Vaovao Tsara Nisoratin’i Matio
17 Tsiota andra tafaran’izen̈y, nindesin’i Jesosy nitaokan̈a tamy bongo araiky an̈abo mare Petera, aviô Jakoba ndreky Jaony rahalahiny. 2 Niova fahitandrô izy: Saoranany nanjary nazava karaha masoandra, baka iô lambanany* nanjary nangilangilatra* karaha hazavan̈a. 3 Tiô fo irô nahita Mosesy ndreky Elia nikoran̈a taminany. 4 Ke ho Petera tamy Jesosy: “A Tômpo, pare amintsika tsarabe eto. Izikoa tianao, zaho hanangana tran̈olay telo, ke araiky ninao, araiky nin’i Mosesy, baka iô araiky nin’i Elia.” 5 An̈atin’izy mbala nivolan̈a fo, nisy rôndro mangilangilatra nandrakotro irô; baka iô nisy feo baka tamy rôndro io nivolan̈a karaha ty: “Io Zanako, tiako mare izy, sady ten̈a mamparavoravo zaho raha ataony. Tandrin̈esa izy.” 6 Irô mpianatranany aby io koa fa naharen̈y zen̈y, navozo mare irô sady nankôhoko tamy tany. 7 Jesosy baka tiô nan̈aton̈o irô, nikasihiny irô, ke ho izy: “Mitsangàna. Anarô aza mavozo.” 8 Irô koa fa niangana, Jesosy zaraiky fo hitandrô tiô. 9 Tamin’irô nijotso baka tamy bongo in̈y, ho Jesosy tamindrô: “Aza ambara olo raha hitanarô tiô in̈y izikoa tsy efa hatsangana amy maty Zanak’olo.”
10 Fa irô mpianatranany aby io nan̈ontany izy karaha ty: “Nan̈ino fo basy irô mpanoratra lalàn̈a aby io mivolan̈a fa Elia antsendriky tsy maintsy ho avy, zay vo Kristy?” 11 Ho izy tamindrô: “Ho avy ankitin̈y Elia, ke izy han̈ampody raha jiaby amy plasiny. 12 Zaho ndraiky man̈ambara anarô fa Elia efa navy, fa izy fo tsy haindrô, ke nataondrô taminany aby zay raha tiandrô. Karaha zen̈y koa, handeha hampijaliandrô Zanak’olo.” 13 Ke tontohitry irô mpianatranany aby io fa Jaony Mpan̈ano Batisa izy tiany koran̈iny io.
14 Irô koa fa nan̈aton̈o narikitry vahoaka, nisy lelahy nan̈aton̈o Jesosy. Lelahy io nandohaliky sady nivolan̈a: 15 “Mba mamindrà fô amy zanako lahy kony, Tômpo ô! Marary mare izy ao; avoan’ny aretim-bôron̈o baka izy, ke matetiky izy lavo an̈atin’ny môtro, aviô matetiky koa an̈atin’ny rano. 16 Efa nindesiko tamindrô mpianatranao aby io izy, fa tsy vitandrô nampajanga izy.” 17 Fa ho Jesosy: “Taranaka tsisy finoan̈a ndreky ratsy fan̈ahy! Ziska ombian̈a ma zaho tsy maintsy hidôko aminarô eto? Ziska ombian̈a ma zaho tsy maintsy handefitry aminarô? Indesa aminaka atỳ izy.” 18 Demony io nisiahan’i Jesosy, ke izio niboaka baka tamy tsaiky lelahy io. Ke tiô ny iô, tsaiky lelahy io janga. 19 Nan̈aton̈o Jesosy mitaokan̈a irô mpianatranany aby io, baka iô irô nivolan̈a: “Nan̈ino ma tsy vitanay nan̈aboaka zin̈y?” 20 Ho izy tamindrô: “Fôtony anarô hely finoan̈a. Ambarako anarô mazava tsarabe fa, izikoa anarô manan̈a finoan̈a ndray hely fo karaha voan’ny motardy, ke hivolan̈a amy bongo irỳ: ‘Mifindrà arỳ’, izy hifindra edy, baka iô tsisy raha tsy ho vitanarô.” 21——
22 Jesosy ndreky mpianatranany aby io koa fa tafitraotro ta Galilia, ho izy tamindrô: “Hisy olo hamadiky Zanak’olo, ke hanolotro izy am-pelantan̈anandrô fahavalo aby io. 23 Hivonendrô izy, fa afaka telo andra* izy hatsangana.” Ke nalahelo mare irô mpianatranany aby io izikoa fa naharen̈y zen̈y.
24 Irô koa fa navy ta Kapernaomy, irô lelahy mpamory hetra drakma aroe* aby io nan̈aton̈o Petera, ke ho irô taminany: “Mpampianatranarô ma tsy man̈efa hetra?” 25 Ho izy: “Izy man̈efa.” Fa Petera koa fa niditry tan-tran̈o, direkty izy nitantesin’i Jesosy tamy fan̈ontanian̈a aby ty: “Akôry hevitrinao, Simona? Baka amin-jôvy ma azahoandrô mpanjaka ambony tany eto patanty ndreky latety? Baka amy zanakandrô sa baka amin’olo hafa?” 26 “Baka amin’olo hafa”, ho Petera. Ke ho Jesosy taminany: “Dikan’izen̈y, zanaka tsy man̈efa hetra. 27 Fa baka irô tsy ho meloko amintsika, mindao anao mandeha an-dranomasin̈y an̈y, aviô atsipia lelam-bintan̈anao. Alaiva laoko voanalohany azonao, baka iô biafa vavan’ny laoko io, fa ao anao hahita sekely volafotsy* araiky. Alaiva vola io, baka iô ifà hetrantsika roe.”