Taratasy faharoe handeha amy Timoty
2 Ke anao, zanako, aza vôly miangavy Zan̈ahary han̈iraka Kristy Jesosy han̈aboaka hatsaram-pan̈ahy miavaka aminao ndreky han̈amia angôvo anao. 2 Aviô, ampianara irô lelahy mafatoky aby io raha ren̈inao taminaka sady hitan’ny vavolombelon̈o maro, amy zen̈y ho haindrô tsarabe hampianatra olo hafa. 3 Iareta fo zay raha sarotro mandalo, fôtony anao maramilan’i Kristy Jesosy. 4 Izikoa olo araiky tihamparavoravo olo nampiditry izy ho maramila, tsy mety izy eky handeha han̈ano asa hafa.* 5 Aviô lan̈iany olo man̈ano lakorsy* kanefa tsy man̈araka fitsipiky mifehy lakorsy io, izy tsy hahazo lakopy.* 6 Baka iô, izikoa mpambôly araiky niasa mare tamy taninany, rariny izikoa izy ny mangala voanalohany amy vokatra azo. 7 Aza adoso amy jerinao foeky raha volan̈iko aby zen̈y; Tômpo* han̈ampy anao hahazo tsarabe dikan’ny* raha jiaby zen̈y.
8 Alaiva onon̈o fa Jesosy Kristy efa natsangana tamy maty aviô koa izy taranakan’i Davida. Zen̈y vaovao tsara toriako, 9 ary baka amy zio koa mahavy zaho mijaly ndreky migadra, karaha olo nan̈ano raha ratsy in̈y. Kanefa tsisy olo mahasakana volan̈an’ny Zan̈ahary io tsy ho avy amin’olo. 10 Zen̈y mahavy zaho mbala miaritry raha jiaby zen̈y misy hahatsara irô olo voafidy aby io, amy zen̈y irô ho voavonjy fôtony irô mpan̈ara-dia Kristy Jesosy sady hahazo voninahitry mandrakizay. 11 Atokisan̈a volan̈a ty: Izikoa atsika miaraka maty aminany, atsika hiaraka velon̈o aminany koa; 12 izikoa atsika tsy vôly miaritry, atsika hanjary mpanjaka ke hiaraka hitondra aminany; izikoa atsika man̈ano sary tsy mahay izy, izy koa han̈ano sary tsy hahay atsika. 13 Atsika ndray mivadiky, izy tsy mivadiky foeky, fôtony zen̈y tsy fombanany.*
14 Ampahatsiaraova irô fo raha aby zen̈y, aviô anàra* irô baka irô tsy himalo momba volan̈a, fôtony raha zen̈y tsy basiny tsisy dikany fo fa tsy mahatsara olo* mitandren̈y irô koa. 15 Karaha ataon’ny mpiasa araiky tsy men̈atra amin’ny asa tsara vitany in̈y, mifen̈a angôvo jiaby anao misy azahoanao rady amy Zan̈ahary. Aviô mifen̈a mare koa han̈azava Volan̈an’ny Zan̈ahary* amy fomba marin̈y tsarabe. 16 Ialà koran̈a tsisy dikany, fôtony koran̈a karaha zen̈y tsy vitan’ny tsy man̈isy fôtiny raha masin̈y fo fa mahavy olo tsy han̈aja Zan̈ahary koa. 17 Koran̈a karaha zen̈y hiparitaka karaha ataon’ny karazan̈a bay mihinan̈a nôfotro in̈y. An̈isan’olo mpan̈ano koran̈a zen̈y ziô io Hymeneo ndreky Fileto. 18 Irô lelahy aby io niala tamy fampianaran̈a marin̈y, ke irô nivolan̈a fa efa misy zen̈y fitsanganan̈a amy maty. Raha zen̈y nandrobaka finoan̈an’olo sasany. 19 Ndray izy man̈ano zen̈y, mbala miôrin̈y tsarabe fôtotro nataon’ny Zan̈ahary, fôtony izio fatatra. Amy zio ao misy soratra* ty: “Hain’i Jehovah azôvy aby olonany”, aviô “lan̈iany olo mitondra* an̈aran̈an’i Jehovah tsy maintsy miala amy raha ratsy.”
20 Tsy raha vita amy volamena ndreky volafotsy fo raha misy an̈atin’ny tran̈on’olo mpan̈arivo, fa ao koa misy raha vita amy kakazo ndreky tanimanga. Ke sasany amindrô raha aby io fitaovan̈a ampiasain̈a amy raha misy hajany,* fa sasany ndraiky amy raha tsisy hajany.* 21 Izikoa olo araiky miala lavitry irô olo mitovy amy fitaovan̈a tsisy hajany aby io, izy hanjary fitaovan̈a misy hajany, ndreky hamasin̈iny, aviô hahatsara tômpiny, baka iô ho vôn̈ono amin’ny asa tsara jiaby. 22 Iadiva* fan̈irian̈a fohisy* amy tanora. Ataova naman̈a olo tsy mivadiky amy Tômpo* sady manompo izy amy fô madio, ke mifen̈a fo han̈ano ny marin̈y, hanan̈a finoan̈a, ho be fitiavan̈a, ndreky ho tia fihavanan̈a.
23 Ialà koa adihevitry adaladala ndreky tsisy dikany, fôtony hainao fa raha aby zen̈y mampimalo.* 24 Mpanompon’ny Tômpo bakà tsy tôkony himalo* fa tôkony ho tsara fan̈ahy* amin’olo jiaby, hahay hampianatra, hahafehy ten̈a izikoa fa avoa raha tsy rariny, 25 baka iô ho tsara fan̈ahy izikoa fa mampianatra olo tsy mora man̈eky raha ampianarin̈y izy. Zan̈ahary bakà mety han̈ambela irô olo aby io hibebaka* ke ho haindrô tsarabe ny marin̈y. 26 Baka amy fahaizandrô ny marin̈y zen̈y hahavy irô ho tontohitry fa irô efa voataon̈on’ny Devoly han̈ano* sitrapônany, ke irô hitady fomba hialan̈a amy fandrikinany.