Vaovao Tsara Nisoratin’i Matio
1 Boky ty misy tantaran’i* Jesosy Kristy,* zanakan’i Davida, zanakan’i Abrahama:
2 Abrahama baban’i Isàka;
Isàka baban’i Jakoba;
Jakoba baban’i Joda ndreky irô rahalahiny aby io;
3 Joda baban’i Pereza ndreky Zera; irô io zanakanany tamy Tamara.
Pereza baban’i Hezrona;
Hezrona baban’i Rama;
4 Rama baban’i Aminadaba;
Aminadaba baban’i Nasona;
Nasona baban’i Salmona;
5 Salmona baban’i Boaza; Boaza io zanakanany tamy Rahaba.
Boaza baban’i Obeda; Obeda io zanakanany tamy Rota.
Obeda baban’i Jese;
6 Jese baban’i Mpanjaka Davida;
Davida baban’i Solomona; Solomona io zanakanany tamy vadin’i Oria.
7 Solomona baban’i Rehoboama;
Rehoboama baban’i Abia;
Abia baban’i Asa;
8 Asa baban’i Josafata;
Josafata baban’i Jorama;
Jorama baban’i Ozia;
9 Ozia baban’i Jotama;
Jotama baban’i Ahaza;
Ahaza baban’i Hezekia;
10 Hezekia baban’i Manase;
Manase baban’i Amona;
Amona baban’i Josia;
11 Josia baban’i Jekonia ndreky irô rahalahiny aby io; tamy fotoan̈an’irô Jiosy aby io nalefa sesitany ta Babylony tan̈y izy niteraka irô zanany aby io.
12 Jekonia baban’i Sealtiely; ta Babylony izy niteraka Sealtiely io.
Sealtiely baban’i Zerobabela;
13 Zerobabela baban’i Abihoda;
Abihoda baban’i Eliakimo;
Eliakimo baban’i Azora;
14 Azora baban’i Zadoka;
Zadoka baban’i Akimo;
Akimo baban’i Elihoda;
15 Elihoda baban’i Eleazara;
Eleazara baban’i Matana;
Matana baban’i Jakoba;
16 Jakoba baban’i Josefa vadin’i Maria; Maria io araiky niteraka Jesosy, araiky kahian̈a Kristy.
17 Ke nanomboko tamin’i Abrahama firaka tamy Davida, nisy taranaka 14; baka iô rango tamy Davida firaka tamy fotoan̈a nandifasan̈a irô Jiosy aby io sesitany ta Babylony, nisy taranaka 14; aviô nisy taranaka 14 koa, rango tamy fotoan̈a nandifasan̈a irô Jiosy aby io sesitany ta Babylony firaka tamy fotoan̈a navian’i Kristy.
18 Ty raha nandalo tamy fotoan̈an’i Jesosy Kristy teraka: Tamy Maria navesatra Jesosy, izy efa fiansen’i Josefa. Baka tamy fan̈ahy masin̈y* nahavy Maria navesatra. Irô roen’i Josefa tamy zen̈y mbala tsendriky tran̈o araiky. 19 Josefa fiansen’i* Maria io olo marin̈y. Izy tsy tihangala baràka Maria amy fiaraha-monin̈y, ke zen̈y nahavy izy tseky hisaraka mangingin̈y tamy Maria. 20 Josefa koa fa baka nandiniky raha zen̈y, izy tafandry. Tiô fo nisy anjelin’i Jehovah* niboaka taminany tan̈atin’ny nôfy. Anjely io nivolan̈a: “A Josefa zanakan’i Davida, anao aza mavozo han̈ainga Maria* ke hitondra izy an-tran̈onao. Baka amy fan̈ahy masin̈y nahavy izy havesatra.* 21 Hiteraka tsaiky lelahy izy ke ataova Jesosy* an̈aran̈anany, fôtony tsaiky io han̈avotro olo firenena araiky aminany, baka irô ho afaka amy fahotan̈andrô.” 22 Niboaka aby raha jiaby zen̈y baka ho tanteraka volan̈an’i Jehovah. Izy nan̈iraka mpaminan̈inany araiky hivolan̈a karaha ty: 23 “Hisy virjiny havesatra, ke hiteraka tsaiky lelahy. Emanoely hikahian̈a tsaiky io.” Dikany an̈aran̈a io: “Zan̈ahary Miaraka Amintsika.”
24 Josefa baka tiô nifaoha, ke nataony aby raha jiaby nivolan̈in’ny anjelin’i Jehovah in̈y. Nalainy vady an-tran̈o Maria.* 25 Kanefa Josefa tsiary nan̈ano firaisan̈a tamy Maria, izikoa tsy efa teraka tsaiky io. Jesosy nataony an̈aran̈an’ny tsaiky io.