Taratasy Handeha Amindrô Romanin̈y aby Io
13 Olo tsiaraikiaraiky tôkony han̈eky manam-pahifan̈a, fôtony baka amy Zan̈ahary aby fahifan̈a jiaby. Zan̈ahary baka nan̈ambela irô manam-pahifan̈a aby io amy plasindrô. 2 Dikan’izen̈y, olo araiky koa manohitry fahifan̈a, izy manohitry lamin̈y napetrakan’ny Zan̈ahary. Ho voasazy* lan̈iany olo manohitry lamin̈y zen̈y. 3 Irô mpitondra aby io tsy havozoan’olo man̈ano ny tsara, fa hatahaoran’olo man̈ano ny ratsy. Ke izikoa anao tsy tihavozo irô manam-pahifan̈a aby io, man̈anaova ny tsara fo fa hidera anao edy irô, 4 fôtony irô io mpanompon’ny Zan̈ahary mitady raha mahatsara anao. Fa izikoa ndraiky anao man̈ano raha ratsy, anao mavozoa, fôtony misy antony mahavy irô io mitondra sabatra. Mpanompon’ny Zan̈ahary baka irô io, aviô irô io namezan̈a fahifan̈a han̈asazy* zay olo man̈ano raha ratsy.
5 Dikan’izen̈y, ten̈a misy antony mahavy anarô tsy maintsy man̈eky fahifan̈a; tsy raha baka amy sazy fo fa, nohon’ny feon’ny fieritreretan̈anarô koa. 6 Zen̈y koa mahavy anarô tsy maintsy man̈efa hetra; fôtony irô manam-pahifan̈a aby io ampiasain’ny Zan̈ahary hiasa nin’ny vahoaka, ary zen̈y tanjon̈ondrô. 7 Ifà* amindrô jiaby zay raha tôkony hifain̈a amindrô: Hetra amin’olo mitaky hetra, patanty amin’olo mitaky patanty, tahotro amin’olo tôkony hatahaoran̈a, aviô fan̈ajan̈a amin’olo tôkony hajain̈a.
8 Aza ambela hisy traosan’olo foeky aminarô, izikoa tsy raha fifankatiavan̈anarô fo; man̈atanteraka lalàn̈a baka lan̈iany olo tia olo. 9 Fôtony lalàn̈a, karaha ataony: “Aza mandiadia vady, aza mamono olo, aza mangalatra, aviô aza mitsiriritry” ndreky didy hafa jiaby, efa voafehin’ny didy araiky ty: “Anao mila tia olo karaha ataonao tia ain̈inao.” 10 Fitiavan̈a zen̈y tsy man̈isy ratsy olo; ke dikan’izen̈y fitiavan̈a io man̈atanteraka lalàn̈a.
11 Ataova raha zen̈y, fôtony hainarô vanim-potoan̈a iain̈antsika ziô io. Efa ziô baka lera tôkony hifohazanarô amy tôromaso, fôtony ziôty, efa nahainarikitry fo famonjian̈a atsika izikoa ampiran̈iny amy fotoan̈an’ny atsika nanjary mpino. 12 Efa ho tapitry alin̈y, ke efa ho maraindrain̈y andra. Alô edy basy atsika hiala amy* raha ratsy fataon’olo amy mahiziky, ke hampiasa* fitaovam-piadivan̈an’ny mazava. 13 Alô atsika hitondra ten̈a tsara, karaha amin’ny andra mazava, ke atsika tsy han̈ano fety tsy voafehy,* tsy han̈ano mamo, tsy hijangajanga, tsy hitondra ten̈a karaha olo tsisy hen̈atra,* tsy hankany amin’olo, baka iô tsy ho be fô. 14 Fa sikìna toetrin’i Jesosy Kristy Tômpo, aviô aza man̈ano tetiky han̈amezan̈a fahafaham-pô fan̈irian̈an’ny nôfotro.