Taratasy Handeha Amindrô Romanin̈y aby Io
10 Rahalahy aby, zaho man̈iry an̈atin’ny fônaka ato sady miangavy amy Zan̈ahary baka irô ho voavonjy. 2 Zaho mitsangana ho vavolombelon̈o fa irô io mafana fô amy fanompoan̈a Zan̈ahary, kanefa irô tsy ten̈a mahay izy tsarabe. 3 Irô nan̈araka fitsipikindrô tômpiny, fôtony tsy haindrô ino ny marin̈y amason’ny Zan̈ahary; ke vokatran’izen̈y irô tsy nan̈araka fitsipikin’ny Zan̈ahary momba fahamarin̈ana. 4 Kristy baka faran’ny Lalàn̈a, ke hambara fa marin̈y zay olo man̈aboaka fa mino izy.
5 Ty baka raha nisoratin’i Mosesy momba olo ambara fa marin̈y erakan’ny Lalàn̈a: “Olo man̈araka raha aby zen̈y ho velon̈o baka amindrô io.” 6 Fa ty ndraiky raha voakoran̈a momba olo ambara fa marin̈y baka amy finoan̈a: “Anao aza mivolan̈a karaha ty an̈atin’ny fônao ao: ‘Azôvy hanonga an-dan̈itry an̈y?’, dikan’izen̈y hampijotso Kristy. 7 Na karaha ty: ‘Azôvy hijotso amy lavaka tsy hita farany an̈y?’, dikan’izen̈y hampanonga Kristy baka amy maty.”* 8 Kanefa ino raha koran̈in’ny Soratra Masin̈y? “Ankilanao iô volan̈a io, tsy aia zen̈y fa an̈atin’ny vavanao ndreky an̈atin’ny fônao”, izio “volan̈an’ny” finoan̈a nitorianay. 9 Fôtony izikoa anao mivolan̈a* amason’olo fa Jesosy io Tômpo, aviô anao mino an̈atin’ny fônao ao fa Zan̈ahary nanangana izy tamy maty, anao hivonjen̈a. 10 Izikoa baka olo araiky tihanjary olo marin̈y, izy tsy maintsy man̈aboaka finoan̈a vokatran’ny fô, aviô izikoa izy tiho voavonjy, izy tsy maintsy mampiasa vavanany han̈ambaran̈a hafatra io amin’olo.
11 Fôtony Soratra Masin̈y mivolan̈a karaha ty: “Lan̈iany olo mino izy tsy ho diso fan̈antinan̈a.” 12 Tsisy raha tsy mampiran̈a Jiosy ndreky Griky. Araiky fo Tômpo an̈abontsika jiaby, aviô amezany raha marobe* zay olo mikaiky izy. 13 Fôtony “lan̈iany olo mikaiky an̈aran̈an’i Jehovah hivonjen̈a.” 14 Kanefa, akôry ma hataondrô hikaiky izy izikoa irô tsy mino izy? Aviô, akôry hataondrô hino izy izikoa irô mbala tsy naharen̈y raha momba izy? Baka iô, akôry hataondrô haharen̈y izikoa tsisy olo mitory amindrô? 15 Aviô, akôry hataondrô hitory irô koa tsy nirahan̈a? Eraka raha voasoratra ty: “Mba tsara vitindrô mitory vaovao tsara* io ay!”
16 Ndray izy man̈ano zen̈y, tsy irô jiaby nan̈eky vaovao tsara io. Karaha ty baka raha nambaran’i Isaia: “Jehovah, azôvy ma nino raha ren̈indrô baka taminay?”* 17 Ke finoan̈a io baka amy raha ren̈y, aviô raha ren̈y io baka amy volan̈a momba Kristy. 18 Fa ho zaho: Irô ndraiky mba naharen̈y tsarabe edy va? Ny marin̈y aminany, “feondrô efa niboaka eran-tany, aviô hafatra nindesindrô navy firaka amy faran’ny tany misy olo.” 19 Fa ho zaho: Israely ndraiky mba nahay tsarabe edy va? Karaha ty antsendriky ho Mosesy: “Hataoko raha hahavy anarô ho be fô olo hafa firenena,* baka iô hataoko raha hahavy anarô ho meloko mare amy firenena lefaka.” 20 Aviô Isaia nasaky nivolan̈a karaha ty: “Zaho hitan’olo tsy nitady zaho, baka iô zaho nanjary hain’olo tsy nikaiky zaho.” 21 Kanefa karaha ty ndraiky ho izy momba Israely: “Man̈ariva andra zaho mamavatra tan̈ananaka amy vahoaka tsy man̈araka volan̈a sady mierin̈y olo.”