Vaovao Tsara Nisoratin’i Matio
16 Jesosy koa fa tan̈y, nan̈aton̈o izy irô Fariseo ndreky Sadoseo aby io. Nirahandrô han̈ano fahagagan̈a baka an-dan̈itry izy, fôtony irô tihitsapa jery izy. 2 Kanefa ho izy tamindrô: “Andra koa fa hariva, anarô mivolan̈a: ‘Ho tsara andra amaray, fôtony lan̈itry indriô mena.’ 3 Baka iô andra koa fa maraindrain̈y, ho anarô: ‘Lan̈itry indriô mena kanefa misy rôndro, dikan’izen̈y hanintsy niany, aviô ho latsaka mahalen̈y.’ Baka amy fizahavanarô lan̈itry hahaizanarô han̈ano karakôry toetrandra, kanefa tsy vitanarô mandiniky dikany raha mandalo ziôty. 4 Taranaka ratsy fan̈ahy salakady mivadiky amy Zan̈ahary* raha miasa mitady fahagagan̈a fo, kanefa tsisy fahagagan̈a amezan̈a irô foeky izikoa tsy araiky nandalo tamy mpaminan̈y Jonà in̈y fo.” Baka iô, nialany irô ke lôso izy nandeha.
5 Mpianatran’i Jesosy aby io baka tiô nitsaka tandaforehy. Irô nan̈adin̈a nitondra môfo. 6 Ho Jesosy tamindrô: “Mitandrema amy leviran’ny Fariseo ndreky Sadoseo.” 7 Ke irô nifampikoran̈a karaha ty: “Mety baka amin’ny atsika tsy nitondra môfo donko nahavy izy nivolan̈a zen̈y.” 8 Ren̈in’i Jesosy raha zen̈y, ke ho izy tamindrô: “Anarô mba hely finoan̈a ay! Anarô ndray tsy nitondra môfo, ino ma raha mampiasaloha anarô? 9 Mbala tsy mazava aminarô fo ma raha tiako havian̈a? Tsy azonarô onon̈o ma fa môfo dimy fo nahavoky lelahy 5 000, kanefa firy tanty lambiny navoavorinarô tamy zin̈y? 10 Nadin̈anarô koa ma fa môfo fito fo nahavoky lelahy 4 000, kanefa firy antômby* lambiny tavela navoavorinarô tamy zin̈y? 11 Ke nan̈ino fo tsy mazava aminarô fa tsy momba môfo raha tiako havian̈a? Mitandrema amy leviran’ny Fariseo ndreky Sadoseo.” 12 Nazava tamindrô amizay fa tsy momba leviran’ny môfo raha tian’i Jesosy havian̈a, fa momba fampianaran̈an’ny Fariseo ndreky Sadoseo.
13 Jesosy koa fa navy tamy faritry Kaisaria-Filipo, izy nan̈ontany mpianatranany aby io karaha ty: “Azôvy ma fahaizan’olo Zanak’olo zen̈y?” 14 Ho irô taminany: “Misy mivolan̈a ‘Jaony Mpan̈ano Batisa’, sasany ndraiky mivolan̈a ‘Elia’, aviô sasany mivolan̈a ‘Jeremia’ na ‘araiky amindrô mpaminan̈y aby io.’ ” 15 Ho izy tamindrô baka tiô: “Anarô ke, azôvy fahaizanarô zaho?” 16 Karaha ty nambarany Simona Petera: “Anao Kristy, Zanakan’ny Zan̈ahary velon̈o.” 17 Ke ho Jesosy taminany: “Sambatra anao Simona zanakan’i Jonà, fôtony tsy olombelon̈o* nahavy anao nahay zen̈y, fa Babako an-dan̈itry an̈y. 18 Ty koa raha ambarako anao: Anao Petera, aviô an̈abon’ny lampimbato ty han̈oren̈ako fiangonan̈anaka, ke varavaran̈an’ny Fasan̈a* tsy haharesy izy. 19 Hamezako anao lakilen’ny Fanjakan̈an’ny lan̈itry, ke zay raha hifihezinao ambony tany eto efa voafehy an-dan̈itry an̈y, aviô zay raha hivahanao ambony tany eto efa voavaha koa an-dan̈itry an̈y.” 20 Baka iô nifeperiny mare mpianatranany aby io tsy han̈ambara amin’olo fa izy Kristy.
21 Nanomboko tiô, Jesosy nan̈azava tamindrô mpianatranany aby io fa izy tsy maintsy mandeha a Jerosalema, ke anti-pan̈ahy ndreky sefon’ny mpisôron̈o, aviô mpanoratra lalàn̈a aby io hampijaly izy mare, baka iô izy hivonen̈a. Fa afaka telo andra,* izy hatsangana. 22 Ke Jesosy nindesin’i Petera nitaokan̈a hely, aviô mentitry mare izy nivolan̈a karaha ty: “A Tômpo, anao mba mahaiza tsara fan̈ahy amin’ny ain̈inao! Raha aby zen̈y tsy hahavoa anao foeky.” 23 Fa Jesosy nan̈ambôho Petera sady nivolan̈a taminany karaha ty: “Mandihana an̈y anao Satana! Anao raha tihampivadiky zaho fo,* fôtony fomba fisain̈ananao tsy fomba fisain̈anan’ny Zan̈ahary fa nin’olombelon̈o.”
24 Baka iô ho Jesosy tamindrô mpianatranany aby io: “Izikoa misy olo tihan̈ara-dia zaho, izy tsy tôkony han̈eky* ain̈inany eky fa, izy tôkony hitondra hazofijalian̈anany* ke han̈araka zaho fo. 25 Fôtony ho foaty lan̈iany olo mitady fomba han̈avaotany ain̈inany; fa lan̈iany olo mahafoe ain̈inany fôtony izy mpan̈ara-dia zaho, ho avotro.* 26 Ino edy varany izikoa olo araiky mahazo raha jiaby amy donia ty, kanefa fahin̈ananany very? Sa vôn̈ono han̈amia ino olo araiky hatao takalon’ny fahin̈ananany? 27 Zanak’olo ho avy amy voninahitrin’ny Babany,* ke izy hiaraka amindrô anjelinany aby io handeha hamaly olo tsiaraikiaraiky arakaraka raha nataondrô. 28 Ambarako anarô mazava tsarabe fa, sasany amin’olo aby mitsangana eto tsy ho foaty foeky, izikoa tsy efa mahita Zanak’olo avy amy Fanjakan̈anany.”