Taratasy Voanalohany Handeha Amindrô Korintianin̈y aby Io
4 Mpanompon’i* Kristy ndreky mpanompo mikarakara sekire masin̈in’ny Zan̈ahary tôkony hiheveran’olo zahay. 2 Ke mpanompo atokisan̈a karaha zen̈y antinain̈a fa tsy hivadiky. 3 Izikoa zaho, tsy mampan̈ino zaho foeky na anarô na tribinalin’olombelon̈o mandiniky raha momba zaho. Ny marin̈y aminany baka, na zaho tômpiny fo tsy mandiniky raha momba zaho. 4 Tsy hitako baka hadisovan̈anaka. Fa zen̈y ndraiky tsy mivolan̈a fa zaho marin̈y. Jehovah mandiniky zaho. 5 Ke parapavian’ny Tômpo, aza mitsara raha foeky alohan’ny fotoan̈a voatôndro, na ino zen̈y na ino. Haboakany amy mazava raha misitriky an̈atin’ny hiziky an̈y, aviô hafaosany raha an̈atin’ny fôn’olo tsiaraikiaraiky, amy zen̈y irô samby hahazo dera baka amy Zan̈ahary.
6 Rahalahy aby, zaho nivolan̈a raha aby zen̈y momba zaho ndreky Apolosy baka anarô hahazo hatsaran̈a, ndreky hianaranarô fitsipiky ty baka aminay: “Aza mihoatran’ny raha voasoratra”, amy zen̈y anarô tsy hipoerapoera ke hihevitry fa olo araiky an̈abon̈abo tozay olo araiky hafa. 7 Ino ma raha* tsy mampitovy anao amin’olo hafa? Ia, ino ma raha anan̈anao ke tsy namian̈a anao? Ke izikoa izio namezan̈a anao, nan̈ino fo anao mipoera karaha raha tsisy nan̈amia in̈y?
8 Anarô ma efa afa-pô? Anarô ma efa mpan̈arivo? Anarô ma efa nanomboko nanjaka kanefa tsy niaraka taminay? Zaho man̈iry mare baka anarô efa manomboko mitondra amy maha mpanjaka, amy zen̈y koa zahay ho afaka hiaraka hanjaka aminarô. 9 Fahitako izy baka, zahay apôstôly ty ny olo farany nalefan’ny Zan̈ahary an̈abon’ny sehatra, karaha olo voaheloko ho foaty in̈y, fôtony zahay nanjary tantara an-tsehatra hizahavan’ny donia ty ndreky anjely baka iô olo. 10 Baka amy Kristy baka mampa adala zahay ty, fa anarô ndraiky misy jery amy Kristy ao. Zahay malemy, fa anarô ndraiky matanjaka. Anarô ny amezan̈a voninahitry, fa zahay ndraiky alain̈a baraka. 11 Firaka ziôty, zahay mbala mosary, tihigiaka, an̈arany misikiny,* popòn̈a,* tsisy tran̈o pitrahan̈a, 12 ndreky miasa mare mampiasa tan̈ananay. Zahay koa fa tihitihin̈a, zahay mirary ny meva; zahay koa fa injehin̈y, zahay mifen̈y fo miaritry; 13 izikoa fa misy olo man̈odihody zahay amy raha tsy nataonay, zahay mamaly amin-katsaram-pan̈ahy.* Firaka ziô, zahay nanjary karaha fakon’ny* donia ty, ndreky raha mampangaroharo fiaraha-monin̈y.
14 Zaho manoratra raha aby zen̈y tsy raha tihampamen̈atra anarô, fa zaho tihampianatra anarô karaha zanako tiako. 15 Fôtony ndray anarô manan̈a mpiambin̈y* 10 000 amy Kristy ao, azo antoko fa anarô tsy manan̈a baba maro. Zaho baka nanjary babanarô amy Kristy Jesosy ao, fôtony zaho nitondra vaovao tsara io taminarô. 16 Ke zaho mandrisiky anarô hangala tahaka zaho. 17 Zen̈y antony nandifasako Timoty aminarô an̈y, fôtony izy zanako tiako sady atokisako amy Tômpo ao. Izy hampatsiaro anarô fomba fiasako* zaho koa fa man̈ano raha nan̈irahan’i Kristy Jesosy zaho, tsy ino zen̈y fa fomba fiasa ampianariko fiangonan̈a jiaby, ndray aia zen̈y ndray aia.
18 Olo sasany mipoerapoera fôtony irô mieritreritry fa zaho tsy ho avy aminarô an̈y. 19 Fa izikoa sitrapôn’i Jehovah, tsy ho ela zaho ho avy aminarô an̈y, ke tsy raha volan̈indrô olo poerapoera aby io ny raha mahalian̈a zaho fa angôvondrô. 20 Fôtony tsy raha volan̈in’olo araiky man̈aboaka fa izy man̈eky Fanjakan̈an’ny Zan̈ahary, fa angôvon’ny Zan̈ahary aminany ao. 21 Aia tiatianarô: Zaho hitondra kobay lera zaho avy aminarô an̈y, sa zaho ho be fitiavan̈a ndreky halemy fan̈ahy?