Taratasy Faharoe Handeha Amindrô Korintianin̈y aby Io

6 Zahay miaraka miasa aminany, ke zahay mandrisiky anarô koa tsy han̈eky hatsaram-pan̈ahy miavakan’ny Zan̈ahary kanefa han̈adin̈a tanjon̈on’izio. 2 Fôtony ho izy: “Tamy fotoan̈a fan̈aboahan̈a fankasitrahan̈a zaho nitandren̈y anao, aviô tamin’ny andra famonjian̈a zaho nan̈ampy anao.” Iziôty tsarabe fotoan̈a fan̈aboahan̈a fankasitrahan̈a. Iziôty andra famonjian̈a.

3 Zahay tsy han̈ano raha hampalahelo* olo foeky, amy zen̈y tsisy olo han̈amia tsin̈y fanompoan̈a ataonay; 4 fa amy raha jiaby, aboakanay fa zahay mpanompon’ny Zan̈ahary, na amy fiaretan̈a fitsapan̈a maro zen̈y, na amy raha mampiôry, na amy tsy fisian̈a, na amy raha sarotro, 5 na amy popoko, na amy figadran̈a, na amy korontan̈a, na amin’ny asa mafy, na amin’ny alin̈y tsy ahitan̈a tôro, na amy fotoan̈a tsy ihinanan-kanin̈y, 6 na amy fahadiovan̈a, na amy fahaizan̈a, na amy faharetan̈a, na amin’ny hatsaram-pan̈ahy, na amy fan̈ahy masin̈y, na amy fitiavan̈a tsisy fihatsarambelatsihy, 7 na amy fivolan̈ana ny marin̈y, na amy filampian̈a amin’ny angôvon’ny Zan̈ahary; baka amy fitanàn̈a fitaovam-piadivan̈an’ny fahamarin̈ana amy tan̈ana ankavia* ndreky tan̈ana ankavanan̈a,* 8 baka amy fazahoan̈a voninahitry ndreky fahavoazan̈a baraka, na ankaratsian̈a eky zahay na derain̈a. Zahay iritriretin’olo karaha olo mpamitaka in̈y kanefa zahay mivolan̈a ny marin̈y, 9 karaha tsy hay in̈y kanefa ten̈a hay, karaha efa ho foaty* kanefa mbala velon̈o fo, karaha voasazy kanefa tsy vonen̈a,* 10 karaha malahelo kanefa ravoravo fo, karaha masikiny kanefa mampa mpan̈arivo olo maro, baka iô karaha tsisy raha anan̈ana foeky kanefa manan̈a raha jiaby.

11 Zahay koa fa nikoran̈a taminarô, Korintianin̈y aby, tsisy raha nasitrikinay,* aviô fônay nisokafinay miban̈aban̈a. 12 Fitiavanay anarô tsy asianay erany,* fa anarô ndraiky man̈isy erany fitiavanarô zahay. 13 Ke ho valin’ny koran̈a zen̈y, sokafa miban̈aban̈a fônarô. Zaho mivolan̈a aminarô zen̈y karaha mikoran̈a amy zanako.

14 Anarô aza man̈eky han̈ano lazòko araiky* amin’olo tsy mpino. Ino ma ifandraisan’ny fahamarin̈ana ndreky fandikan-dalàn̈a? Na ino ma raha itambaran’ny mazava ndreky mahiziky? 15 Baka iô ino ma ifandraisan’i Kristy ndreky Beliala?* Na ino raha itambaran’olo* mpino* ndreky olo tsy mpino? 16 Aviô, ino ma ifandraisan’ny tempolin’ny Zan̈ahary ndreky sampy? Atsika baka tempolin’ny Zan̈ahary velon̈o; eraka raha nivolan̈in’ny Zan̈ahary ty: “Zaho hiaraka hipetraka amindrô ndreky hiaraka handeha amindrô, baka iô zaho hanjary Zan̈aharindrô, aviô irô hanjary olonaka.” 17 “‘Ke anarô miboaha baka amindrô ao, baka iô anarô misaraha amindrô’, ho Jehovah, ‘aviô aza mikasiky raha maloto eky’”, “‘amy zen̈y zaho handray anarô.’” 18 “‘Zaho hanjary Babanarô, baka iô anarô hanjary zanako lahy ndreky zanako vavy’, ho Jehovah, araiky Farany Mahery.”