Taratasy Handeha Amindrô Efesianin̈y aby Io
6 Anarô zanaka, areha volan̈an’ny raimandreninarô eraka sitrapôn’ny Tômpo, fôtony zen̈y raha tôkony hatao. 2 “Hajà babanao ndreky reninao.” Zen̈y didy voanalohany mifandray amy fampan̈antinan̈a ty: 3 “Amy zen̈y anao hahita hatsaran̈a* sady ho ela velon̈o ambony tany.” 4 Aviô anarô baba, aza man̈ano raha mampameloko zanakanarô, fa tarimia mifan̈araka amy fan̈anaran̈a* ndreky fomba fisain̈anan’i* Jehovah fo irô.
5 Anarô mpanompo,* areha amy fô jiaby* volan̈an’ny tômponarô ambony tany,* ke izy hajà ndreky avozoa,* karaha ataonarô amy Kristy, 6 aviô tsy lera anarô misy man̈ara-maso fo anarô tôkony han̈ano zen̈y, karaha raha tihamparavoravo olo in̈y fo, fa anarô tôkony han̈ano zen̈y fôtony anarô mpanompon’i Kristy sady man̈ano sitrapôn’ny Zan̈ahary amy fô jiaby. 7 Tompoe amy fô jiaby tômponarô,* ke ataova karaha manompo Jehovah in̈y anarô fa tsy karaha manompo olo, 8 fôtony hainarô fa Jehovah hamaly zay raha tsara ataon’olo tsiaraikiaraiky, na andevo izy na olo afaka. 9 Aviô anarô tômpo, aza vôly man̈ano karaha zen̈y koa amy mpanomponarô, ke aza rahôn̈iny irô, fôtony hainarô fa an-dan̈itry an̈y, araiky fo Tômponarô, ary izy tsy man̈avakavaka olo.*
10 Farany, ataova fo raha hazahoan̈a angôvo baka amy Tômpo fôtony be ankitin̈y angôvonany. 11 Sikìna aby raha findesin̈y miady namezan’ny Zan̈ahary anarô, baka anarô hiôrin̈y tsarabe ke ho vitanarô hanohitry teti-dratsin’i* Devoly; 12 fôtony atsika tsy miady* amy nôfotro ndreky lio, fa amy fanjakan̈a, ndreky amy manam-pahifan̈a, ndreky amy mpanjakan’ny donia an̈atin’ny hiziky ty, aviô amy fan̈ahy ratsy aby amy faritrin’ny lan̈itry an̈y. 13 Ke alaiva aby raha findesin̈y miady amezan’ny Zan̈ahary, amy zen̈y anarô hahavita hanohitry fahavalo izikoa fa avy andra anjakan’ny faharatsian̈a. Ke izikoa fa vitanarô raha jiaby zen̈y, anarô hiôrin̈y tsarabe.
14 Mifen̈a fo hiôrin̈y tsarabe, ke fahamarin̈ana ataova saintiry amy vanian̈anarô, aviô fan̈anaovan̈a ny marin̈y* ataova fiaraovan-tratra, 15 baka iô fahavon̈aosan̈a hitory vaovao tsaran’ny fihavanan̈a* ataova kiraro* amy vitinarô. 16 Sôsoko raha jiaby zen̈y, alaiva ampinga maventy, tsy ino zen̈y fa finoan̈a, fôtony izio hahavitanarô mamono zanapaly* mirehitry jiaby alefan’ny araiky ratsy. 17 Baka iô, ataova koa fiaraovan-doha, tsy ino zen̈y fa famonjian̈a, aviô alaiva sabatran’ny fan̈ahy, tsy ino zen̈y fa volan̈an’ny Zan̈ahary. 18 Mivavaha fo ndray amy lera karakôry ndray amy lera karakôry, baka iô areha fitaritan’ny fan̈ahy, ke man̈anaova vavaka ndreky fiangavian̈a isan-karazany. Aviô miambesa fo, baka iô aza vôly man̈ano fiangavian̈a nin’olo masin̈y jiaby. 19 Mivavaha koa ninaka, amy zen̈y lera zaho mivolan̈a,* hambara zaho volan̈a tôkony hivolan̈iko, ke zaho hasaky hivolan̈a lera zaho man̈ambara sekire masin̈y momba vaovao tsara, 20 fôtony baka amy zio mahavy zaho ambasadera mifehy silisily. Ia, mivavaha ninaka amy zen̈y zaho hasaky hikoran̈a momba zio, erakan’ny tôkony ho izy.
21 Tykiko, rahalahy tian̈a sady mpanompo atokisan̈a amy Tômpo ao, han̈ambara raha jiaby aminarô, baka anarô koa mba hahay akôry naniko* ndreky ino raha ataoko. 22 Zen̈y antony andifasako izy aminarô an̈y, amy zen̈y ho hainarô akôry naninay, aviô koa amy zen̈y izy hankahery fônarô.
23 Irarian̈a Zan̈ahary Baba ndreky Jesosy Kristy Tômpo han̈amia fiadanan̈a irô rahalahy aby io ndreky han̈aboaka fitiavan̈a amindrô sady han̈amia finoan̈a irô. 24 Irarian̈a han̈aboahan̈a hatsaram-pan̈ahy miavaka lan̈iany olo ten̈a mankatia Jesosy Kristy Tômpontsika.