Taratasy faharoe handeha amy Timoty
4 Kristy Jesosy hitsara ny velon̈o ndreky ny maty lera izy manjaka amy Fanjakan̈anany ndreky habaribary; ke man̈oloan̈a izy ndreky man̈oloan̈a Zan̈ahary, ty raha hampirisihiko hataonao: 2 Ambarà volan̈an’ny Zan̈ahary. Ndray mora raha mandalo ndray sarotro, aza mangatak’andra foeky man̈ambara izio; ahitsia lan̈iany olo tôkony hahitsy, anàra mare lan̈iany olo tôkony hanarin̈y, ameza korazy lan̈iany olo tôkony hamezan̈a korazy. Anao koa fa man̈ano zen̈y, anao mila mahari-draha ndreky mahay mampianatra. 3 Fôtony ho avy fotoan̈a, olo tsy hitandren̈y fampianaran̈a marin̈y.* Irô han̈ano raha tiandrô, ke irô hitsakaraka mpampianatra hivolan̈a amindrô raha tiandrô ho ren̈y.* 4 Irô efa tsy hitandren̈y fampianaran̈a marin̈y eky, fa hitandren̈y tantara tsy marin̈y. 5 Fa anao ndraiky aza man̈ano karaha zen̈y. Amy fotoan̈a jiaby, aboaha fo fa anao mahay mandiniky, iareta raha sarotro mandalo, aza vôly mitory* vaovao tsara, baka iô ataova tsara fanompoan̈anao.
6 Zaho io efa ahidin̈y karaha divain atao fan̈atitry, aviô efa marikitry fotoan̈a hifatesako.* 7 Vitako tsarabe niaro raha inoako.* Efa vitako firaka am-parany koa lomoainaka, baka iô zaho tsy niala tamy raha marin̈y nampianarin̈y atsika salakady inoantsika. 8 Tômpo koa fa mitsara, izy man̈ano ny rariny. Izy efa vôn̈ono han̈amia kadô zaho, tsy ino izio fa satroboninahitry. Ary amin’ny andra zen̈y, tsy zaho fo handeha hamezany satroboninahitry io fa lan̈iany olo konten’ny Zan̈ahary fa marin̈y ndreky man̈anten̈a fa Tômpo handeha habaribary.
9 Ataova zay fomba havianao aminaka atỳ farany malaky. 10 Kreska bakà lôso a Galatia, aviô Titosy lôso a Dalmatia. Tsy basin’izen̈y fa, Demasy niala zaho ke lôso a Tesalônìky an̈y, fôtony izy tia donia ty.* 11 Ke Lioka zaraiky fo aminaka atỳ. Aviô koa, indesa miaraka aminao baka ao i Marka, fôtony izy ilaiko amy fanompoan̈anaka. 12 Fa anao aza miasaloha momba irô a Efesôsy an̈y, fôtony Tykiko efa nalefako an̈y. 13 Lera anao mandeha atỳ kony, indesa lambanaka* nambelako amy Karpo a Troasy an̈y in̈y. Aviô koa, indesa horonam-boky aby an̈y, intsaka eky fa irô horonam-boky vita amin’ny angôzy aby in̈y.
14 Maro raha ratsy nataon’i Aleksandra mpanefy varahin̈y in̈y taminaka. Jehovah hamaly izy amy raha jiaby nataony. 15 Anao koa mitandrema aminany in̈y, fôtony izy hitanao in̈y nanohitry mare hafatra nindesinay.
16 Tamy zaho voanalohany nan̈ambara fiaraovan-ten̈anaka, tsisy olo navy niaro zaho. Ia, irô jiaby niala zaho. Ndray izy man̈ano zen̈y, anò Zan̈ahary han̈ambela hadisovan̈andrô. 17 Fa Tômpo ndraiky nitsangana tankilanaka sady nan̈amia angôvo zaho, amy zen̈y ho vitako tsarabe han̈ambara volan̈an’ny Zan̈ahary, ke haharen̈y izio aby firenena jiaby. Izy nan̈avotro zaho baka tamy vavan’ny lion. 18 Aviô izy han̈avotro zaho amy raha ratsy jiaby, beky zaho ho tafiditry amy Fanjakan̈anany an-dan̈itry an̈y. Irarian̈a izy hahazo voninahitry mandrakizay mandrakizay. Ameny.
19 Sambitsara amin’i Akoïla ndreky Priskà,* aviô sambitsara koa amy fianakavian̈an’i Onesiforosy.
20 Erasto nidôko a Korinto, fa Trofimo ndraiky nambelako a Mileto an̈y fôtony izy narary. 21 Ataova zay fomba havianao atỳ alohan’ny ririn̈iny.
Sambitsara zen̈y anao, ho Eobolo, ndreky Poda, ndreky Lino, ndreky Klôdia, aviô ho rahalahy jiaby.
22 Irarian̈a Tômpo hitahy anao fôtony anao manan̈a toe-tsain̈y tsara! Irarian̈a anarô han̈aboahany hatsaram-pan̈ahy miavaka!