Taratasy Voanalohany Handeha Amindrô Korintianin̈y aby Io
11 Alaiva tahaka zaho, karaha ataoko mangala tahaka Kristy.
2 Zaho midera anarô, fôtony amy raha jiaby, anarô mahatsiaro zaho aviô narehanarô tsarabe toromariky* namezako anarô. 3 Tiako hainarô fa Kristy lohan’ny lelahy jiaby; baka iô lelahy lohan’ny viavy; aviô Zan̈ahary lohan’i Kristy. 4 Lan̈iany lelahy mivavaka na maminan̈y ke mifôn̈o loha, izy man̈ano raha mampamen̈atra lohanany; 5 fa lan̈iany man̈angy mivavaka na maminan̈y ke tsy mifôn̈o loha, izy man̈ano raha mampamen̈atra lohanany, fôtony izy karaha man̈angy nipilàn̈a in̈y. 6 Izikoa man̈angy araiky tsy man̈ano fôn̈oloha, tôkony tapahan̈a fan̈evanany; fa izikoa ndraiky mampamen̈atra izy fôhiky fan̈eva na pila zen̈y, izy tôkony hifôn̈o loha.
7 Lelahy tsy tôkony han̈ano fôn̈oloha fôtony izy endriky ndreky voninahitrin’ny Zan̈ahary, fa man̈angy ndraiky voninahitrin’ny lelahy. 8 Fôtony lelahy tsy baka tamy man̈angy, fa man̈angy baka tamy lelahy. 9 Baka iô koa, lelahy tsy niforôn̈iny nin’ny man̈angy, fa man̈angy ndraiky niforôn̈iny nin’ny lelahy. 10 Zen̈y mahavy man̈angy mila man̈ano marikin’ny fan̈ajan̈a fahifan̈a amy lohanany, nohon’ny amindrô anjely aby io.
11 Kanefa, amindrô mpianatran’ny Tômpo aby io, tsisy man̈angy izikoa tsy tiô lelahy aviô tsisy lelahy izikoa tsy tiô man̈angy. 12 Fôtony karaha ataon’ny man̈angy baka amy lelahy, lelahy koa baka amy man̈angy; fa raha jiaby ndraiky baka amy Zan̈ahary. 13 Alô anarô tômpiny foeky mitsara: Mety ma izikoa man̈angy mivavaka amy Zan̈ahary kanefa izy tsy mifôn̈o loha? 14 Izio ma tsy efa voajanahary fa mampamen̈atra izikoa lelahy lava fan̈eva, 15 fa voninahitry nin’ny man̈angy ndraiky fan̈eva lava? Fan̈evanany baka namezan̈a izy hanaraon̈any lohanany. 16 Fa izikoa misy olo tsy man̈eky zen̈y fa tihan̈araka fomba hafa, zahay tsy manan̈a fomba hafa, ary karaha zen̈y koa fiangonan̈an’ny Zan̈ahary.
17 Fa zaho man̈amia toromariky aby zen̈y tsy midera anarô, fôtony fivorian̈anarô tsy mahatsara anarô, fa mahaimandrobaka anarô fo. 18 Voanalohany antsendriky, ren̈iko fa misy fisaratsarahan̈a zen̈y aminarô ao lera fiangonan̈anarô mivory; ary zaho mino fa misy mahamarin̈y izy raha zen̈y. 19 Tsy maintsy hisy olo hanangana antokom-pinoan̈a* koa aminarô ao, baka hibaribary azôvy aminarô ankasitrahin̈y.
20 Lera anarô mivory amy tany araiky, tsy ten̈a handeha hihinan̈a Sakafo Harivan’ny Tômpo dianarô. 21 Lera anarô mihinan̈a zio baka, sasany aminarô efa baka nihinan̈a hanin̈y hariva, ke misy sasany mosary fa sasany ndraiky mamo. 22 Anarô ma tsisy tran̈o ihinanan̈a ndreky igiahan̈a? Sa anarô tsy man̈isy fôtiny fiangonan̈an’ny Zan̈ahary ke man̈ano raha mampamen̈atra irô olo tsy manan-draha aby io? Ino ma raha handeha hivolan̈iko aminarô? Zaho ma tôkony hidera anarô? Zaho tsy hidera anarô amy raha zen̈y.
23 Ty raha nazoko baka tamy Tômpo ke mba nampianariko* anarô koa: Tamin’ny alin̈y hamadihan̈a Jesosy Tômpo in̈y, izy nangala môfo, 24 baka iô izy koa fa baka nivavaka, nitapahany izio aviô ho izy: “Izy ty manôndro vatan̈anaka* handeha hamezan̈a anarô. Ataova fo ty ho fahatsiaraovan̈a zaho.” 25 Karaha zen̈y koa nataony tamy kôpy, irô koa fa baka nihinan̈a hanin̈y hariva. Ho izy: “Kôpy ty manôndro fifan̈ikian̈a vaovao* miôrin̈y amy lionaka. Ataova fo ty ho fahatsiaraovan̈a zaho, isaka anarô migiaka izy ty.” 26 Fôtony isaka anarô mihinan̈a môfo ty ndreky migiaka amy kôpy ty, anarô tsy vôly man̈ambara nifatesan’ny Tômpo, parapaviany.
27 Ke zay olo mihinan̈a môfo na migiaka amy kôpin’ny Tômpo kanefa tsy vain̈y zen̈y, izy tsy man̈isy fôtiny vatan̈a ndreky lion’ny Tômpo. 28 Ke olo tsiaraikiaraiky tôkony handini-ten̈a tsarabe antsendriky misy ahaizany mety sa tsy mety raha ataony, zay izy vo mihinan̈a amy môfo ndreky migiaka amy kôpy. 29 Fôtony lan̈iany olo mihinan̈a ndreky migiaka kanefa tsy mahay dikan’ny vatan̈an’ny Tômpo, izy mihinan̈a ndreky migiaka fan̈amelohan̈a ain̈inany. 30 Zen̈y antony mahavy maro aminarô malemy ndreky marary, aviô maro koa efa maty.* 31 Fa izikoa ndraiky atsika mahay mandiniky ain̈intsika tsarabe, atsika tsy hitsarain̈a. 32 Kanefa, atsika koa fa tsarain̈a, atsika sazian’i Jehovah, baka atsika tsy ho voaheloko miaraka amy donia ty. 33 Ke anarô koa fa miaraka mivory handeha hihinan̈a raha zen̈y, rahalahiko aby, anarô mila mifampiambin̈y. 34 Izikoa misy olo silaon̈o, izy tôkony hihinan̈a an-tran̈onany an̈y, amy zen̈y anarô tsy ho voaheloko lera anarô miaraka mivory. Fa momba raha hafa ndraiky, lera zaho avy an̈y mandamin̈y irô io.