Taratasy handeha amindrô Hebreo aby io

10 Ny marin̈y aminany, Lalàn̈a io mbala kandindon̈on’ny* raha tsara ho avy, fa tsendriky lay ten̈a izy. Aviô, ndray iô sôron̈o mitovy fo fatao isaka taon̈o, izio* tsy mahavy olo man̈aton̈o Zan̈ahary hanjary lavorary. 2 Izikoa bakà sôron̈o aby io nahavita zen̈y, ôtrizay efa tsy nilain̈a eky nan̈ano sôron̈o maro, fôtony lan̈iany olo man̈ano fanompoan̈a masin̈y efa voadio tamy fahotan̈andrô ke efa tsy ninjehin’ny eritreritrindrô eky. 3 Kanefa ny raha misy, sôron̈o nataondrô io nampatsiaro irô fo, isaka taon̈o, fa irô mpanota, 4 fôtony tsy mahavita man̈adoso fahotan̈a foeky lion’aomby lahy ndreky lion’ny bengy lahy.

5 Ke Kristy koa fa navy tambony tany, izy nivolan̈a: “‘Anao efa tsy nila sôron̈o ndreky fan̈atitry eky, fa anao nan̈oman̈a vatan̈a hamezan̈a zaho. 6 Efa tsy nankasitrahanao eky fan̈atitry iroan̈a* ndreky fan̈atitry nohon’ny fahotan̈a.’* 7 Aviô ho zaho: ‘Indriô zaho navy han̈ano sitrapônao, Zan̈ahary e!’—Raha momba zaho efa voasoratra amin’ny horonam-boky ao.—” 8 Karaha ty antsendriky ho izy: “Tsy tianao sady tsy nankasitrahanao fan̈atitry, ndreky sôron̈o, ndreky fan̈atitry iroan̈a, aviô fan̈atitry nohon’ny fahotan̈a.” Sôron̈o aby zen̈y natao fôtony zen̈y raha nitakian’ny Lalàn̈a. 9 Zay izy vo nivolan̈a: “Indriô zaho navy han̈ano sitrapônao.” Tsy maintsy nifoan̈any* antsendriky araiky voanalohany,* zay izy vo nan̈ano araiky faharoe.* 10 Eraka ‘sitrapôn’ny Zan̈ahary’ koran̈iny io, atsika nankamasin̈iny baka tamy raha nataon’i Jesosy Kristy, araiky nan̈ano sôron̈o ain̈inany indraiky fo fa tsy nan̈indroe in̈y.

11 Isan’andra, mpisôron̈o tsiaraikiaraiky tsy maintsy nangala plasindrô koa fa han̈ano fanompoan̈a masin̈y* ndreky han̈ano sôron̈o. Matetiky sôron̈o nataondrô zen̈y nitovy fo, kanefa irô io tsy mahavita man̈adoso fahotan̈a foeky. 12 Fa indraiky fo Kristy nan̈ano sôron̈o ain̈inany, nohon’ny fahotan̈a. Baka iô izy nipetraka tankavanan̈an’ny Zan̈ahary. 13 Ke nanomboko tamy zen̈y, izy niambin̈y fo parapan̈anaovan’ny Zan̈ahary irô fahavalonany aby io hanjary raha fan̈apitrahany vitinany. 14 Baka tamy sôron̈o nataony in̈y bakà nahavy irô olo nankamasin̈iny aby io nanjary lavorary mandrakizay. 15 Zan̈ahary nampiasa fan̈ahy masin̈y han̈amezan̈a toky atsika momba raha zen̈y. Karaha ty ho izy: 16 “‘Ty fifan̈ikian̈a hataoko amindrô, afaran’ny andra aby zen̈y’, ho Jehovah. ‘Lalàn̈anaka hampidiriko an̈atin’ny fôndrô, aviô izio hisoratiko an̈atin’ny jerindrô.’” 17 Karaha ty koa ho izy: “Efa tsy halaiko onon̈o eky fahotan̈a nataondrô ndreky raha ratsy vitandrô.” 18 Ke Zan̈ahary koa fa namafa fahotan̈a jiaby zen̈y, efa tsy ilain̈a eky fan̈atitry nohon’ny fahotan̈a zen̈y.

19 Ke baka amy lion’i Jesosy, rahalahy aby, mahavy atsika masaky* mandeha amy lalan̈a midriky amy Farany Masin̈y io. 20 Izy nan̈abian̈a lalan̈a hazahoantsika fiainan̈a, tamin’izy nandalo tamy ridô in̈y. Tsy ino ridô io fa ain̈inany. 21 Aviô koa, mpisôron̈obentsika io mikarakara olon’ny* Zan̈ahary. Ke nohon’ny raha jiaby zen̈y, 22 alô atsika han̈aton̈o Zan̈ahary amy fôntsika jiaby sady hatoky raha zen̈y angôvo jiaby. Fôntsika ndreky feon’ny fieritreretan̈antsika bakà efa voadio, baka iô vatan̈antsika koa efa voasasa tamy rano madio. 23 Alô atsika hifen̈y fo hikoran̈a momba fan̈antinan̈antsika io, sady tsy hisalasala foeky han̈ano zen̈y, fôtony Zan̈ahary, araiky nan̈amia atsika fampan̈antinan̈a io, tsy mivadiky. 24 Aviô alô atsika hizaha raha mahatsara atsika samby atsika, amy zen̈y atsika hazoto han̈aboaka fitiavan̈a ndreky han̈ano asa tsara. 25 Olo sasany efa zatra tsy mivory, fa atsika ndraiky, alô atsika tsy hahafoe fivorian̈a sady hifankahery fo, intsaka eky amy ziôty, fôtony efa mahaimarikitry andra hitsaran’ny Zan̈ahary olombelon̈o.

26 Izikoa atsika mbala kinia manota fo kanefa atsika efa mahay tsarabe ny marin̈y, tsisy sôron̈o hafa eky mety atao nohon’ny fahotan̈antsika. 27 Ia, efa miambin̈y fitsaran̈an’ny Zan̈ahary sady mangôrohôro edy ny raha mety atao, aviô miambin̈y fotoan̈a han̈amparany helokonany. Helokonany io mira môtro mizelazela in̈y, ary izio handravan̈a lan̈iany olo manohitry izy. 28 Izikoa nisy olo tsy nan̈isy fôtiny Lalàn̈an’i Mosesy, ke nisy vavolombelon̈o aroe na telo nahita raha nataony, izy tsy nanan̈ana hinakinaka foeky fa tsy maintsy nivonen̈a. 29 Ke eraka dinikinarô, tsy mbala lombolombon’izen̈y raha havoa olo tsy man̈aja* Zanakan’ny Zan̈ahary ndreky tsy man̈isy fôtiny lio nampanankery fifan̈ikian̈a io?* Aviô tsy mbala lombolombon’izen̈y koa raha havoa lan̈iany olo tsy man̈isy fôtiny fan̈ahy masin̈y ampiasain’ny Zan̈ahary han̈aboahan̈a hatsaram-pan̈ahy miavaka amin’olo? 30 Haintsika bakà fa Zan̈ahary efa nivolan̈a: “Zaho tômpin’ny valy faty, ary zaho hamaly.” Aviô karaha ty raha voasoratra amy volan̈anany ao: “Jehovah hitsara vahoakanany.” 31 Faran-draha mampavozo eky hisazian’ny* Zan̈ahary velon̈o zen̈y.

32 Aza adin̈anarô andra taloha aby in̈y, tamin’ny anarô niady mare sady niaritry jaly izikoa fa nahay ny marin̈y.* 33 Nisy fotoan̈a anarô nampijalian̈a ndreky nankaratsian̈a tamason’olo;* fa tamy fotoan̈a hafa ndraiky, anarô nidôko* tankilan’olo niaritry raha aby zen̈y sady nan̈ampy irô. 34 Anarô bakà nitepô olo nigadra, aviô anarô mbala ravoravo fo ndray niravain’olo fanan̈ananarô, fôtony hainarô fa tsara mare salakady maharitry lovanarô.

35 Ke anarô masakia mivolan̈a fo, fôtony be ankitin̈y hatsaran̈a ho azonarô izikoa anarô man̈ano zen̈y. 36 Anarô mila miaritry, amy zen̈y anarô hahavita han̈ano sitrapôn’ny Zan̈ahary. Izikoa anarô man̈ano zen̈y, ho tanteraka aminarô raha nampan̈antin̈ainy anarô. 37 Fôtony “efa ten̈a hely tavela”, aviô “ho avy Araiky ho avy,* ary efa tsy ho ela raha zen̈y.” 38 “Olo marin̈y ho velon̈o fôtony izy manan̈a finoan̈a”, fa “izikoa izy mimpody afara, zaho tsy ho ravoravo aminany.” 39 Atsika tsy an̈isan’olo mimpody afara ke ho ripaka, fa atsika an̈isan’olo manan̈a finoan̈a ke ho avotro.