Taratasy nisoratin’i Jakoba
1 Baka amy Jakoba, mpanompon’ny Zan̈ahary ndreky mpanompon’i Jesosy Kristy Tômpo, handeha amy foko 12 miparitaka amy tany isan-karazany an̈y:
Mbalatsara anarô!
2 Rahalahiko aby, miravoravoa mare anarô koa fa tôjy fitsapan̈a isan-karazany, 3 fôtony hainarô fa anarô koa fa mandalo raha sarotro, mahaifatatra fo finoan̈anarô, ke anarô hahavita hiaritry. 4 Ambilà fiaretan̈a io hankefa asanany, beky anarô ho lavorary sady tsy hisy tsin̈iny amy lafiny jiaby, ke tsy hisy raha tsy ampy aminarô.
5 Izikoa misy olo tsy ampy fahendrena, izy tsy tôkony ho vôly hangataka izio amy Zan̈ahary, fa izy hahazo edy. Zan̈ahary bakà ten̈a mazoto man̈amia raha olo,* aviô izy tsy man̈ady* foeky izikoa misy olo mangataka raha aminany, fa hamezany izy ankitin̈y raha zen̈y. 6 Ia, izy tsy tôkony vôly hangataka sady hatoky fa raha zen̈y hamezan̈a izy, baka iô izy tsy tôkony hisalasala foeky. Lan̈iany olo misalasala bakà mety ampiran̈iny amy daroban-dranomasin̈y hindesin’ny tsiko amy zay tany tiany hampimboan̈a izy. 7 Ny marin̈y aminany, olo karaha zen̈y tsy tôkony han̈anten̈a hahazo raha baka amy Jehovah foeky, 8 fôtony izy olo tsy tapa-kevitry sady miovaova amy raha jiaby ataony.
9 Irarian̈a lan̈iany rahalahy masikiny ho ravoravo,* fôtony izy hamezan’ny Zan̈ahary voninahitry; 10 aviô irarian̈a lan̈iany rahalahy mpan̈arivo ho ravoravo fo ndray ambanian̈a, fôtony izy ho foaty karaha folera an-kiaka in̈y. 11 Masoandra koa bakà fa mipiriaka, mahaimanonga fo hafanan̈a firaka zio man̈ôro, ke mampalazo folera. Felan’ny folera io baka iô miraraka, ke erany iô hatsaran̈anany. Han̈ano karaha zen̈y koa lan̈iany mpan̈arivo tsy vôly mitsakaraka vola ndreky mamory fanan̈ana.
12 Sambatra lan̈iany olo tsy vôly miaritry izikoa fa miatriky fitsapan̈a, fôtony afaran’izen̈y, izy hanjary olo ankasitrahin’ny Zan̈ahary sady hahazo satroboninahitrin’ny fiainan̈a. Zen̈y raha nampan̈antin̈ain’i Jehovah hamezan̈a lan̈iany olo tia izy. 13 Izikoa misy olo mandalo raha sarotro,* izy tsy tôkony hivolan̈a karaha ty: “Baka amy Zan̈ahary raha mahazo zaho ty.” Fôtony Zan̈ahary tsy mety tsapain̈a amy raha ratsy, aviô izy tsy mitsapa olo* amy raha ratsy. 14 Fa tsapain̈a olo tsiaraikiaraiky izikoa fa man̈ambela fan̈irian̈anany tômpiny hibeko izy ke man̈eky ho resin’izio.* 15 Fan̈irian̈a koa fa ambela hitombo an̈atin’ny fô ao, izio mahavy olo araiky hanota,* ke amy farany izio hitariky izy amy fahafatesan̈a.
16 Anarô aza man̈eky ho voafitaka, rahalahiko tiako aby. 17 Baka an-dan̈itry an̈y kadô tsara jiaby ndreky fan̈amezan̈a lavorary jiaby. Ia, irô io baka amy Zan̈ahary Mpamôron̈o,* araiky nampisy hazavan̈a aby amy lan̈itry arỳ. Izy tsy karaha ataon’ny kandindon̈o mifindrafindra plasy,* fôtony izy tsy miovaova. 18 Efa sitrapônany nampisy* atsika tamin’izy nampiasa volan̈an’ny fahamarin̈ana, amy zen̈y atsika hanjary voaloham-bokatra amy raha niasainy.*
19 Ty raha tsara hainarô rahalahiko tiako aby: Olo tsiaraikiaraiky tôkony ho vôn̈ono fo hitandren̈y, fa tsy halaky hivolan̈a, aviô tsy ho mora meloko, 20 fôtony olo araiky koa meloko, izy tsy hahavita han̈ano raha tsara* man̈oloan̈a Zan̈ahary. 21 Ke adosoa aby raha maloto ndreky pôtipôtin’ny haratsiam-pan̈ahy jiaby mbala tavela an̈atin’ny fônarô ao. Baka iô, mifen̈a hanetry ten̈a ke ambilà Zan̈ahary handatsaka volan̈anany an̈atin’ny fônarô ao, fôtony izio mahavita man̈avotro anarô.
22 Anarô tôkony ho mpan̈araka volan̈a fa tsy mpitandren̈y fo, amy zen̈y anarô tsy hamita-ten̈a amin’ny hevi-diso. 23 Izikoa bakà olo araiky zisty mitandren̈y volan̈an’ny Zan̈ahary fo fa tsy man̈araka raha volan̈in’izio, izy miran̈a olo araiky mizaha saoranany amy fitaratra in̈y. 24 Izy mitaratra, kanefa miaraka izy man̈ambôho efa hadin̈any edy nan̈ano akôry izy tao. 25 Fa lan̈iany olo mandiniky tsara lalàn̈a lavorary mankafaka olo io, sady tsy vôly man̈ano raha voakoran̈a ao, izy tsy raha zisty mitandren̈y aviô efa man̈adin̈a edy, fa izy mpan̈araka volan̈a. Ho sambatra izy izikoa man̈ano zen̈y.
26 Izikoa misy olo mieritreritry fa izy mpanompon’ny Zan̈ahary kanefa izy tsy mahafehy vavanany,* izy mamita-ten̈a,* ke tsisy varany fanompoan̈a ataony. 27 Amy Zan̈ahary Babantsika, karaha ty fivavahan̈a madio sady tsisy loto zen̈y: Mikarakara olo kamboty ndreky man̈angy maty vady amy raha manahiran̈a irô, aviô mitandrin̈y fo baka tsy ho voa tasin’ny donia ty.