Taratasy Handeha Amindrô Galatianin̈y aby Io
2 Koa fa afaka 14 taon̈o, zaho nimpody nanonga ta Jerosalema ndraiky niaraka tamy Barnabasy, aviô nindesiko koa Titosy. 2 Zaho nanonga tan̈y, fôtony nisy raha nabaribary taminaka, baka iô nazavaiko tamindrô tsarabe vaovao tsara toriako amin’olo hafa firenena. Raha zen̈y tsy nataoko tamason’olo maro, fa zisty nan̈oloan̈a irô rahalahy hajain̈a mare aby io fo, amy zen̈y azo antoko fa tsy very bôriny lomoay nataoko tamy zen̈y, na efa nataoko taloha. 3 Aviô Titosy, araiky niaraka taminaka in̈y ndray Griky, izy tsy nifaorsen̈a hivosirin̈y. 4 Kanefa raha zen̈y nanjary nampisy prôblemo, fôtony nisy rahalahy sandoko nitsôfotro mangingin̈y handeha hitsikilo atsika. Irô baka tihandrobaka fahafahan̈a anan̈antsika amy maha mpan̈ara-dia Kristy Jesosy atsika, amy zen̈y atsika andivôzindrô tanteraka. 5 Kanefa ndray tan̈atin’ny fotoan̈a fôhiky,* zahay tsy nilefitry tamindrô na nan̈eky irô foeky, amy zen̈y fahamarin̈anan’ny vaovao tsara io tsy hiala aminarô.
6 Fa momba irô rahalahy karaha an̈abo aby io ndraiky,—tsy raha maventy aminaka foeky karakôry irô taloha, fôtony Zan̈ahary tsy man̈avakavaka olo—,* irô rahalahy hajain̈a mare aby io tsy nan̈ambara raha vaovao taminaka. 7 Fa mifanohitry amy zen̈y ndraiky, izikoa fa hitandrô fa zaho nan̈ankin̈ana fitorian̈a vaovao tsara tamin’olo tsy voavositry, karaha nataon’i Petera nan̈ankin̈ana fitorian̈a vaovao tsara tamin’olo voavositry, 8 (araiky nan̈amia Petera fahifan̈a hanjary apôstôlin’olo voavositry fo koa bakà nan̈amia fahifan̈a zaho hanjary apôstôlin’olo hafa firenena) 9 baka iô izikoa fa haindrô fa zaho nan̈aboahan̈a hatsaram-pan̈ahy miavaka, Jakoba ndreky Kefasy* aviô Jaona, tsy azôvy zen̈y fa irô pôtôn’ny fiangonan̈a aby io, nifandray tan̈ana tamy Barnabasy ndreky taminaka, misy han̈aboahan̈a fa zahay jiaby mpiara-miasa; ke zahay nifan̈araka fa zahay roe lahy handeha amin’olo hafa firenena fa irô ndraiky handeha amin’olo voavositry. 10 Fa irô zisty nampahatsiaro zahay fa zahay tsy mila man̈adin̈a irô olo masikiny aby io, ary zen̈y tsarabe raha ifen̈ako mare atao.
11 Kanefa, Kefasy* koa fa navy ta Antiokia, izy nivolan̈iko tamasoamaso,* fôtony hita be fa izy diso. 12 Talohan’ny navian’irô lelahy nirahin’i Jakoba aby io bakà, izy niaraka nihina tamindrô olo hafa firenena aby io; fa irô koa fa navy, vôly izy nan̈ano zen̈y baka iô izy niala tamindrô tiô, fôtony izy navozo irô olo voavositry aby io. 13 Nan̈ary jery* karaha zen̈y koa irô Jiosy hafa aby io, aviô firaka amy Barnabasy mbala voataon̈ondrô han̈ano karaha zen̈y koa. 14 Kanefa izikoa fa hitako fa irô tsy nan̈ano raha mifan̈araka amy fahamarin̈anan’ny vaovao tsara, karaha ty ho zaho tamy Kefasy* man̈oloan̈a irô jiaby: “Ndray anao Jiosy fo man̈ano karaha irô hafa firenena aby io fa tsy karaha Jiosy, ke nan̈ino basy irô hafa firenena aby io faorsenao han̈araka fomban’ny Jiosy?”
15 Atsika ty Jiosy, fa tsy mpanota baka amin’ny hafa firenena, 16 ary haintsika fa tsy baka amy fan̈arehan̈a lalàn̈a han̈ambaran̈a fa marin̈y olo araiky, fa baka amy finoan̈a Jesosy Kristy fo. Ke atsika nino Kristy Jesosy, amy zen̈y atsika handeha hambara fa marin̈y baka amy finoan̈a Kristy, fa tsy baka amy fan̈arehan̈a lalàn̈a,* fôtony tsisy olo* hambara fa marin̈y baka amy fan̈arehan̈a lalàn̈a.* 17 Ke izikoa atsika mba hita fa mpanota, kanefa atsika efa mifen̈y baka atsika hambara fa olo marin̈y baka amy Kristy, zen̈y ma mivolan̈a fa Kristy mpanompon’ny fahotan̈a? Tsy honohono foeky! 18 Izikoa raha efa narongako aby in̈y edy mimpody hatsangako ndraiky, hanjary mpandika lalàn̈a edy zaho. 19 Baka amy fan̈arehan̈a lalàn̈a mahavy zaho maty izikoa lalàn̈a koran̈iny, amy zen̈y zaho velon̈o baka hanompo* Zan̈ahary. 20 Zaho mianton̈o amy pôtô miaraka amy Kristy. Ke efa tsy zaho eky velon̈o, fa Kristy velon̈o sady tafikamban̈a aminaka. Fa zaho mbala nôfotro ziô io, zaho miain̈y mifan̈araka amy finoako Zanakan’ny Zan̈ahary, araiky tia zaho ke nan̈amia ain̈inany han̈avaotan̈a zaho. 21 Zaho tsy nan̈iliky* hatsaram-pan̈ahy miavaka naboakan’ny Zan̈ahary taminaka, fôtony izikoa baka amy fan̈arehan̈a lalàn̈a edy han̈ambaran̈a fa marin̈y olo araiky, dikan’izen̈y tsisy varany nampanaty Kristy.