Taratasy handeha amindrô Hebreo aby io

13 Mifankatiava fo karaha ataon’olo* kibo araiky. 2 Aza adin̈a foeky fa atsika mila tia mandray vahiny.* Olo sasany bakà nazoto nandray vahiny, ke irô nan̈ano karibo an-tran̈o anjely, kanefa tsy haindrô aby raha zen̈y. 3 Tsaraova namantsika migadra, ke ataova karaha miaraka migadra amindrô in̈y anarô. Tsaraova koa lan̈iany namantsika ampijalian̈a, fôtony anarô koa mba olombelon̈o.* 4 Vadian̈a io tôkony hisy hajany amin’olo jiaby, aviô olo manambady tsy tôkony handiadia vady,* fôtony hisazìn’ny Zan̈ahary lan̈iany olo mpijangajanga ndreky mpandiadia vady. 5 Aboaha amy fomba fiainan̈anarô fa anarô tsy olo tia vola, baka iô mahaiza afa-pô amy raha anan̈anarô.* Karaha ty bakà ho izy: “Zaho tsy hiala anao foeky, aviô tsisy andra foeky han̈ariako anao.” 6 Zen̈y mahavy atsika misy korazy, ke masaky mivolan̈a karaha ty: “Jehovah man̈ampy zaho, ke zaho tsy havozo foeky. Ino ma raha mety ho vitan’olo aminaka?”

7 Tsaraova irô olo mitariky anarô aby io, tsy azôvy zen̈y fa irô olo aby nan̈ambara volan̈an’ny Zan̈ahary taminarô. Diniha tsarabe hatsaran̈a azondrô baka amy fitondran-ten̈a tsarandrô, ke alaiva tahaka finoan̈andrô.

8 Na nomoaly, na niany, Jesosy Kristy tsy miova foeky, ary izy tsy hiova mandrakizay.

9 Anarô aza man̈eky ho voatarikin’ny fampianaran̈a isan-karazany ndreky fampianaran̈a hafahafa. Tsy lalàn̈a momba hanin̈y* bakà ny raha han̈ampy anarô hankafatatra fônarô, fa hatsaram-pan̈ahy miavaka aboakan’ny Zan̈ahary aminarô, fôtony lan̈iany olo mihevitry fa hanin̈y ny ten̈a raha maventy tsy hahazo hatsaran̈a baka amy zen̈y.*

10 Atsika manan̈a alitara, ary irô olo aby man̈ano fanompoan̈a masin̈y amy tran̈olay ao tsy manan̈a zò hihinan̈a raha natao sôron̈o tamy zio. 11 Ny raha misy bakà, lion’ny biby natao sôron̈o koa fa baka nindesin’ny mpisôron̈obe tamy Farany Masin̈y tao, fatin’ny biby natao sôron̈o io niroan̈a tambelan̈an’ny toby. 12 Karaha zen̈y koa fa, Jesosy koa mba nijaly ndreky naty tambelan̈an’ny tanàna,* amy zen̈y olon’ny Zan̈ahary handeha hankamasin̈iny baka amy lionany. 13 Ke alô atsika handeha aminany ambelan̈an’ny toby an̈y, ndreky hiaritry baraka karaha nataony in̈y koa, 14 fôtony atsika eto tsy manan̈a tanàna maharitry, fa atsika miambin̈y* mare araiky mbala ho avy. 15 Nohon’ny atsika mino Jesosy, alô atsika tsy vôly hidera Zan̈ahary ke hampiasa vavantsika* han̈ambaran̈a an̈aran̈anany amin’olo. Raha zen̈y karaha sôron̈o ataontsika aminany. 16 Sôsoko zen̈y, anarô aza man̈adin̈a man̈ano ny tsara ndreky mandrasa raha amin’olo, fôtony sôron̈o karaha zen̈y faran-draha mamparavoravo Zan̈ahary eky.

17 Areha volan̈andrô olo mitariky anarô aby io, baka iô ikia fahifan̈andrô, fôtony irô mitady raha mahatsara* anarô. Sady irô mbala hitsarain̈a arakaraka raha ataondrô. Izikoa anarô man̈ano zen̈y, irô ho ravoravo man̈ano asandrô. Fa izikoa tsy zen̈y, irô hitseky ke ho hisy vokany ratsy aminarô raha zen̈y.

18 Anarô aza vôly mivavaka momba zahay, fôtony zahay matoky fa madio eritreritrinay, aviô zahay tihan̈ano ny marin̈y amy raha jiaby. 19 Fa ty ny raha ten̈a ampirisihiko hataonarô: Mivavaha baka zaho ho tafimpody aminarô an̈y farany malaky.

20 Zan̈aharin’ny fiadanan̈a nanangana Jesosy Tômpontsika tamy maty, tsy azôvy zen̈y fa tsiman̈aja miavaka, araiky nitondra lionanany man̈oloan̈a Izy amy zen̈y fifan̈ikian̈a vaovao io haharitry mandrakizay. Irarian̈a Zan̈aharin’ny fiadanan̈a io 21 hampiasa Jesosy Kristy han̈amezan̈a anarô raha tsara jiaby ilainarô, amy zen̈y anarô hahavita han̈ano sitrapônany ndreky han̈ano raha mamparavoravo Izy. Zan̈ahary vain̈y hamezan̈a voninahitry mandrakizay mandrakizay. Ameny.

22 Rahalahy aby, ty raha ampirisihiko hataonarô: Alaivanarô onon̈o tsarabe volan̈a mankahery aby zen̈y. Sady taratasy nisoratiko aminarô ty tsy lava. 23 Tiako hainarô fa Timoty rahalahintsika in̈y efa nafaka gadra. Ke izikoa izy avy atỳ atoato, zahay hiaraka handeha aminarô an̈y.

24 Sambitsara amin’olo jiaby mitariky anarô ndreky amin’olo masin̈y jiaby. Sambitsara zen̈y anarô, ho irô namantsika aby an’Italỳ atỳ.

25 Irarian̈a anarô jiaby han̈aboahan’ny Zan̈ahary hatsaram-pan̈ahy miavaka.