Taratasy faharoe handeha amy Timoty
3 Kanefa, ty raha tsara hainao: Amin’ny andra farany ho sarotro mare fiainan̈a, ke tsy ho mora amin’olo hiatriky raha zen̈y. 2 Olo ho tia ten̈a, ho tia vola, ho vantara, han̈ambony ten̈a, ho mpanihitihy, tsy han̈aja raimandreny, tsy hahay hankasitraka, ho mora mivadiky, 3 tsy ho tia havan̈a, tsy mety hifan̈arahan̈a, ho mpan̈aratsy olo, tsy hahafehy ten̈a, hasiaka mare, tsy ho tia ny tsara, 4 ho mpamadiky, hierin̈y olo, ho ngengen̈y, ho tia plezira* fa tsy ho tia Zan̈ahary, 5 aviô an̈arany fo irô mpivavaka fa tsy hita amy fiainan̈andrô aby raha zen̈y. Anao aza minaman̈a amin’olo man̈ano raha aby zen̈y. 6 Sasany amindrô olo aby io mampiasa hafitsian̈a hidiran̈a an-tran̈on’olo, ke fitahindrô lan̈iany man̈angy mora ribiriben̈a sady be fahotan̈a. Irô man̈angy aby io man̈ambela fan̈irian̈andrô tômpiny* hibeko irô, 7 baka iô ndray irô tsy vôly mianatra, tsy honohono ho haindrô foeky ny marin̈y.
8 Karaha nataon’i Jana ndreky Jambra nanohitry Mosesy in̈y, irô olo aby io koa tsy vôly manohitry ny marin̈y. Irô io tsy ankasitrahan’i Zan̈ahary, fôtony irô manohitry fahamarin̈ana inoantsika sady faran-draha ratsy jery eky. 9 Kanefa irô io tsy ho lôso lavitry, fôtony karaha tamy Jana ndreky Jambra in̈y, ho hitan’olo jiaby hadalan̈andrô.* 10 Fa anao ndraiky, narehanao tsarabe raha nampianariko, aviô nalainao tahaka koa fomba fiainan̈anaka, tanjon̈onaka, finoan̈anaka, faharetan̈anaka, fitiavan̈anaka, baka iô fiaretan̈anaka. 11 Hainao fan̈injehan̈a ndreky fijalian̈a nahazo zaho tamy zaho ta Antiokia, ndreky ta Ikonioma, aviô ta Lystra. Ndray zaho niaritry fan̈injehan̈a aby zen̈y, Tômpo nan̈avotro zaho. 12 Ny marin̈y aminany, lan̈iany olo tapa-kevitry han̈ara-dia Kristy Jesosy ndreky tsy hivadiky amy Zan̈ahary tsy maintsy hinjehin̈y. 13 Fa irô olo ratsy fan̈ahy ndreky irô olo mpisandoko aby io ndraiky hahaiho ratsy toetry fo. Irô tsy basiny mamitaka fo fa irô koa mba ho voafitaka.
14 Fa anao ndraiky, aza miala amy raha nampianarin̈y anao ndreky nandrisian̈a lahatra anao ke inoanao. Hainao bakà azôvy aby nampianatra anao raha aby zen̈y. 15 Rango anao mbala hely, anao efa nahay Soratra Masin̈y. Ary baka amy fahaizanao izio mahavy anao misy jery ke ho voavonjy fôtony anao mino Kristy Jesosy. 16 Baka amy Zan̈ahary* aby raha jiaby voasoratra amy Soratra Masin̈y ao, ke izio ilain̈a fôtony izio hampianaran̈a, han̈anaran̈a, han̈itsian̈a ny tsy mety, ndreky hamalavalan̈a* misy han̈anaovan̈a ny marin̈y, 17 amy zen̈y olon’ny Zan̈ahary tsy vitany hahay raha tôkony hatao fo fa ho vôn̈ono* koa han̈ano asa tsara jiaby.