Taratasy handeha amindrô Hebreo aby io
3 Ke nohon’izen̈y, rahalahy masin̈y aby, tsy azôvy zen̈y fa anarô an̈isan’ny voakaiky* handeha an-dan̈itry, iritrireta fo modelin’i Jesosy, araiky ikentsika fa apôstôly sady mpisôron̈obe in̈y. 2 Izy nan̈araka volan̈an’ny* Zan̈ahary, araiky nanendry izy han̈ano andraikitry io, karaha nataon’i Mosesy nan̈araka volan̈a izikoa fa nan̈ano fanompoan̈anany tan̈ivon’ny fiangonan̈an’ny* Zan̈ahary. 3 Izy* bakà vain̈y hahazo voninahitry mandilatra Mosesy, fôtony olo man̈amboatra tran̈o mbala man̈eva hajain̈a mandilatra tran̈o namboariny. 4 Haintsika fa nisy nan̈amboatra aby tran̈o jiaby io, fa Zan̈ahary ndraiky niasa raha jiaby. 5 Mosesy mpanompo niandraikitry tran̈on’ny Zan̈ahary, ary nataony tsara andraikitrinany tamy maha mpanompo izy io. Fanompoan̈a nataony zen̈y mifan̈itsy amy raha mbala hambara afara atỳ. 6 Fa Kristy ndraiky zanaka miandraikitry tran̈on’ny Zan̈ahary, ary ataony tsara andraikitrinany zen̈y. Sady atsika lastiô tran̈o zen̈y, izikoa atsika mifen̈y fo hasaky hivolan̈a ndreky tsy hiala amy fan̈antinan̈a mampirehareha atsika io, firaka amy farany.
7 Ke, eraka raha koran̈in’ny fan̈ahy masin̈y ty: “Izikoa anarô mitandren̈y feonany ankitin̈y niany, 8 anarô tsy mila be mokon-doha karaha nataondrô dadilahibenarô tamy tany paiky tan̈y in̈y. Irô tamin’in̈y nan̈ano raha nampaneloko zaho mare. 9 Ia, irô ndray efa nahita raha nataoko tan̈atin’ny 40 taon̈o, irô mbala nasaky nitsapa jery zaho fo. 10 Zen̈y nahavy taranaka io nampangaroharo zaho, ke ho zaho: ‘Irô raha miasa man̈araka raha tian’ny fôndrô fo, aviô irô tsy ten̈a mahay zaho.’* 11 Zaho neloko ke ty vava nataoko: ‘Irô tsy hidriky amy fitsaharan̈anaka.’”
12 Rahalahy aby, mitandrema anarô tsao hiala amy Zan̈ahary velon̈o. Izikoa zen̈y bakà ny raha misy, anarô hanjary hanan̈a fô ratsy aviô anarô tsy hatoky* Zan̈ahary; 13 fa aza vôly mifankahery isan’andra, izikoa raha mbala misy fo andra kahian̈a “niany” zen̈y, amy zen̈y tsisy aminarô io ho voafitakan’ny fahotan̈a ke hanjary be mokon-doha. 14 Atsika bakà hahazo raha nazon’i Kristy izikoa atsika tsy miala amy toky nanan̈antsika tamy voanalohany, sady mifen̈y angôvo jiaby man̈ano zen̈y firaka amy farany. 15 Eraka raha voasoratra ty: “Izikoa anarô mitandren̈y feonany ankitin̈y niany, anarô tsy mila be mokon-doha karaha irô dadilahibenarô aby in̈y. Irô tamin’in̈y bakà nan̈ano raha nampaneloko zaho mare.”
16 Azôvy aby ma olo naharen̈y feon’ny Zan̈ahary kanefa mbala nan̈ano raha nampaneloko izy fo? Tsy irô olo jiaby nindesin’i Mosesy niala ta Ezipty in̈y? 17 Aviô koa, azôvy ma irô olo nampangaroharo Zan̈ahary tan̈atin’ny 40 taon̈o in̈y? Tsy irô olo nanota, ke naty tamy tany paiky tan̈y in̈y? 18 Baka iô, tamin-jôvy ma izy nifanta fa irô tsy hidriky amy fitsaharan̈anany? Tsy tamindrô olo tsy nan̈araka volan̈anany aby in̈y? 19 Ia, irô tsy afaka nidriky tamy fitsaharan̈anany, fôtony irô tsy ampy finoan̈a.