Vaovao Tsara Nisoratin’i Lioka
13 Tamy zen̈y, sasany tamin’olo tiô nitantara tamy Jesosy momba irô Galilianin̈y nivonen’i Pilato in̈y. Liondrô Galilianin̈y aby io naharony tamy sôron̈o nataondrô. 2 Ke ho Jesosy tamindrô: “Anarô ma mieritreritry fa irô Galilianin̈y aby zen̈y mpanota mandilatra Galilianin̈y hafa fôtony zen̈y raha navoa irô? 3 Tsy zen̈y foeky! Fa anarô koa tsy mibebaka, anarô jiaby io ho ripaka karaha irô koa. 4 Aviô irô olo 18 naty nilavoan’ny tilikambo ta Siloama in̈y, anarô ma mieritreritry fa irô in̈y be hadisovan̈a mandilatra olo jiaby mipetraka a Jerosalema ao? 5 Tsy zen̈y foeky! Fa anarô koa tsy mibebaka, anarô jiaby io ho ripaka karaha irô koa.”
6 Baka iô izy nivolan̈a fan̈oharan̈a ty: “Nisy lelahy araiky nanan̈a kakazo aviavy tamy tanin’ny rezainany. Ke navy izy hitady voany tamy zio, fa izy tsy nahita foeky. 7 Ho izy tamy mpikarakara tanin’ny rezain io: ‘Efa telo taon̈o zaho zay nitsakaraka voany tamy kakazo aviavy ty, fa zaho tsy nahita foeky. Tiveha an̈y izio! Nan̈ino ma izio adôko iô? Manjary tsy mety hampiasain̈a kony tany io ay!’ 8 Fa ho lelahy io taminany: ‘A Tômpo, ambilà iô fo antsendriky izio an̈atin’ny taon̈o araiky, fa handeha hangadiako man̈odidin̈y izio aviô hasiako zeziky. 9 Izikoa izio mamoa, arahaba soa arahaba tsara! Fa izikoa tsy zen̈y, iô izy vo irahinao tiven̈y.’”
10 Nampianatra tamy synagoga araiky zay Jesosy tamy Sabata. 11 Nisy man̈angy zay tao narary tan̈atin’ny 18 taon̈o, fôtony izy nisazaohan’ny demony mampalemy. Izy nivônkiny mare ke tsy afaka niangan̈a foeky. 12 Izy koa fa hitan’i Jesosy, karaha ty ho izy taminany: “A man̈angy, afaka aretin̈inao.” 13 Nametra-tan̈ana taminany izy, ke tiô ny iô man̈angy io niangan̈a aviô izy nanomboko nan̈amia voninahitry Zan̈ahary. 14 Neloko mpiandraikitry synagoga io fôtony Jesosy nampajanga olo tamy Sabata, ke ho izy tamy vahoaka: “Misy tsiota andra natao hiasan̈a. Tôkony amin’ny andra aby zen̈y anarô avy hitaha fa tsy amin’ny andra sabata.” 15 Kanefa ho Tômpo taminany: “Mpihatsaravelatsihy! Anarô ma tsy samby mamaha aombinarô na borìkinarô amin’ny andra sabata, aviô mitondra irô io migiaka rano? 16 Ke man̈angy zanakan’i Abrahama efa nifihezin’i* Satana tan̈atin’ny 18 taon̈o ty, tsy mba tôkony hivotsaoran̈a amin’ny andra sabata?” 17 Izy koa fa nivolan̈a raha aby zen̈y, nen̈atra irô olo jiaby nanohitry izy aby io. Fa vahoaka jiaby ndraiky ravoravo izikoa fa nahita raha mahagaga jiaby nataony.
18 Aviô ho izy: “Mitovy amin’ino Fanjakan̈an’ny Zan̈ahary, aviô ino raha mety hampiran̈iko amy zio? 19 Izio mety ampitovisin̈y amy voan’ny motardy natsabon’ny lelahy araiky tamy zaridainany. Maniry izio aviô manjary kakazo maventy be, ke avy vôron̈o miasa tran̈o amy sampan̈an’izio.”
20 Karaha ty koa ho izy: “Mety hampiran̈iko amin’ino Fanjakan̈an’ny Zan̈ahary? 21 Izio miran̈a levira nalain’ny man̈angy araiky, baka iô naharony tamy lafariny intelon’ny raha maventy fan̈iran̈ana raha,* ke lafariny io nivoha.”*
22 Baka iô lôso izy nitety tanàbe ndreky ambanivolo, ke nampianatra sady nanohy dianany handeha a Jerosalema. 23 Ho lelahy araiky zay taminany: “A Tômpo, vitsy ma olo hivonjen̈a?” Ho izy tamindrô: 24 “Mifen̈a mare hiditry amy varavaran̈a maletry, fôtony zaho man̈ambara anarô fa maro olo tihiditry kanefa tsy ho afaka. 25 Lera tômpin-tran̈o mitsangana ke mamody varavaran̈a, anarô hitsangana antany sady hikonkon̈o amy varavaran̈a ke hivolan̈a: ‘A Tômpo, biafa zahay.’ Kanefa izy hivolan̈a aminarô: ‘Tsy haiko foeky baka aia anarô.’ 26 Ke anarô hanomboko hivolan̈a: ‘Zahay nihina ndreky nigiaka niaraka taminao, aviô anao nampianatra tan-dalabenay.’ 27 Kanefa izy hivolan̈a aminarô: ‘Tsy haiko foeky baka aia anarô. Mialà aminaka eto anarô jiaby mpan̈ano raha tsy marin̈y aby ty!’ 28 Anarô hitomoan̈y aviô ho meloko ndreky ho diso fan̈antinan̈a,* lera anarô mahita Abrahama ndreky Isàka aviô Jakoba ndreky irô mpaminan̈y jiaby amy Fanjakan̈an’ny Zan̈ahary, kanefa anarô ndraiky hatsipy ambelan̈a an̈y. 29 Sôsoko zen̈y, hisy olo baka antin̈iana ndreky andrefa aviô baka avaratra ndreky atsimo ho avy ke hangala plasy* amy latabatra amy Fanjakan̈an’ny Zan̈ahary. 30 Ke misy olo farany hanjary voanalohany, aviô misy olo voanalohany hanjary farany.”
31 Tamy lera zen̈y tsarabe sasany tamindrô Fariseo aby io navy, ke nivolan̈a taminany: “Mindao anao miala eto, fa Heroda tihamono anao.” 32 Ke ho izy tamindrô: “Mindao volàn̈a amin’ny amboadỳ fetsy in̈y: ‘Niany ndreky amaray zaho man̈aboaka demony ndreky mampajanga olo. Afak’amaray,* ho vita asanaka.’ 33 Ndray zen̈y, zaho tsy maintsy manohy dianaka niany ndreky amaray aviô afak’amaray, fôtony tsy mety izikoa mpaminan̈y hivonen̈a ambelan̈an’i Jerosalema. 34 Jerosalema, Jerosalema, anao mpamono mpaminan̈y ndreky mpitaora-bato olo nirahin̈y handeha aminao ao! Efa impiry ma zaho tihamory zanakanao karaha ataon’ny renin’ny akôho mamory zanany ambanin’ny elatranany! Kanefa anarô tsy nety. 35 Ke iô anarô ndreky tran̈onarô!* Ambarako anarô fa anarô tsy hahita zaho eky firaka anarô hivolan̈a: ‘Irarian̈a hahazo hatsaran̈a araiky avy amin’ny an̈aran̈an’i Jehovah!’”