Taratasy Faharoe Handeha Amindrô Korintianin̈y aby Io
12 Zaho tsy maintsy mirehareha. Ndray tsisy tombony azoko baka amy zen̈y, zaho hikoran̈a momba fahitan̈a mahagaga baka amy Tômpo ndreky raha nabaribariny taminaka. 2 Zaho mahay lelahy araiky zay tafikamban̈a amy Kristy; 14 taon̈o lôso zay izy nindesin̈y tamy lan̈itry fahatelo.—Tsy haiko eky na tan̈atin’ny vatan̈a na tsy tan̈atin’ny vatan̈a, fa Zan̈ahary mahay.— 3 Ia, haiko lelahy zen̈y.—Tsy haiko eky na tan̈atin’ny vatan̈a na tsy tan̈atin’ny vatan̈a, fa Zan̈ahary mahay.— 4 Izy nindesin̈y tamy paradisa, aviô izy naharen̈y volan̈a tsy tôkony hivolan̈iny amin’olo sady tsy nimboan̈a volan̈in’olo. 5 Zaho hirehareha momba lelahy zen̈y, fa zaho tsy hirehareha momba ain̈inaka izikoa tsy raha momba fahalimian̈anaka fo. 6 Fa ndray zaho tihirehareha, zaho tsy raha tsy misain̈y fa zaho hivolan̈a ny marin̈y. Kanefa zaho mitana ten̈a tsy han̈ano zen̈y, amy zen̈y irô tsy hieritreritry fa zaho nahavita mandilatran’ny raha hitandrô nataoko na ren̈indrô nivolan̈iko, 7 zisty baka tamy raha nabaribary taminaka aby in̈y fo.
Baka zaho tsy han̈ambony ten̈a loatra, nasian̈a fatsiky amy nôfotronaka, tsy ino zen̈y fa anjelin’i Satana, baka izio tsy vôly hamango* zaho, amy zen̈y zaho tsy han̈ambony ten̈a loatra. 8 Intelo aby zaho niangavy Tômpo momba izio baka izio hadosony aminaka. 9 Fa ho izy taminaka: “Efa ampy anao hatsaram-pan̈ahy miavaka aboakako aminao, fôtony lera anao malemy, hiasa amy fomba lavorary an̈atinao ao angôvonaka.” Ke hirehareha zaho amy fahalimian̈anaka, amy zen̈y angôvon’i Kristy io hanaron̈o zaho fo, karaha ataon’ny tran̈olay in̈y. 10 Ke zaho ravoravo ndray manan̈a fahalimian̈a, tihitihin̈a, an̈atin’ny tsy fisian̈a, injehin̈y, ndreky miatriky raha sarotro, nohon’ny amy Kristy. Fôtony lera zaho malemy, amin’in̈y zaho matanjaka.
11 Zaho efa nanjary tsy misain̈y. Anarô nifaorse zaho hanjary karaha zen̈y, fôtony anarô tôkony nivolan̈a raha tsara momba zaho. Ndray zaho tsisy dikany baka, tsisy raha foeky man̈aporofo fa zaho ambanimbany tozay irô apôstôlinarô tsara loatra aby io. 12 Ia, naboakako anarô tsarabe porofo fa zaho apôstôly: Tamy fiaretan̈a mare, tamy famantaran̈a, tamy fahagagan̈a, aviô tamy raha miavaka. 13 Izio ma baka tamy zaho tsy nanjary entan̈a mavesatra taminarô* mahavy anarô mahatsiaro maty antoko izikoa ampiran̈iny amy fiangonan̈a hafa? Izikoa zen̈y, man̈ano azafady aminarô zaho amin’ny hadisovan̈a zen̈y ay!
14 Hitanarô! Fan̈intelony amy ty zaho vôn̈ono handeha aminarô an̈y, ary zaho tsy hanjary entan̈a mavesatra aminarô.* Tsy fanan̈ananarô baka raha tadiaviko, fa anarô; fôtony zanaka tsy tôkony hamory nin’ny raimandreny, fa raimandreny tôkony hamory nin’ny zanaka. 15 Izikoa zaho fo, ravoravo zaho han̈amia anarô raha jiaby anan̈ako, firaka amy fiainan̈anaka jiaby. Izikoa anarô tiako mare be karaha zen̈y, tôkony ho helihelin’izen̈y ma fitiavanarô zaho? 16 Kanefa ndray zen̈y, zaho tsy nampitondra entan̈a mavesatra* anarô. Fa anarô ndraiky mivolan̈a fa zaho “fetsy”, aviô “tamy fitaka” nazahoako anarô. 17 Zaho ma ndraiky nan̈araraotro anarô tamy zaho nan̈iraka olo taminarô tan̈y? 18 Zaho nampirisiky Titosy handeha aminarô an̈y, aviô rahalahy araiky in̈y nirahiko niaraka taminany. Titosy ma nan̈araraotro anarô? Aha, izy tsy nan̈ano zen̈y foeky. Tsy nitovy ma toe-tsain̈inay? Tsy nitovy koa ma fomba fiasanay?
19 Anarô ma mieritreritry ela jiaby zay fa zahay miaro ten̈a man̈oloan̈a anarô? Man̈oloan̈a Zan̈ahary zahay mivolan̈a, amy maha mpan̈ara-dia Kristy zahay. Raha jiaby nataonay baka, rahalahy ndreky ranabavy tianay aby, irô in̈y nataonay baka hankahery anarô. 20 Mavozo baka zaho tsao lera zaho avy aminarô an̈y, tsy ho eraka raha iriko raha ataonarô aviô tsy eraka raha irinarô raha ataoko. Ia, mavozo zaho tsao aminarô an̈y misy ady, olo be fô, heloko tsy voafehy, ankany, fan̈aratsian̈a, tsikotsiko,* olo poerapoera, ndreky korontan̈a. 21 Lera zaho mimpody an̈y donko, Zan̈aharinaka hangala baraka zaho man̈oloan̈a anarô, ke zaho tsy maintsy halahelo nohon’ny amindrô olo marobe nanota taloha aby in̈y kanefa tsy nibebaka tamy raha tsy manjary nataondrô, tsy ino zen̈y fa fahalotoan̈andrô ndreky fijangajangan̈andrô* aviô fitondran-ten̈andrô tsisy hen̈amaso.*