Taratasy voanalohany handeha amy Timoty
5 Anao koa fa man̈anatra irô matoelahy aby io, aza volan̈iny mare loatra irô fa ataova karaha anao mivolan̈a amy babanao in̈y. Aviô irô manafolahy aby io ataova karaha rahalahinao. 2 Amy fô madio, irô matoevavy aby io ataova karaha mamanao, aviô irô tsaiky man̈angy aby io ataova karaha anabavinao.
3 Hajà aviô karakaray* irô man̈angy maty vady tsisy ampikarakara aby io. 4 Fa izikoa misy man̈angy araiky maty vady kanefa izy manan-janaka na manan̈a zafy, irô io antsendriky tôkony hifen̈y hikarakara olobendrô io ke hamaly babian̈a izy. Zen̈y bakà han̈aboahandrô fa irô mavozo Zan̈ahary, ary ho ravoravo Izy izikoa irô man̈ano zen̈y. 5 Misy amindrô man̈angy maty vady aby io ndraiky sahiran̈a mare fôtony tsisy ampikarakara foeky. Irô matoky Zan̈ahary, ke irô tsy vôly mivavaka* ndreky miangavy Zan̈ahary han̈ampy irô. 6 Fa lan̈iany man̈angy maty vady ke man̈eram-pô misaoma lavỳ, izy efa mikônty maty ndray izy mbala velon̈o. 7 Ke koràn̈a amindrô fo toromariky aby io, amy zen̈y tsisy raha hivolan̈ana irô. 8 Izikoa misy olo tsy man̈amia raha ilain’olo tôkony ho adidinany, intsaka eky fa fianakavian̈anany, izy efa tsy mino raha inoantsika ke izy mbala ratsiratsin’olo tsy mino.
9 Man̈angy araiky maty vady tôkony hampidirin̈y an̈aty listin’olo mila hampian̈a, izikoa izy 60 taon̈o manonga, tsy nisengy tamy fahavelon̈on’ny vadiny,* 10 malaza nan̈ano asa tsara, nitaiza tsara ry zanany, tia nandray vahiny, nanasa vitin’olo masin̈y, nan̈ampy olo nijaly, baka iô nazoto tamin’ny asa tsara jiaby.
11 Fa, aza ampidirin̈y an̈atin’ny listy io ndraiky viavy maty vady izikoa irô mbala tanora, fôtony izikoa fa tsy voafehindrô fan̈irian̈andrô han̈ano firaisan̈a, irô tihanambady ndraiky. Ke fan̈irian̈andrô zen̈y mety hahavy irô tsy hahavita han̈ara-dia Kristy tsarabe. 12 Ho voasazy irô fôtony irô tsy nitana vava nataondrô tamy voanalohany.* 13 Aviô, irô tsy basiny mandany lerandrô amy raha tsisy dikany fo fa, irô nanjary zatra nitety tran̈on’olo ke irô raha miasa mitsiko olo fo sady miditry amin’ny afaira tsy tôkony hidirandrô ndreky mivolan̈a raha tsy tôkony hivolan̈indrô. 14 Ke, zaho mampirisiky man̈angy maty vady hanambady izikoa izy mbala tanora, ke hiteraka aviô hikarakara taokantran̈onany. Irô koa man̈ano zen̈y, irô fahavalo aby io tsy hahita antony han̈aratsian̈a irô. 15 Misy man̈angy maty vady sasany bakà niala amy lalan̈a mahitsy ke nan̈araka Satana. 16 Izikoa man̈angy kristianin̈y araiky manan̈a havan̈a viavy maty vady, man̈angy io tôkony hikarakara irô. Izikoa izy man̈ano zen̈y, fiangonan̈a tsy ho voatery han̈amia fan̈ampian̈a irô,* fa afaka han̈ampy man̈angy maty vady tsisy ampikarakara.
17 Irô anti-pan̈ahy aby io tôkony hajain̈a mare fôtony irô mahay mitondra fiangonan̈a. Vain̈y zen̈y tsarabe irô, fôtony irô io mifen̈y mare man̈ambara volan̈an’ny Zan̈ahary ndreky mampianatra izio. 18 Karaha ty bakà ho Soratra Masin̈y: “Aza fihezin̈y vavan’ny aomby man̈itsaka vary”; aviô koa ho izy ao: “Mpiasa vain̈y hahazo karamanany.” 19 Izikoa misy olo mivolan̈a fa anti-pan̈ahy araiky nan̈ano fahotan̈a, aza iken̈a volan̈anany zen̈y izikoa tsisy vavolombelon̈o aroe na telo. 20 Izikoa misy olo zatra manota, anàra man̈oloan̈a olo jiaby* izy, amy zen̈y irô olo aby io tsy han̈ano karaha nataony in̈y.* 21 Man̈oloan̈a Zan̈ahary ndreky Kristy Jesosy aviô irô anjely masin̈y* aby io, zaho man̈iraka anao han̈araka irô toromariky namezako anao aby in̈y, sady tsy hitsaratsara olo na han̈avakavaka izikoa fa man̈ano zen̈y.
22 Aza mekimeky manendry olo hanjary mpiandraikitry,* fôtony izikoa san̈atria olo io manota, anao manjary an̈isan’ny tômpin’andraikitry amy raha ratsy ataony. Ke ataova fo raha hahavy anao tsy hisy tsin̈y.*
23 Azon’ny anao marary sarôtro sady matetiky tsy salama, anao aza migiaka rano eky,* fa migiaha divain hely.
24 Raha ratsy nataon’olo* sasany hain’olo jiaby, ke direkty irô tsarain̈a; fa raha ratsy nataon’olo* sasany ndraiky afarafara an̈y vo mibolain̈y. 25 Karaha zen̈y koa fa, izikoa olo araiky man̈ano raha tsara, raha zen̈y ho hain’olo. Ary ndray raha tsara ataony io tsy direkty mibaribary, raha zen̈y tsy avoasitriky fa tsy maintsy ho hay fo.