Taratasy Voanalohany Handeha Amindrô Korintianin̈y aby Io
14 Mifen̈a angôvo jiaby hifankatia, fa mifen̈a mare koa hahazo kadô baka amy fan̈ahy, intsaka eky fahaizan̈a maminan̈y. 2 Fôtony lan̈iany olo mivolan̈a amy volan̈a isan-karazany tsy mivolan̈a amin’olombelon̈o fa amy Zan̈ahary, ke tsisy olo mahay raha volan̈iny, ndray baka amy fan̈ahy mahavy izy mivolan̈a sekire masin̈y. 3 Kanefa lan̈iany olo maminan̈y, izy man̈ano volan̈a mankafatatra, man̈amia korazy, ndreky mankahery olo. 4 Lan̈iany olo mivolan̈a amy volan̈a isan-karazany mankahery ain̈inany tômpiny, fa lan̈iany olo maminan̈y ndraiky mankahery fiangonan̈a. 5 Tiako ndraiky izikoa anarô jiaby mivolan̈a amy volan̈a isan-karazany, fa izikoa zaho fo, sitrany anarô maminan̈y. Fôtony baka, maminan̈y tsaratsara tozay mivolan̈a amy volan̈a isan-karazany, izikoa tsy raha adikany donko raha volan̈iny, amy zen̈y fiangonan̈a hahazo fankahirezan̈a. 6 Rahalahy aby, zaho ziô koa mandeha aminarô an̈y ke mivolan̈a amy volan̈a isan-karazany, hahatsara anarô ma raha zen̈y? Hahatsara anarô raha zen̈y izikoa zaho man̈abaribary raha mbala tsy hainarô, na mampita fahaizan̈a, na faminanian̈a, na fampianaran̈a aminarô.
7 Ohatra iziô raha man̈ena* karaha ataon’ny sodin̈y na harpa. Izikoa irô io tsy man̈aboaka feo samby isany, akôry han̈avahan̈a feon-kira baka amy sodin̈y na baka amin’ny harpa? 8 Na, izikoa tsy mazava feo aboakan’ny trompety, azôvy olo han̈amboatra handeha hiady? 9 Karaha zen̈y koa fa, izikoa anarô tsy mampiasa volan̈a mora azo, akôry ma hahaizan’olo raha volan̈inarô? Ny marin̈y aminany, anarô hivolan̈a amy tsiko. 10 Amy donia ty mety misy volan̈a isan-karazany, kanefa samby misy dikany aby irô jiaby in̈y. 11 Izikoa tsy haiko dikan’ny volan̈a araiky, zaho hanjary vahiny amin’olo mivolan̈a io, baka iô olo mivolan̈a io hanjary vahiny aminaka. 12 Ke karaha zen̈y koa anarô: Fôtony anarô man̈iry mare hahazo kadô baka amy fan̈ahy, mifen̈a hahazo izio marobe, misy hankahirezan̈a fiangonan̈a.
13 Ke lan̈iany olo mivolan̈a amy volan̈a isan-karazany tôkony hivavaka baka izy hahay handika teny. 14 Fôtony baka, izikoa zaho mivavaka amy volan̈a hafa, kadô nazoko baka tamy fan̈ahy izy mivavaka io, fa raha volan̈iko tsy mazava aminaka.* 15 Ino basy raha tôkony hatao? Lera zaho mivavaka, zaho hampiasa kadô baka amy fan̈ahy, aviô hivavaka koa zaho amy zen̈y hazava raha volan̈iko. Baka iô lera zaho mihira fideran̈a, zaho hampiasa kadô baka amy fan̈ahy, aviô zaho hampiasa volan̈a mazava aminaka. 16 Fa izikoa anao mampiasa kadô baka amy fan̈ahy lera anao midera Zan̈ahary, akôry hivolan̈an’olo tsotra an̈ivonarô iô “Ameny” lera anao man̈ano fisaoran̈a, kanefa tsy azony aby raha volan̈inao? 17 Marin̈y ndraiky fa tsara vavaka fisaoran̈a ataonao, kanefa raha zen̈y tsy mankahery olo hafa. 18 Zaho man̈ano mersy Zan̈ahary fôtony zaho mivolan̈a amy volan̈a maromaron’ny ninarô jiaby. 19 Kanefa, sitrany zaho mivolan̈a volan̈a dimy azoko tsara, misy hampianarako* olo an̈ivon’ny fiangonan̈a, tozay zaho hivolan̈a volan̈a 10 000 amy volan̈a isan-karazany.
20 Rahalahy aby, anarô aza man̈ano karaha tsaiky izikoa fahaizan̈a mandiniky koran̈iny; fa anarô man̈anaova karaha tsaiky izikoa fan̈anaovan̈a raha ratsy koran̈iny, aviô man̈anaova olobe izikoa fahaizan̈a mandiniky koran̈iny. 21 Ty raha voasoratra amy Lalàn̈a ao: “‘Zaho hampiasa volan̈an’olo* hafa firenena ndreky volan̈an’ny* vahiny lera zaho mikoran̈a amy vahoaka ty. Fa ndray zen̈y, irô mbala tsy hitandren̈y zaho fo’, ho Jehovah.” 22 Dikan’izen̈y, fivolan̈ana amy volan̈a isan-karazany io famantaran̈a handeha amin’olo tsy mpino fa tsy amin’olo mpino, fa faminanian̈a ndraiky handeha amin’olo mpino fa tsy amin’olo tsy mpino. 23 Ke izikoa fiangonan̈a jiaby mivory amy tany araiky, baka iô irô jiaby ao mivolan̈a amy volan̈a isan-karazany, kanefa misy olo tsotra* na olo tsy mpino miditry, tsy ndraiky volan̈indrô fa very jery anarô? 24 Fa izikoa ndraiky anarô jiaby samby maminan̈y, aviô misy olo tsy mpino na olo tsotra* miditry, raha jiaby ren̈iny ao han̈itsy izy ndreky hahavy izy handinin-ten̈a tsarabe. 25 Hibaribary sekire an̈atin’ny fônany an̈y, ke izy handohaliky ndreky hivavaka amy Zan̈ahary, sady hivolan̈a: “Aminarô iô ankitin̈y Zan̈ahary!”
26 Ino basy raha tôkony hatao, rahalahy aby? Lera anarô miaraka mivory, misy mihira fideran̈a,* misy mampianatra, misy mivolan̈a raha nabaribary taminany, misy mivolan̈a amy volan̈a isan-karazany, baka iô misy mandika teny. Raha jiaby ataonarô, ataova baka hankahirezan̈a fiangonan̈a. 27 Aviô izikoa misy olo mivolan̈a amy volan̈a isan-karazany, irô tsy tôkony handilatra aroe na telo farany maro, baka iô irô tôkony hifandimby hivolan̈a, aviô misy olo tsy maintsy mandika raha volan̈indrô. 28 Fa izikoa tsisy mpandika teny, izy tôkony hangin̈y an̈ivon’ny fiangonan̈a, baka iô izy tôkony hivolan̈a amin’ny ain̈inany tômpiny fo ndreky amy Zan̈ahary. 29 Mpaminan̈y aroe na telo mety mivolan̈a, fa sasany ndraiky tôkony hifen̈y hahay dikan’ny raha volan̈indrô. 30 Fa izikoa misy olo hafa mahazo fan̈ambaran̈a baka amy Zan̈ahary an̈atin’izy mipetraka iô in̈y, tôkony hangin̈y araiky nivolan̈a voanalohany in̈y. 31 Anarô jiaby io baka samby afaka maminan̈y, fa anarô fo tôkony hifandimby, amy zen̈y olo jiaby afaka hianatra ndreky hahazo fankahirezan̈a. 32 Irô mpaminan̈y aby io tôkony hahay hifehy tsarabe fomba fampiasan̈a kadô nazondrô baka tamy fan̈ahy. 33 Zan̈ahary baka tsy Zan̈aharin’ny fikorontan̈ana fa Zan̈aharin’ny filaminan̈a.*
Ke karaha amy fiangonan̈an’olo masin̈y jiaby an̈y, 34 man̈angy tôkony hangin̈y izikoa fa an̈ivon’ny fiangonan̈a, fôtony irô tsy mahazo mivolan̈a. Irô tôkony han̈eky fahifan̈a, fôtony zen̈y koa raha ambaran’ny Lalàn̈a. 35 Izikoa misy raha tiany ho hay, izy tôkony han̈ontany vadiny lera irô avy an-tran̈o, fôtony mampamen̈atra izikoa man̈angy mivolan̈a an̈ivon’ny fiangonan̈a.
36 Izio ma baka taminarô niboahan’ny volan̈an’ny Zan̈ahary? Sa anarô fo namezan̈a izio?*
37 Izikoa misy aminarô mieritreritry fa izy mpaminan̈y na izy nahazo kadô baka tamy fan̈ahy, izy tôkony han̈eky fa raha soratiko aminarô ziôty io didy baka amy Tômpo. 38 Fa izikoa misy olo tsy mijery izy ty, izy koa mba tsy jiren̈a.* 39 Ke rahalahiko aby, mifen̈a fo haminan̈y, fa ndray zen̈y, aza sakanan̈a olo hivolan̈a amy volan̈a isan-karazany. 40 Kanefa tôkony hatao amy fomba mendriky ndreky milamin̈y aby raha jiaby.