Taratasy handeha amy Filemona
1 Baka amy Paoly, araiky migadra fôtony mpan̈ara-dia Kristy Jesosy, ndreky baka amy Timoty rahalahintsika, handeha amy Filemona rahalahy tianay sady miaraka miasa aminay, 2 ndreky amin’i Apia anabavinay, baka iô amin’i Arkipo maramilan’i Kristy karaha zahay, aviô amy fiangonan̈a mivory an-tran̈onao ao:
3 Irarian̈a Zan̈ahary Babantsika ndreky Jesosy Kristy Tômpo han̈aboaka hatsaram-pan̈ahy miavaka aminarô ndreky han̈amia anarô fiadanan̈a.
4 Zaho tsiary tsy man̈ano mersy Zan̈ahary isaka zaho mivavaka momba anao. 5 Ren̈iko bakà fa* anao mino Jesosy Tômpo sady tia izy ndreky tia olo masin̈y jiaby. 6 Zaho mivavaka baka raha inoanao sady inoan’ny mpiara-manompo aminao hahavy anao han̈eky fa maro raha tsara azontsika fôtony atsika mino Kristy. 7 Ten̈a namparavoravo zaho ndreky nankahery zaho naharen̈y fa anao tia irô mpiara-manompo aby io. Raha nataonao bakà, rahalahy, namelombelon̈o fôn’olo masin̈y aby io.
8 Ke ndray zaho afaka man̈amia beko anao han̈ano raha tôkony hataonao, fôtony zaho namezan’i Kristy fahifan̈a amy maha apôstôly zaho, 9 zaho tsy han̈ano zen̈y. Fa zaho miangavy anao, fôtony anao be fitiavan̈a. Zaho bakà* efa matoe sady migadra fôtony zaho mino Kristy Jesosy. 10 Zaho miangavy anao ho tsara fan̈ahy amin’i Onesimosy zanako, fôtony zaho efa nanjary mira babany.* 11 Marin̈y ndraiky fa tsy pare raha nataony taloha, fa raha ataony amy ziôty ndraiky sady mahatsara zaho mahatsara anao. 12 Alefako mody aminao an̈y araiky marikitry fônaka, tsy azôvy zen̈y fa Onesimosy.
13 Zaho io tihitana izy aminaka atỳ, amy zen̈y izy hisolo plasinao ke han̈ampy zaho, amy zaho migadra nohon’ny fitorian̈a vaovao tsara. 14 Fa ndray zen̈y, zaho tsy tihan̈ano raha tsy nazahoan̈a lalan̈a taminao, amy zen̈y tsy forse han̈anaovanao raha tsara fa an-tsitrapô. 15 Mety ty donko nahavy izy tsy tankilanao* hely antsendriky: Amy zen̈y izy ninao mandrakizay, 16 tsy amy maha andevo eky fa mbala mandilatra zen̈y, fôtony izy ziô efa nanjary rahalahintsika. Ia, izy nanjary rahalahiko tiako sady ten̈a valera aminaka, ary mbala mandilatra zen̈y izy aminao, fôtony izy tsy raha andevonao fo fa izy koa mpanompon’ny Tômpo karaha anao. 17 Ke izikoa zaho namanao ankitin̈y, raìsa tsara izy, ke ataova karaha zaho in̈y. 18 Izikoa misy raha ratsy nataony anao, ataova karaha zaho in̈y nan̈ano izy; aviô izikoa misy raha tôkony hifainy aminao, zaho han̈aifa izy. 19 Zaho Paoly foeky manoratra raha ty: Ifaiko raha zen̈y. Ndray zen̈y, aza adin̈a fa be traosanaka aminao, tsy ino zen̈y fa fahin̈ananao lastiô. 20 Ia rahalahy, zaho matoky fa anao han̈ampy zaho, fôtony atsika samby mpanompon’ny Tômpo. Zaho man̈anten̈a fa anao hamelombelon̈o fônaka,* fôtony anao mpan̈ara-dia Kristy.
21 Zaho matoky fa anao tsy hihaozatra,* ke zen̈y hasakiako manoratra aminao io. Haiko bakà fa anao han̈ano mandilatran’ny raha hangatahako aminao. 22 Fa karaha ty koa, sakavy han̈omàn̈a efitry zaho hipitrahako, fôtony zaho man̈anten̈a fa hivaly vavakanarô ke atsika hitraotro ndraiky.*
23 Sambitsara zen̈y anao ho Epafra, rahalahy miaraka migadra aminaka ato fôtony izy koa mba mino Kristy Jesosy. 24 Sambitsara zen̈y koa anao ho Marka, Aristarko, Demasy, ndreky Lioka. Irô jiaby io mpiara-miasa aminaka.
25 Irarian̈a Jesosy Kristy Tômpo han̈aboaka hatsaram-pan̈ahy miavaka aminarô, fôtony anarô manan̈a toe-tsain̈y tsara.