Taratasy Faharoe Handeha Amindrô Korintianin̈y aby Io
4 Ke zahay tsy rivan̈a, fôtony zahay manan̈a fanompoan̈a zen̈y nohon’ny famindram-pô naboaka taminay. 2 Efa nialanay raha mampamen̈atra ndreky asitrisitriky, aviô zahay tsy mamitaka ndreky tsy mandiso volan̈an’ny Zan̈ahary; fa zahay man̈ambara ny marin̈y, ke zahay manjary ohatra tsara amin’olombelon̈o* jiaby, amason’ny Zan̈ahary. 3 Izikoa baka vaovao tsara ambaranay io tsy mazava karaha raha misy lamba manaron̈o in̈y, amin’olo haripaka fo zio tsy mazava. 4 Zan̈aharin’ny donia ty* nan̈ajamba jerindrô olo tsy mpino aby io, amy zen̈y hazavan̈an’ny vaovao tsara be voninahitry, tsy ino zen̈y fa vaovao tsara momba Kristy, araiky endrikin’ny Zan̈ahary in̈y, tsy hangilangilatra amindrô. 5 Zahay baka tsy mitory momba zahay, fa zahay mitory fa Jesosy Kristy io Tômpo, aviô zahay mpanomponarô nohon’ny amy Jesosy. 6 Zan̈ahary baka efa nivolan̈a: “Hazavan̈a io hangilangilatra an̈atin’ny hiziky.” Aviô baka amy saoran’i Kristy, nataon’ny Zan̈ahary mangilangilatra an̈atin’ny fônay ao hazavan̈anany be voninahitry, tsy ino zio fa fahaizan̈a Izy.
7 Kanefa, zahay manan̈a harian̈a zen̈y an̈atin’ny vilan̈y tany,* amy zen̈y ho hita fa baka amy Zan̈ahary angôvo mihoatran’ny mahazatra hanan̈anay io fa tsy baka aminay. 8 Zahay avoasery amy lafiny jiaby, kanefa zahay tsy poetsiky ke tsy oe tsy afaka mihetsiky. Zahay very hevitry, kanefa tsy raha tsisy lalan̈a iboahan̈a foeky.* 9 Zahay injehin̈y, kanefa tsy hafoe; zahay atreky, kanefa tsy maty. 10 Zahay efa kalikaly ho foaty, fôtony zahay tsy vôly miatriky ny mafy karaha nataon’i Jesosy; amy zen̈y ho hita fa miran̈a amy raha niain̈an’i Jesosy koa raha iain̈anay.* 11 Ia, zahay velon̈o, kanefa zahay tsy vôly miatriky raha mety hamono zahay, fôtony zahay mpan̈ara-dia Jesosy; amy zen̈y ho hita fa miran̈a amy raha niain̈an’i Jesosy koa raha iain̈anay.* 12 Ke fahafatesan̈a miasa an̈atinay ao, fa fiainan̈a ndraiky miasa an̈atinarô ao.
13 Kanefa zahay koa mba manan̈a finoan̈a* mitovy amin’ny araiky voasoratra ty: “Zaho nino, ke zaho nivolan̈a.” Zahay koa mba mino, ke zen̈y mahavy zahay mivolan̈a. 14 Hainay baka fa Araiky nanangana Jesosy tamy maty in̈y mba hanangana zahay koa baka zahay hiaraka amy Jesosy, aviô Izy han̈aboaka zahay man̈oloan̈a izy miaraka aminarô. 15 Hahatsara anarô antony han̈anaovan̈a raha jiaby zen̈y, beky hahaihitombo fo hatsaram-pan̈ahy miavaka efa marobe io, fôtony mahaimaro fo olo man̈ano mersy han̈amezan̈a voninahitry Zan̈ahary.
16 Ke atsika tsy rivan̈a, fôtony ndray mahai-aosa atsika izikoa zahavan̈a baka ambelan̈a,* azo antoko fa isan’andra havaozin̈y fo atsika an̈atintsika ao.* 17 Fôtony ndray mielan̈a ndreky mahivan̈a fitsapan̈a* iaretantsika io, izio mitondra voninahitry amintsika, ia, voninahitry maventy* lavitry sady mandrakizay. 18 Ke masontsika hafantokontsika amy raha tsy hita, fa tsy amy raha hita; fôtony raha hita io mielan̈a fo, fa raha tsy hita ndraiky maharitry mandrakizay.