Taratasy faharoe handeha amindrô Tesalônianin̈y aby io
3 Farany, rahalahy aby, aza vôly mivavaka ninay amy zen̈y volan̈an’i Jehovah ho ren̈in’olo farany maro* ary malaky koa, sady hiken’olo ndreky hajaindrô, karaha efa ataonarô. 2 Aviô mivavaha koa baka Zan̈ahary hiaro* zahay amin’olo kafiry ndreky ratsy fan̈ahy, fôtony tsy olo jiaby zay mino aby. 3 Tômpo tsy mivadiky; izy hankafatatra anarô ndreky hiaro anarô amin’olo ratsy fan̈ahy. 4 Zahay matoky fa anarô man̈ano raha nan̈irahanay anarô, sady mbala hanohy han̈ano zen̈y fo. 5 Irarian̈a Tômpo tsy vôly han̈ampy anarô ho tia Zan̈ahary ndreky hiaritry, amy zen̈y anarô hahavita han̈ara-dia Kristy fo.
6 Rahalahy aby, izikoa misy rahalahy tsy man̈eky anarin̈y sady tsy man̈araka raha nampianarinay anarô,* aza mifan̈ôsihôsy aminany;* amin’ny an̈aran̈an’i Jesosy Kristy Tômpontsika ivolan̈anay raha zen̈y. 7 Hainarô tsarabe bakà ino raha tôkony hataonarô baka anarô hahavita hangala tahaka zahay, fôtony tamy zahay taminarô tan̈y, zahay tsy nan̈ano karaha irô olo tsy man̈eky anarin̈y aby io. 8 Zahay tsiary ndraiky nihinan̈a hanin̈in’olo ke tsy nan̈efa. Ndray zahay aby niasa angôvo jiaby, matsan̈a alin̈y, baka tsy hanahiran̈a anarô ke! 9 Zahay manan̈a fahifan̈a hitaky raha aminarô, fa zahay fo tsy man̈ano zen̈y baka zahay han̈ambela ohatra tsara halainarô tahaka. 10 Ia, tamy zahay taminarô tan̈y, ty raha fivolan̈inay aminarô:* “Lan̈iany olo tsy man̈eky hiasa, tsy tôkony hihinan̈a.” 11 Ren̈inay bakà fa olo sasany aminarô tsy man̈eky volan̈iny, aviô irô tsy miasa foeky fa irô midriky amy raha tsy tôkony hidirandrô. 12 Amin’ny an̈aran̈an’i Jesosy Kristy Tômpo, zahay man̈iraka olo karaha zen̈y sady mampirisiky irô hazoto hiasa fa tsy hidriky amy fiainan̈an’olo, aviô hihinan̈a hanin̈y nazondrô baka tamin’ny angôvondrô.
13 Fa anarô ndraiky, rahalahy aby, aza rivan̈a man̈ano ny tsara. 14 Mitandrema amin’olo* tsy man̈araka raha nisoratinay an̈atin’ny taratasy ty, aviô aza mifan̈ôsihôsy* aminany baka izy ho men̈atra. 15 Ndray izy man̈ano zen̈y, anarô aza mihevitry izy ho fahavalo, fa anara fo izy fôtony izy rahalahinarô.
16 Tômpo manan̈a fiadanan̈a, ke irarian̈a izy tsy ho vôly han̈amia anarô fiadanan̈a amy fomba isan-karazany. Aviô irarian̈a Tômpo han̈ampy anarô* jiaby.
17 Zaho Paoly mandefa sambitsara nisoratin’ny tan̈ananaka ty aminarô. Karaha io ataoko mamaran̈a taratasinaka jiaby misy ahaizanarô fa zaho nanoratra irô io.
18 Irarian̈a Jesosy Kristy Tômpontsika han̈aboaka hatsaram-pan̈ahy miavaka aminarô jiaby.