aby io koa fa nahita zen̈y, irô nisiahandrô. 16 Fa irô tsaiky hely aby io fo nikahian’i Jesosy taminany tiô, aviô ho izy: “Ambilànarô irô tsaiky hely aby io man̈aton̈o zaho, fa aza sakanan̈a, fôtony nin’olo karaha irô io Fanjakan̈an’ny Zan̈ahary. 17 Ambarako anarô marin̈y tsarabe fa, lan̈iany olo tsy man̈eky Fanjakan̈an’ny Zan̈ahary karaha ataon’ny tsaiky hely, izy tsy ho tafiditry ao foeky.”
18 Nisy mpitondra araiky tamy Jiosy nan̈ontany izy: “Mpampianatra Tsara, ino ma raha tsy maintsy ataoko baka zaho handova fiainan̈a tsisy farany?” 19 Ho Jesosy taminany: “Nan̈ino ma zaho kahianao tsara? Tsisy olo tsara izikoa tsy Zan̈ahary zaraiky fo. 20 Hainao didy aby ty: ‘Aza mandiadia vady, aza mamono olo, aza mangalatra, aza mitsangana ho vavolombelon̈o mavandy, aviô hajà babanao ndreky reninao.’” 21 Ho lelahy io: “Efa narehako aby didy jiaby zen̈y rango zaho mbala hely.” 22 Jesosy koa fa naharen̈y zen̈y, ho izy taminany: “Mbala misy raha araiky tsy ampy aminao: Alafaosa fanan̈ananao jiaby, baka iô vola azonao baka amy zin̈y rasà amin’olo masikiny, amy zen̈y anao hanan̈a harian̈a an-dan̈itry an̈y. Aviô, alô han̈araka zaho.” 23 Nalahelo mare izy izikoa fa naharen̈y zen̈y, fôtony izy nanan-draha mare.
24 Jesosy nizaha izy sady nivolan̈a: “Ten̈a ho sarotro amin’olo manam-bola hiditry amy Fanjakan̈an’ny Zan̈ahary! 25 Ia, ho moramora amy shamô hiditry amy lavakan’ny fanjaitry, tozay amin’olo mpan̈arivo hiditry amy Fanjakan̈an’ny Zan̈ahary.” 26 Irô olo naharen̈y raha zen̈y nivolan̈a: “Ke mbala pôsibla ho hisy olo ho voavonjy edy va?” 27 Ho izy: “Raha tsy pôsibla amin’olombelon̈o, pôsibla amy Zan̈ahary.” 28 Fa ho Petera: “Zahay efa nahafoe fanan̈ananay baka iô nan̈araka anao.” 29 Ke ho izy tamindrô: “Ambarako anarô marin̈y tsarabe fa, tsisy olo nahafoe tran̈o, na vady, na rahalahy, na raimandreny, na zanaka, baka amy Fanjakan̈an’ny Zan̈ahary, 30 ke tsy hahazo maromaron’izen̈y amy ziôty, aviô fiainan̈a tsisy farany amy donia* ho avy.”
31 Baka iô nindesiny nihataka hely irô 12 Lahy, aviô ho izy tamindrô: “Hitanarô, atsika iziô hanonga a Jerosalema, ke ho tanteraka aby raha jiaby nirahin̈y nisoratindrô mpaminan̈y aby io momba Zanak’olo. 32 Ohatra iziô, handeha hatolotro amin’olo hafa firenena aby io izy, ke izy handeha hadroedroendrô, halaindrô baràka,* baka iô handrorandrô. 33 Izy koa fa baka hivilezindrô karavasy, izy hivonendrô. Fa amin’ny andra fahatelo izy hitsangana.” 34 Kanefa tsy azondrô foeky dikan’ny raha aby zen̈y. Nasitriky irô baka dikan’ny volan̈a aby zen̈y, ke tsy nazava tamindrô foeky dikan’ny raha nivolan̈iny.
35 Jesosy koa fa nahainarikitry Jerikô, nisy lelahy gila araiky zay nipetraka tamôron-dalan̈a tiô nangataka. 36 Izy koa fa naharen̈y vahoaka nandalo, izy nan̈ontany asa misy ino. 37 Ho irô taminany: “Jesosy baka a Nazareta mandalo!” 38 Ke izy nandronton̈o mare karaha ty: “A Jesosy Zanakan’i Davida e, mamindrà fô aminaka!” 39 Fa irô olo nandeha taloha aby io nasiaka izy sady nan̈iraka izy hangin̈y, kanefa izy nahainandronton̈o mare fo: “A Zanakan’i Davida e, mamindrà fô aminaka!” 40 Ke Jesosy nidôko, aviô lelahy io nirahiny nindesin̈y taminany tiô. Lelahy io koa fa nan̈aton̈o, ho Jesosy taminany: 41 “Ino ma raha tianao hataoko aminao?” Ho izy: “A Tômpo, ataova mimpody mahita ndraiky zaho ô!” 42 Ke ho Jesosy taminany: “Mahità ndraiky anao. Finoan̈anao nampajanga anao.” 43 Tiô ny iô lelahy io nimpody nahita ndraiky, aviô izy nanomboko nan̈araka Jesosy ke nan̈amia voninahitry Zan̈ahary. Olo jiaby nahita raha zen̈y koa nidera Zan̈ahary.