Taratasy faharoe handeha amy Timoty
1 Baka amy Paoly, araiky nifidin’ny Zan̈ahary hanjary apôstôlin’i Kristy Jesosy, sady nirahan̈a han̈ambara momba fiainan̈a nampan̈antinain̈a atsika baka tamy raha nataon’i Kristy Jesosy, 2 handeha amy Timoty, zanako tiako:
Irarian̈a Zan̈ahary Babantsika ndreky Kristy Jesosy Tômpontsika han̈aboaka hatsaram-pan̈ahy miavaka aminao, ndreky hamindra fô aminao, aviô han̈amia anao fiadanan̈a.
3 Zaho man̈ano mersy Zan̈ahary, tsy azôvy zen̈y fa araiky han̈anaovako fanompoan̈a masin̈y amy feon’ny fieritreretan̈a madio, karaha nataondrô dadilahibeko taloha tan̈y. Zaho mahatsiaro anao fo isaka zaho mivavaka ke miangavy Zan̈ahary matsan̈a alin̈y. 4 Isaka zaho mahatsiaro anao nitomoan̈y in̈y, zaho tihahita anao fo. Zaho bakà ho ravoravo mare koa mahita anao. 5 Azoko onon̈o bakà fa anao ten̈a manan̈a finoan̈a ankitin̈y,* karaha Loïsa dadinao ndreky Eonìka mamanao. Ary azoko antoko fa anao mbala karaha zen̈y fo firaka ziôty.
6 Ndray izy man̈ano zen̈y, ty raha hampatsiarôviko anao: Karaha ataon’ny môtro mizelazela* in̈y, ataova fo raha hampizelazela kadô namezan’ny Zan̈ahary anao, araiky nazonao tamy zaho nametra-tan̈ana taminao in̈y. 7 Fôtony fan̈ahy masin̈y namezan’ny Zan̈ahary atsika io tsy mahavy atsika havozo, fa mahavy atsika ho hisy korazy,* ndreky hanan̈a fitiavan̈a, aviô hahay handiniky. 8 Ke anao aza men̈atra mitory momba Tômpontsika,* aviô anao aza men̈atra aminaka ndray zaho migadra fôtony zaho mpan̈ara-dia izy. Anao mila vôn̈ono hiaritry raha sarotro nohon’ny vaovao tsara; matokisa fa Zan̈ahary han̈amia anao angôvo hiatrefan̈a raha aby zen̈y. 9 Izy nan̈avotro atsika ndreky nikaiky atsika baka atsika hanjary olonany masin̈y. Tsy baka amy raha nataontsika nahavy izy nikaiky atsika, fa izy tihan̈aboaka hatsaram-pan̈ahy miavaka amintsika, ary efa zen̈y lastiô sitrapônany. Ia, efa ela mare izy nampiasa Kristy Jesosy han̈aboahan̈a hatsaram-pan̈ahy miavaka io amintsika. 10 Ary mibaribary tsarabe hatsaram-pan̈ahinany miavaka zen̈y tamin’izy nandefa Mpamonjy, tsy azôvy zen̈y fa Kristy Jesosy, handeha ambony tany eto. Jesosy nan̈afoan̈a fahafatesan̈a; aviô tamin’izy nan̈ambara vaovao tsara, nambarany mazava tsarabe akôry hatao hazahoan̈a fiainan̈a ndreky akôry hatao hazahoan̈a vatan̈a tsy mety lò zen̈y. 11 Handeha han̈ambara vaovao tsara io antony nahavy Zan̈ahary nanendry zaho* hanjary mpitory ndreky apôstôly baka iô mpampianatra.
12 Zen̈y mahavy zaho miaritry. Fa ndray izy man̈ano zen̈y, zaho tsy men̈atra fôtony haiko tsarabe azôvy Zan̈ahary inoako io, aviô zaho matoky tsarabe fa izy hiaro raha jiaby nankin̈iko taminany, parapavian’ny andra fitsaran̈a. 13 Areha fo raha nampianariko anao aby in̈y fôtony irô in̈y marin̈y,* baka iô aboaha fo fa anao manan̈a finoan̈a ndreky fitiavan̈a fôtony anao mpan̈ara-dia Kristy Jesosy. 14 Araova raha jiaby* nankin̈iny taminao, fa fan̈ahy masin̈y* han̈ampy anao han̈ano zen̈y.
15 Efa hainao fa olo* jiaby amy faritanin’i Azia an̈y niala zaho, an̈isan’izen̈y Figelosy ndreky Hermozeny. 16 Irarian̈a Tômpo* han̈aboaka hatsaram-pan̈ahy amy fianakavian̈an’i Onesiforosy, fôtony matetiky izy nan̈ampy ndreky nankahery zaho.* Aviô, izy tsy nen̈atra foeky namangy zaho ndray zaho nigadra.* 17 Ndray izy aby, tamin’izy ta Roma teto, izy tsy vôly nitsakaraka zaho, ndraiky farany izy nahita zaho. 18 Irarian̈a Jehovah Tômpo han̈aboaka hatsaram-pan̈ahy aminany, amin’ny andra zen̈y. Maro raha nataony han̈ampian̈a zaho ta Efesôsy tan̈y, ary hainao tsarabe raha zen̈y.