Taratasy Voanalohany Handeha Amindrô Korintianin̈y aby Io
1 Baka amy Paoly, araiky voakaiky hanjary apôstôlin’i Kristy Jesosy nohon’ny sitrapôn’ny Zan̈ahary, ndreky baka amy Sostena rahalahintsika, 2 handeha amy fiangonan̈an’ny Zan̈ahary a Korinto, tsy amin-jôvy zen̈y fa aminarô nankamasin̈iny amy maha mpan̈ara-dia Kristy Jesosy anarô sady nikahian̈a hanjary olo masin̈y, ndreky amin’olo jiaby mikaiky an̈aran̈an’i Jesosy Kristy Tômpontsika, ia, Tômpondrô salakady Tômpontsika koa, ndray aia ndray aia tany misy irô:
3 Irarian̈a Zan̈ahary Babantsika ndreky Jesosy Kristy Tômpo han̈aboaka hatsaram-pan̈ahy miavaka* aminarô ndreky han̈amia anarô fiadanan̈a.
4 Zaho tsy vôly man̈ano mersy Zan̈aharinaka fôtony izy nan̈aboaka hatsaram-pan̈ahy miavaka taminarô mpan̈ara-dia Kristy Jesosy. 5 Anarô koa fa nanjary mpan̈ara-dia Kristy baka, anarô nahazo hatsaran̈a maro amy lafiny jiaby; an̈isan’izen̈y ziô anarô nanjary ten̈a mahay man̈ambara volan̈an’ny Zan̈ahary* sady ten̈a mahay volan̈an’ny Zan̈ahary. 6 Fôtony resy lahatra tsarabe anarô izikoa fa naharen̈y hafatra momba Kristy. 7 Ke vokatran’izen̈y, tsisy tsy anan̈anarô kadô jiaby baka amy Zan̈ahary an̈atin’ny anarô miambin̈y mare ombian̈a Jesosy Kristy Tômpontsika habaribary. 8 Baka iô koa, hataon’ny Zan̈ahary raha hahavy anarô hiôrin̈y tsarabe firaka amy farany, amy zen̈y tsisy olo hahavita han̈ampanga anarô, amin’ny andran’i Jesosy Kristy Tômpontsika. 9 Zan̈ahary tsy mivadiky. Izy nikaiky anarô hifandray marikitry amy Zanany, Jesosy Kristy Tômpontsika.
10 Rahalahy aby, amin’ny an̈aran̈an’i Jesosy Kristy Tômpontsika, zaho mampirisiky anarô hiray sain̈y amy raha volan̈inarô ndreky tsy hisaratsaraka, fa mifen̈a fo hiray sain̈y tsarabe ndreky hitovy hevitry tsarabe. 11 Rahalahiko aby, nisy olo tran̈o araiky amy Kloe nivolan̈a taminaka fa aminarô ao zen̈y misy olo tsy fankahazo. 12 Ty raha tiako havian̈a: Anarô mivolan̈a: “Zaho nin’i Paoly”, na “Zaho nin’i Apolosy”, na “Zaho nin’i Kefasy”,* na “Zaho nin’i Kristy.” 13 Kristy ma misaratsaraka? Izio ma Paoly nivonen̈a tamy pôtô, misy han̈avaotan̈a anarô? Sa anarô natao batisa tamin’ny an̈aran̈an’i Paoly? 14 Zaho man̈ano mersy Zan̈ahary fa tsisy aminarô io nataoko batisa izikoa tsy Krispo ndreky Gaio, 15 amy zen̈y tsisy aminarô hivolan̈a fa anarô natao batisa tamin’ny an̈aran̈anaka. 16 Ia, zaho koa nan̈ano batisa Stefanasy ndreky olo tran̈o araiky aminany. Fa ankoatran’izen̈y, zaho tsy mahazo onon̈o nan̈ano batisa olo hafa ay! 17 Zaho baka tsy nirahin’i Kristy han̈ano batisa fa han̈ambara vaovao tsara, ke zaho tsy nampiasa volan̈an’olo manam-pahaizan̈a, tsao hazofijalian̈an’i* Kristy hanjary tsisy dikany.
18 Fôtony amin’olo ho ripaka, fampianaran̈a* momba hazofijalian̈a* io halifahan̈a; fa amintsika ho voavonjy ndraiky izio angôvon’ny Zan̈ahary. 19 Ty baka raha voasoratra: “Hifoan̈ako fahendrenan’olo misy jery, aviô tsy hikeko* fahaizan̈an’olo marangitry.” 20 Aia olo misy jery? Aia mpanoratra lalàn̈a?* Aia mpiady hevitrin’ny donia ty?* Tsy nataon’ny Zan̈ahary nanjary halifahan̈a ma fahendrenan’ny donia ty? 21 Azon’ny olo amy donia ty matoky fahendrenandrô tômpiny baka, irô nanjary tsy nahay Zan̈ahary. Fa Zan̈ahary ndraiky nan̈aboaka fahendrenanazy, ke ravoravo izy man̈avotro irô olo mino hafatra iritriretin’olo fa halifahan̈a io.
22 Irô Jiosy aby io baka mangataka famantaran̈a, baka iô irô Griky aby io mitsakaraka fahendrena. 23 Fa atsika ndraiky mitory fa Kristy nivonen̈a tamy pôtô. Raha zen̈y baraka amindrô Jiosy aby io, aviô halifahan̈a amindrô firenena aby io. 24 Kanefa amin’olo voakaiky ndraiky, na Jiosy zen̈y na Griky, Kristy io angôvon’ny Zan̈ahary ndreky fahendrenan’ny Zan̈ahary. 25 Fôtony raha karaha halifahan̈a baka amy Zan̈ahary mbala misimisy jery tozay olombelon̈o, aviô raha karaha malemy baka amy Zan̈ahary mbala matanjaka mandilatra olombelon̈o.
26 Fôtony hitanarô rahalahy aby, tamin’izy nikaiky anarô, tsy naro taminarô io ny misy jery eraka fomba fizahavan’olombelon̈o raha,* na mahery, na baka amy fianakavian̈a manan-kaja. 27 Fa Zan̈ahary nifidy raha lefaka amy donia ty amy zen̈y ho men̈atra irô olo misy jery aby io, baka iô Zan̈ahary nifidy raha malemy amy donia ty amy zen̈y ho men̈atra raha matanjaka aby io; 28 aviô Zan̈ahary nifidy raha tsisy dikany amy donia ty ndreky raha tsy asian̈a fôtiny, tsy ino zen̈y fa raha tsisy, baka han̈afoan̈any raha misy, 29 amy zen̈y tsisy olo* hirehareha amason’ny Zan̈ahary. 30 Baka aminany nahavy anarô nanjary mpan̈ara-dia Kristy Jesosy, araiky nitondra fahendrenan’ny Zan̈ahary tamintsika. Zan̈ahary nampiasa Kristy baka atsika ho marin̈y, ndreky ho masin̈y, aviô izy nan̈amia vidim-pan̈avaotan̈a ke nankafaka atsika. 31 Ke eraka raha voasoratra ty: “Lan̈iany olo mirehareha, Jehovah tôkony ho reharehanany.”