Vaovao Tsara Nisoratin’i Matio
3 Tafara tatỳ, Jaony Mpan̈ano Batisa nandeha nitory tamy tany paikin’ny Jodia. 2 Ho izy: “Anarô mibibaha, fôtony efa marikitry Fanjakan̈an’ny lan̈itry.” 3 Ny marin̈y aminany, efa Jaony edy izy tian’ny mpaminan̈y Isaia koran̈iny, tamin’izy nivolan̈a: “Zen̈y misy olo mandronton̈o karaha ty baka amy tany paiky an̈y: ‘Amboara lalan̈a handihanan’i Jehovah! Ataova mahitsy lalan̈anany.’ ” 4 Jaony nisikiny lamba vita tamy volovolon’ny shamô, baka iô tamy vanian̈anany nisy saintiry angôzy. Hanin̈inany kijeja ndreky antely* dỳ. 5 Ke olo ta Jerosalema ndreky olo jiaby ta Jodia, baka iô olo jiaby tamy faritry man̈odidin̈y Ten̈aranon’ny Jordany navy hitandren̈y izy. 6 Irô nataony batisa* tamy Ten̈aranon’ny Jordany. Kila olo namaosa fahotan̈anany tamin’olo jiaby tiô.
7 Jaony koa fa nahita Fariseo ndreky Sadoseo marobe nandeha tamy tany nan̈anaovany batisa, ho izy tamindrô: “Taranakan’ny bibilava misy poazon aby ty, azôvy ma nan̈amia hevitry anarô hilefa heloko ho avy? 8 Izikoa zen̈y edy, aboaha amy raha ataonarô fa anarô mibebaka.* 9 Anarô aza mifampitôron̈o karaha ty: ‘Babanay kony Abrahama ay!’ Fôtony zaho man̈ambara anarô fa ndray vato aby io, vitan’ny Zan̈ahary man̈aova irô io hanjary zanakan’i Abrahama. 10 Efa amy fôtotron’ny kakazo iô famaky, ke hitiven̈y lan̈iany kakazo tsy man̈amia voany tsara, baka iô hatsipy an̈atin’ny môtro. 11 Zaho man̈ano batisa anarô amy rano fôtony anarô mibebaka. Fa araiky ho avy afaranaka ndraiky mbala manan̈a fahifan̈a mandilatra zaho. Ndray zaho tsy man̈eva han̈adoso savatinany foeky! Izy han̈ano batisa anarô amy fan̈ahy masin̈y ndreky amy môtro. 12 Efa amy tan̈anany raha handeha hampiasainy hikorôko vary, ke hidioviny tsara tany fikorohany vary. Vary havoriny an̈atin’ny riha, fa angafony ndreky mololo hiroany amy môtro tsy mety maty.”
13 Jesosy baka tiô niala ta Galilia, ke lôso izy nan̈aton̈o Jaony tamy Ten̈aranon’ny Jordany tan̈y, baka izy hataony batisa. 14 Fa Jaony tseky hanakan̈a izy, ho izy: “Zaho edy olo tôkony hataonao batisa ke, anao ndraiky navy aminaka atỳ?” 15 Ho Jesosy taminany: “Ataova fo antsendriky indraikin’ity, fôtony efa zen̈y edy ahavitantsika man̈atanteraka raha marin̈y jiaby.” Ke Jaony efa tsy nanakan̈a izy eky. 16 Niaraka Jesosy vita batisa ke niarin̈y baka tan̈atin’ny rano tao, nibian̈a lan̈itry, baka iô Jaony nahita fan̈ahin’ny* Zan̈ahary, karaha pizon in̈y, nandeha tan̈abon’i Jesosy. 17 Aviô nisy feo koa baka tan-dan̈itry nivolan̈a karaha ty: “Io Zanako, tiako mare izy, sady ten̈a mamparavoravo zaho raha ataony.”