Taratasy faharoe nisoratin’i Jaona
1 Zaho matoelahy* ty manoratra taratasy handeha amy man̈angy voafidy in̈y ndreky amin’iry zanany. Tiako mare anarô, ary tsy zaho zaraiky fo mankatia anarô fa olo jiaby efa mahay fahamarin̈ana koa, 2 fôtony fahamarin̈ana io an̈atin’ny fôntsika ao, ary izio hidôko ao fo mandrakizay. 3 Zan̈ahary Babantsika ndreky Jesosy Kristy Zanany han̈aboaka hatsaram-pan̈ahy miavaka* amintsika, ndreky hamindra fô amintsika, aviô han̈amia atsika fiadanan̈a. Irô hampianatra atsika raha marin̈y sady hankatia atsika.
4 Ravoravo mare zaho nahay fa sasany amindrô zanakanao aby io man̈araka fahamarin̈ana, eraka didy nazontsika baka tamy Zan̈ahary Babantsika. 5 Ke ty raha angatahako aminao, man̈angy voafidy: Alô atsika jiaby samby han̈ano raha hahavy atsika hifankatia fo. (Raha soratiko aminao io tsy didy vaovao, fa didy efa nazontsika rango tamy voanalohany.) 6 Manan̈a fitiavan̈a atsika izikoa atsika tsy vôly man̈araka didinany. Ty bakà didinany ren̈inarô rango tamy voanalohany in̈y: Anarô tôkony hifankatia fo. 7 Maro mpamitaka amy donia ty, tsy azôvy zen̈y fa irô olo aby tsy man̈eky fa nôfotro ndreky lio i Jesosy Kristy tamin’izy navy tambony tany teto. Irô olo aby zen̈y mpamitaka ndreky antikristy.
8 Anarô mitandrema tsao ho very bôriny vokatran’ny ezaka jiaby nataonay. Mitandrema fo koa, amy zen̈y ho azonarô hatsaran̈a jiaby noman̈in’ny Zan̈ahary ninarô. 9 Izikoa misy olo tsy man̈araka fampianaran̈an’i Kristy fa mampianatra raha hafa, izy tsy ankasitrahan’ny Zan̈ahary. Fa lan̈iany olo tsy vôly man̈araka fampianaran̈an’i Kristy ndraiky ankasitrahan’ny Baba ndreky Zanaka. 10 Izikoa misy olo man̈aton̈o anarô kanefa izy tsy mitondra fampianaran̈a zen̈y, aza atao karibo an-tran̈o izy, baka iô aza atao mbalatsara foeky izy. 11 Lan̈iany olo man̈ano mbalatsara izy bakà mankasitraka raha ratsy ataony.
12 Maro raha tiako koran̈iny aminarô, fa raha aby zen̈y tsy tiako hisoratin̈y amy taratasy ndreky lankra, fôtony zaho man̈anten̈a ho avy aminarô an̈y. Amy zen̈y atsika hikoran̈a mivantan̈a, ke ho ravoravo mare anarô.*
13 Sambitsara zen̈y anao ho irô zanakan’ny rahavavinao aby io. Rahavavinao io koa mba man̈angy voafidy.