Taratasy Faharoe Handeha Amindrô Korintianin̈y aby Io
10 Zaho, Paoly, miangavy anarô baka amy fahalimiam-pan̈ahy ndreky hatsaram-pan̈ahin’i Kristy natà misy aminarô mivolan̈a fa zaho malemy lera zaho ankilanarô, fa masaky mivolan̈a anarô ndraiky zaho lera zaho tsy iô. 2 Zaho man̈anten̈a fa hiova irô olo aby mieritreritry fa zahay man̈araka fomba fisain̈anan’olombelon̈o io, ke zaho tsy voatery han̈asazy irô mare lera zaho avy. 3 Ndray zahay miain̈y amy donia ty,* ady ataonay tsy mitovy amy nin’olo amy donia ty.* 4 Fôtony baka, fitaovan̈a fiadivan̈a indesinay miady tsy erakan’ny nôfotro fa baka amy Zan̈ahary; irô io mahery ke hindesin̈y handravan̈a raha efa miôrin̈y mare. 5 Zahay mandravan̈a fomba fisain̈ana ndreky raha an̈abo jiaby manakana olo tsy hahay Zan̈ahary, aviô kômandìnay han̈eky Kristy aby hevitry jiaby. 6 Zahay vôn̈ono han̈asazy lan̈iany olo tsy man̈araka volan̈a, izikoa fa hita fa anarô ten̈a man̈araka volan̈a ankitin̈y.
7 Anarô koa fa mizaha raha, ambelan̈a fo zahavanarô. Izikoa misy olo resy lahatra fa izy nin’i Kristy, izy tsara mandiniky raha ty ndraiky: Karaha izy koa, zahay koa mba nin’i Kristy. 8 Fa ndray zaho mirehareha mare momba fahifan̈a namezan’ny Tômpo zahay hankahery* anarô fa tsy hampakivy* anarô, tsisy raha tôkony hampamen̈atra zaho. 9 Fôtony tsy tiako izikoa karaha handeha hampavozo anarô in̈y taratasinaka aby io. 10 Misy olo baka mivolan̈a: “Taratasinany aby io mivolan̈a raha matomboko sady mahery, kanefa lera izy iô, izy olo tsisy kabaro aviô tsisy dikany foeky raha volan̈iny.” 11 Tsara ho haindrô olo aby zen̈y fa raha nisoratinay tamy taratasinay aby in̈y tamy zahay tsy tiô, irô in̈y tsarabe raha handeha hataonay zahay koa fa iô. 12 Zahay baka tsy tihampiran̈a ain̈inay amindrô olo miposy ten̈a* aby io, na tihanjary karaha irô. Irô mitsara ain̈indrô arakarakan’ny raha hitandrô fa mety aviô irô samby irô fo mifampitsara, ke hita baka amy zen̈y fa irô tsy misain̈y.
13 Kanefa zahay tsy hirehareha ambelan̈an’ny faritry nanendren̈a zahay, fa an̈atin’ny faritrin’ny faritany nanendren’ny Zan̈ahary zahay* fo, tsy aia zen̈y fa firaka amy tany misy anarô. 14 Ny marin̈y aminany, zahay tsy mila mandeha ambelan̈an’ny faritany nanendren̈a zahay; izikoa zen̈y baka, anarô karaha tsy an̈isan’ny faritaninay in̈y, kanefa zahay edy ny voanalohany navy taminarô tan̈y han̈ambara vaovao tsara momba Kristy. 15 Zahay tsy mirehareha ambelan̈an’ny faritry nanendren̈a zahay na mirehareha amin’ny asa mafy nataon’olo hafa, fa zahay man̈anten̈a fa arakarakan’ny hitombosan’ny finoan̈anarô, hitombo koa asa ataonay amy faritaninay. Amy zen̈y zahay ten̈a hahavita be, 16 ke han̈ambara vaovao tsara amy tany hafa ankoatran’ny aminarô an̈y, baka zahay tsy hirehareha amy raha efa nataon’olo hafa tamy faritaninany tan̈y. 17 “Ndray zen̈y, lan̈iany olo mirehareha, Jehovah tôkony ho reharehanany.” 18 Fôtony tsy araiky miposy ten̈a* ny ankasitrahan̈a, fa araiky derain’i Jehovah.