Taratasy Voanalohany Handeha Amindrô Korintianin̈y aby Io

7 Ty valin’ny raha nisoratinarô taminaka in̈y: Tsaratsara amy lelahy tsy mikasiky* man̈angy. 2 Kanefa, azon’ny fijangajangan̈a* efa miparitaka mare, lelahy tsiaraikiaraiky samby tôkony hanan̈a madamonany, aviô man̈angy tsiaraikiaraiky samby tôkony hanan̈a ramosenany. 3 Lelahy manambady tôkony han̈ano adidinany* amy vadiny, baka iô man̈angy manambady tôkony han̈ano karaha zen̈y koa amy vadiny. 4 Man̈angy manambady tsy manan̈a fahifan̈a amy vatan̈anany tômpiny, fa vadiny manan̈a fahifan̈a zen̈y. Karaha zen̈y koa, lelahy manambady tsy manan̈a fahifan̈a amy vatan̈anany tômpiny, fa vadiny manan̈a fahifan̈a zen̈y. 5 Anarô aza misy tsy man̈eky han̈ano adidy amy vadinarô, izikoa tsy raha efa nifan̈araka tsy han̈ano zen̈y an̈atin’ny fotoan̈a voafetra anarô, fôtony anarô tihanaokan̈a fotoan̈a hivavahan̈a. Afaran’izen̈y, anarô tôkony himpody hiaraka ndraiky, tsao fo Satana han̈araraotro tsy fahaizanarô mifehy ten̈a ke hitsapa jery anarô. 6 Ndray izy man̈ano zen̈y, raha nivolan̈iko tiô in̈y tsy didy fa soso-kevitry. 7 Tiako izikoa lelahy jiaby hitovy aminaka. Kanefa, olo tsiaraikiaraiky samby nahazo kadô baka amy Zan̈ahary, ke zen̈y mahavy olo sasany midôko tsy manambady fa sasany ndraiky manambady.

8 Ty raha ambarako amin’olo tsy manambady ndreky amy man̈angy maty vady: Tsaratsara amindrô midôko tsy manambady, karaha zaho. 9 Fa izikoa ndraiky irô tsy mahafehy ten̈a, sitrany irô manambady, fôtony tsaratsara amindrô manambady tozay irô ho resin’ny* fan̈irian̈a mare han̈ano firaisan̈a.

10 Ty torohevitry hamiako olo manambady, kanefa tsy zaho man̈amia izy ty fa Tômpo: Man̈angy tsy tôkony hiala* vadiny. 11 Fa izikoa izy miala, izy tsy tôkony hanambady olo hafa. Izikoa tsy zen̈y, izy tôkony himpody amy vadiny. Aviô koa lelahy manambady tsy tôkony hiala vadiny.

12 Fa ty ndraiky raha koran̈iko amin’olo hafa, tsy Tômpo, fa zaho: Izikoa misy rahalahy araiky manambady viavy tsy mpino ke vadiny io man̈eky hidôko hiaraka aminany, izy tsy tôkony hiala vadiny io; 13 aviô izikoa misy viavy araiky manambady lelahy tsy mpino ke lelahy io man̈eky hidôko hiaraka aminany, izy tsy tôkony hiala vadiny io. 14 Fôtony, baka aminany mahavy lelahy tsy mpino io hamasin̈iny, aviô baka amy rahalahy io mahavy vadiny tsy mpino io hamasin̈iny; izikoa tsy zen̈y, zanakanarô haloto, kanefa irô io ziô masin̈y. 15 Fa izikoa araiky tsy mpino io manapa-kevitry hiala,* ambilà izy hiala. Izikoa zen̈y raha miboaka, rahalahy na ranabavy io tsy voatery hisisiky hiaraka amy vadiny. Zan̈ahary nikaiky anarô misy han̈amezany anarô fiadanan̈a.* 16 Man̈angy manambady, akôry ma ahaizanao izikoa ho vitanao na tsy ho vitanao han̈avotro vadinao? Lelahy manambady, akôry ma ahaizanao izikoa ho vitanao na tsy ho vitanao han̈avotro vadinao?

17 Ndray izy man̈ano zen̈y, ambilà olo tsiaraikiaraiky samby hiain̈y mifan̈araka amy fiainan̈a nambelan’i Jehovah Zan̈ahary hanan̈andrô tamin’izy nikaiky irô. Toromariky zen̈y hamezako fiangonan̈a jiaby. 18 Efa voavositry ma lelahy araiky tamin’izy voakaiky? Tsy tôkony hifoan̈any famosiran̈a natao taminany. Mbala tsy voavositry ma lelahy araiky tamin’izy voakaiky? Izy tsy mila vosirin̈y. 19 Na voavositry na tsy voavositry olo araiky, zen̈y tsisy dikany; fa man̈araka didin’ny Zan̈ahary ny raha ten̈a maventy. 20 Na karakôry na karakôry olo tsiaraikiaraiky tamin’izy voakaiky, ambilà izy hidôko karaha zen̈y. 21 Andevo ma anao tamin’ny anao voakaiky? Anao aza miasaloha amy zen̈y; fa izikoa ndraiky misy fomba mety hampa afaka anao, araraota raha zen̈y. 22 Zay olo andevo tamy Tômpo nikaiky izy, izy hanjary olo afaka sady mpanompon’ny Tômpo. Fa izikoa olo araiky olo afaka tamy Tômpo nikaiky izy, izy mpanompon’i Kristy. 23 Anarô efa voavanga, ke aza man̈eky hanjary mpanompon’olo eky. 24 Rahalahy aby, na karakôry na karakôry olo tsiaraikiaraiky tamin’izy voakaiky, ambilà izy hidôko karaha zen̈y man̈oloan̈a Zan̈ahary.

25 Zaho tsy namezan’ny Tômpo didy momba olo virjiny,* fa zaho ndraiky han̈aboaka hevitrinaka fôtony zaho nan̈aboahan’ny Tômpo famindram-pô sady zaho mafatoky. 26 Fahitako izy, amy fiainan̈a efa sarotro ziôty io, tsaratsara amy lelahy araiky midôko karaha izy ziô. 27 Anao ma lelahy manambady?* Aza mitady fomba hisarahan̈a. Anao ma lelahy tsy manambady? Voleza mitady vady. 28 Kanefa ndray anao manambady, anao tsy manota. Aviô izikoa misy virjiny araiky manambady, izy tsy manota. Ndray izy man̈ano zen̈y, lan̈iany olo manambady hanan̈a fahorian̈a amy nôfotro. Ke tsy tiako havoa anarô raha zen̈y.

29 Ty koa raha ambarako, rahalahy aby: Efa hely fotoan̈a tavela. Ke manomboko ziô, lan̈iany olo manambady tôkony ho karaha olo tsisy vady. 30 Laniany olo mitomoan̈y tôkony ho karaha olo tsy mitomoan̈y. Lan̈iany olo ravoravo tôkony ho karaha olo tsy ravoravo. Lan̈iany olo mivanga tôkony ho karaha olo tsy manan-draha. 31 Aviô lan̈iany olo mampiasa donia ty, tsy tôkony ho karaha rikian̈a mare hampiasa zio; fôtony miovaova raha mandalo amy donia ty.* 32 Tiako izikoa tsisy raha mampiasaloha anarô foeky. Lelahy tsy manambady baka miasaloha amy rahan’ny Tômpo ndreky amy fomba hazahoany rady amy Tômpo, 33 fa lelahy manambady ndraiky miasaloha amy raha amy donia ty ndreky amy fomba hamparavoravoany* madamonany, 34 ke izy voazarazara. Baka iô koa, man̈angy tsy manambady ndreky man̈angy virjiny miasaloha amy rahan’ny Tômpo, amy zen̈y vatan̈anany ndreky jerinany ho masin̈y. Fa man̈angy manambady ndraiky miasaloha amy rahan’ny donia ty ndreky amy fomba hamparavoravoany vadiny. 35 Hahatsara anarô antony hivolan̈ako raha zen̈y, fa tsy handeha hamehifehy* anarô. Zaho tihandrisiky anarô han̈ano raha mendriky ndreky hanohy hanompo Tômpo fo, sady amy zen̈y tsisy raha tôkony handrikian̈a anarô.

36 Izikoa misy olo mieritreritry fa sarotro aminany mifehy ten̈a izikoa izy midôko tsy manambady, aviô izy efa tsy an̈atin’ny fotoan̈a fivilaran’ny fahatanoran̈a eky, ambilà izy han̈ano raha tiany. Izy tsy manota. Ambilà izy hanambady. 37 Izikoa ndraiky olo araiky efa tapa-kevitry an̈atin’ny fônany an̈y sady tsisy raha manery izy, baka iô voafehiny tsarabe fan̈irian̈anany sady tapa-kevitry koa izy an̈atin’ny fônany an̈y fa izy tsy hanambady foeky,* tsara fanapahan-kevitrinany zen̈y. 38 Ke nohon’izen̈y, tsara manambady,* fa mbala tsaratsaran’izen̈y midôko tsy manambady.

39 Voafehy man̈angy araiky izikoa vadiny mbala velon̈o. Fa vadiny ndraiky koa maty, izy afaka manambady lan̈iany olo tiany, fa amy Tômpo ao fo. 40 Kanefa, izikoa hevitrinaka, izy midôko karaha io sambatsambatra tozay izy manambady ndraiky. Zaho matoky tsarabe fa zaho koa mba manan̈a fan̈ahin’ny Zan̈ahary.