Taratasy handeha amindrô he Letter to the Filipianin̈y aby io

2 Ke isaka anarô, tsy azôvy zen̈y fa anarô mpan̈ara-dia Kristy, afaka man̈amia korazy olo ndreky afaka man̈amia fankahirezan̈a feno fitiavan̈a, aviô isaka anarô afaka mitady raha mahatsara anarô samby anarô ndreky afaka man̈aboaka fitiavan̈a baka iô mite-pô, 2 ataova raha zen̈y baka zaho ho ravoravo mare. Mifen̈a fo hiray sain̈y, ndreky hifankatia, ndreky hiray hina tsarabe,* aviô hitovy hevitry. 3 Anarô aza tia malo aviô aza man̈ambony ten̈a, fa mifen̈a hanetry ten̈a ke hihevitry olo hafa ho an̈abon̈abo tozay anarô, 4 aviô anarô aza mitady raha mahatsara ain̈inarô tômpiny fo fa, mba tadiava koa raha mahatsara olo hafa.

5 Mifen̈a fo hanan̈a toe-tsain̈y nanan̈an’i Kristy Jesosy ty: 6 Natà izy fan̈ahy karaha Zan̈ahary, tsiary ndraiky nandalo tan̈atin’ny jerinany foeky handrava fahifan̈a zen̈y ke oe hitovy amy Zan̈ahary. 7 Ndray izy aby nahafoe raha jiaby aviô izy nanjary mpanompo ndreky nanjary olombelon̈o.* 8 Tsy zen̈y fo fa, izy koa fa nanjary olombelon̈o, izy nanetry ten̈a ndreky nan̈araka volan̈a ke nan̈eky ho foaty foeky, ia, ho foaty tamin’ny hazofijalian̈a.* 9 Zen̈y tsarabe nahavy Zan̈ahary nampanonga izy amy plasy an̈abon̈abon’ny araiky efa nanan̈any taloha ndreky nan̈amia izy tamy fô jiaby an̈aran̈a an̈abon̈abon’ny an̈aran̈a hafa jiaby, 10 amy zen̈y handohaliky amin’ny an̈aran̈an’i Jesosy aby lohaliky jiaby, na nindrô an-dan̈itry an̈y zen̈y na nindrô ambony tany eto na nindrô ambany tany an̈y, 11 aviô olo* jiaby tôkony han̈eky fa Jesosy Kristy io Tômpo, baka Zan̈ahary Babantsika hahazo voninahitry.

12 Rahalahy ndreky ranabavy tiako aby, anarô efa nan̈araka volan̈a fo letry zay, ary tsy tamy zaho niaraka taminarô fo fa intsaka eky amy zaho tsy ankilanarô ziôty. Fa zaho mbala mampirisiky anarô han̈ano zeny fo, ndreky havozo Zan̈ahary sady han̈aja izy mare,* baka anarô ho voavonjy. 13 Zan̈ahary bakà mankafatatra anarô, eraka ny itiavany izy, ke izy mahavy anarô han̈iry ndreky hanan̈a angôvo han̈anaovan̈a raha. 14 Na ino na ino raha ataonarô, anarô aza min̈on̈on̈o na mimalo, 15 amy zen̈y anarô hadio ndreky tsy hisy tsin̈y, sady hanjary zanakan’ny Zan̈ahary tsisy tsin̈y an̈ivon’ny taranaka maditry ndreky ratsy fan̈ahy. An̈ivon’ny taranaka karaha zen̈y anarô mangilangilatra ke mitondra hazavan̈a amy donia ty, 16 sady mamahan̈a mare amy volan̈an’ny fiainan̈a. Amy zen̈y zaho hanan̈a antony hiravoravoan̈a izikoa fa avy andran’i Kristy, fôtony haiko fa tsy very bôriny lomoainaka ndreky asa mare nataoko. 17 Kanefa, ndray zaho ahidin̈y karaha divain atao fan̈atitry amy sôron̈o ndreky amy fanompoan̈a masin̈y ataonarô, baka amy finoan̈anarô, zaho ravoravo fo sady miaraka ravoravo aminarô jiaby. 18 Karaha zen̈y koa, anarô tôkony ravoravo ndreky miaraka ravoravo aminaka.

19 Zaho io tihandefa Timoty aminarô an̈y atoato, izikoa sitrapôn’i Jesosy Tômpo, amy zen̈y zaho hahazo fankahirezan̈a lera zaho maharen̈y vaovaonarô. 20 Zaho tsy mahita olo manan̈a toe-tsain̈y mitovy amy ninany; izy ten̈a mitady raha mahatsara anarô ankitin̈y. 21 Olo hafa jiaby bakà mitady raha mahatsara ain̈indrô tômpiny fo, fa tsy nin’i Jesosy Kristy. 22 Kanefa, hainarô tsarabe lazan’i Timoty; izy niasa mare niaraka taminaka hampandrosoan̈a vaovao tsara, karaha ataon’ny tsaiky miaraka miasa amy babany in̈y. 23 Ke efa izy edy antin̈aiko halefa aminarô an̈y, miaraka zaho mahay ino raha havoa zaho. 24 Ary zaho matoky fa zaho ho avy aminarô an̈y koa tsy ho ela, izikoa sitrapôn’ny Tômpo.*

25 Fa ziô antsendriky, zaho mila handefa Epafrodito aminarô an̈y. Izy rahalahiko sady miaraka miasa aminaka, aviô maramilan’i Kristy karaha zaho. Izy nirahanarô hanompo zaho ndreky hikarakara raha ilaiko. 26 Ia, zaho mila mandefa izy an̈y fôtony izy efa ten̈a tihahita anarô jiaby; nalahelo mare izy fôtony ren̈inarô fa izy narary. 27 Narary ankitin̈y izy, ary efa tseky naty; fa Zan̈ahary namindra fô taminany, aviô tsy taminany fo fa taminaka koa, baka tsy hisôsoko alahelonaka. 28 Ke, izy halefako aminarô an̈y farany malaky, amy zen̈y ho ravoravo ndraiky koa anarô izikoa fa mahita izy, sady amy zen̈y koa ho kirikiry asalohanaka. 29 Ke raìsa tsarabe izy, karaha fataonarô izikoa fa mandray mpan̈ara-dia Tômpo, ia, raìsa an-karavoan̈a izy, aviô tiava ndreky hajà fo olo karaha izy io, 30 fôtony izy efa tseky naty baka amy fan̈anaovan̈a asan’i Kristy.* Nirisiky ain̈inany izy han̈ampian̈a zaho; anarô bakà tsy eto ke tsy afaka man̈ampy zaho.