Taratasy Faharoe Handeha Amindrô Korintianin̈y aby Io
5 Haintsika baka fa izikoa hiravan̈iny* tran̈ontsika ambony tany eto, tsy ino zen̈y fa tran̈olay ty, atsika hahazo tran̈o baka amy Zan̈ahary, tran̈o tsy niasain’ny tan̈ana salakady maharitry mandrakizay an-dan̈itry an̈y. 2 Atsika baka mitarain̈y an̈atin’ny tran̈o* ambony tany ty, baka iô atsika man̈iry mare hahazo tran̈o araiky baka an-dan̈itry an̈y in̈y,* tsy ino zen̈y fa tran̈o araiky sikinintsika karaha lamba, 3 amy zen̈y lera atsika misikiny izio, atsika efa tsy hibonginy eky. 4 Mitarain̈y sady matin’ny asaloha baka atsika an̈atin’ny tran̈olay ty, fôtony atsika tsy tihan̈adoso izy ty, kanefa atsika tihisikiny araiky in̈y koa, amy zen̈y araiky mety maty io hatelin̈in’ny fiainan̈a. 5 Tsy azôvy araiky nan̈oman̈a atsika amy raha zen̈y fa Zan̈ahary, aviô izy nan̈amia atsika fan̈ahy hatao debakan’ny* raha mbala ho avy.
6 Ke zahay feno korazy fo baka iô hainay fa zahay koa mbala an̈atin’ny vatan̈a ty fo, zahay mbala tsy amy Tômpo an̈y,* 7 fôtony atsika mandeha amy finoan̈a, fa tsy amy raha hitan’ny maso. 8 Kanefa atsika feno korazy, aviô tiatiantsika izikoa atsika tsy mipetraka amy vatan̈a ty fa miaraka mipetraka amy Tômpo. 9 Ke ndray miaraka mipetraka aminany atsika ndray tsy miaraka mipetraka aminany, atsika mifen̈y fo man̈ano raha mamparavoravo izy. 10 Atsika jiaby io baka tsy maintsy handeha* man̈oloan̈a toeran̈a fitsaran̈an’i Kristy, amy zen̈y olo tsiaraikiaraiky samby hitsarain̈a* arakaraka raha nataony tamin’izy mbala tan̈atin’ny vatan̈a tao, na tsara izio na ratsy.
11 Ke, fôtony hainay fa zahay mila mavozo Tômpo, zahay tsy vôly mandresy lahatra olo baka irô hino raha ampianarinay. Hain’ny Zan̈ahary tsarabe zahay, aviô man̈anten̈a koa zaho fa feon’ny fieritreretan̈anarô nan̈ampy anarô hahay zahay tsarabe.* 12 Zahay io tsy raha midera ten̈a aminarô ndraiky koa, fa zahay mampirisiky anarô hirehareha momba zahay, amy zen̈y anarô afaka hamaly irô olo mirehareha amy raha hita ambelan̈a fa tsy amy raha an̈atin’ny fô. 13 Izikoa baka zahay adala, nin’ny Zan̈ahary; fa izikoa zahay misain̈y tsarabe, ninarô. 14 Fa fitiavan̈an’i Kristy mifaorse* zahay, fôtony ty raha nanjary hainay zahay koa fa nandiniky: Olo araiky naty han̈avaotan̈a olo* jiaby. Samby efa naty aby baka olo jiaby. 15 Ke izy naty han̈avaotan̈a olo* jiaby, amy zen̈y lan̈iany olo velon̈o tsy ho velon̈o nin’ny ain̈indrô tômpiny eky, fa nin’ny araiky efa naty han̈avaotan̈a irô* in̈y sady efa natsangana.
16 Ke manomboko ziô, zahay efa tsy mizaha olo eraka fomba fizahavan’olombelon̈o raha* eky. Ndray zahay taloha nihevitry Kristy eraka fomba fizahavan’olombelon̈o raha,* ziôty ndraiky efa tsy karaha zen̈y fahitanay izy. 17 Ke izikoa misy olo tafikamban̈a amy Kristy, izy zavaboary vaovao. Efa lôso raha taloha, aviô indriô misy raha vaovao. 18 Kanefa baka amy Zan̈ahary aby raha jiaby; izy araiky nampihavan̈a zahay taminany baka tamy Kristy, sady nan̈amia zahay fanompoan̈a fampihavanan̈a, 19 tsy ino zen̈y fa han̈ambara amin’olo fa Zan̈ahary nampiasa Kristy baka donia ty hihavan̈a aminany, ke hadisovan̈andrô nikonteny karaha tsisy in̈y; aviô zahay nan̈ankin̈any fitorian̈a hafatra momba fampihavanan̈a zen̈y.
20 Zahay io ambasadera solon’i Kristy, ke karaha raha mampiasa zahay in̈y Zan̈ahary ikahian̈a olo. Amy maha solon’i Kristy zahay, zahay miangavy anarô: “Anarô mihavàn̈a amy Zan̈ahary!” 21 Araiky tsiary nanota in̈y nataon’ny Zan̈ahary fan̈atitry nohon’ny fahotan̈a* baka hamonjian̈a zahay, amy zen̈y baka aminany hahavy zahay hanjary olo marin̈y man̈oloan̈a Zan̈ahary.