Taratasy handeha amindrô Kôlôsianin̈y aby io
3 Kanefa, izikoa anarô natsangana niaraka tamy Kristy, tsakareha fo raha an̈abo an̈y, tsy aia zen̈y fa amy tany ipitrahan’i Kristy ankavanan̈an’ny Zan̈ahary an̈y. 2 Jerinarô afantaoha amy raha an̈abo an̈y fo, fa tsy amy raha ambony tany atỳ. 3 Anarô bakà efa maty, aviô fiainan̈anarô efa nasitriky niaraka tamy Kristy. Izy tafikamban̈a amy Zan̈ahary. 4 Kristy io fiainan̈antsika. Lera izy habaribary, anarô koa mba habaribary ke hahazo voninahitry miaraka aminany.
5 Ke vonia fan̈irian-dratsy jiaby mety hitariky vatan̈anarô hijangajanga,* han̈ano raha maloto, han̈iry mare han̈ano firaisan̈a, han̈iry han̈ano ny ratsy, ndreky hanan̈a fan̈irian̈a tsy mety afa-pô fôtony zio fanompoan-tsampy. 6 Zan̈ahary ho meloko amin’olo man̈ano raha aby zen̈y. 7 Anarô taloha koa mba efa mpan̈ano raha aby zen̈y. 8 Fa ndray zen̈y, ialà raha aby ty: Heloko, haromaotan̈a, haratsiam-pan̈ahy, tihitihy, ndreky koran̈a vetaveta. 9 Anarô aza mifampavandy. Adosoa toetry* taloha ndreky raha jiaby fataonarô tamy zen̈y, 10 aviô sikìna toetry vaovao amezan’ny Zan̈ahary atsika. Arakarakan’ny ahaizanarô ny marin̈y momba izy, hahaihitovy amy toetrinany fo toetrinarô. 11 Ke efa tsisy dikany eky na Griky na Jiosy, na voavositry na tsy voavositry, na hafa firenena na Skytianin̈y,* na andevo na tsy andevo zen̈y. Fôtony Kristy raha jiaby ndreky an̈atin’olo jiaby.
12 Anarô efa nifidin’ny Zan̈ahary aviô anarô masin̈y sady ten̈a tian̈a, ke mifen̈a han̈aboaka* fitiavan̈a ndreky hahinakinaka, hatsaram-pan̈ahy, hanetry ten̈a, halemy toetry, aviô hahari-draha. 13 Mifandifera fo baka iô mahaiza mifan̈ambela hadisovan̈a amy fô jiaby, ndray misy antony itretrezan̈a momba olo sasany. Jehovah nan̈ambela tanteraka hadisovan̈anarô, ke anarô koa mba tôkony han̈ano karaha zen̈y. 14 Sôsoko raha jiaby zen̈y, misikìna fitiavan̈a, fôtony izio ten̈a* mampitambatra tsarabe.
15 Baka iô ambilà fiadanan̈an’i Kristy hanjaka an̈atin’ny fônarô ao,* fôtony Zan̈ahary efa nikaiky anarô baka anarô hahazo fiadanan̈a zen̈y ke hanjary vatan̈a araiky. Aviô aboaha fa anarô mahay mankasitraka. 16 Fônarô finòa raha nampianarin’i Kristy, amy zen̈y anarô ho hisy jery. Aza vôly mampianatra ndreky mankahery* olo. Ke anarô koa fa man̈ano zen̈y, mampiasà salamo ndreky hira fideran̈a Zan̈ahary, baka iô man̈anaova hira masin̈y amy fô feno fankasitrahan̈a; mihirà amy fô nin’i Jehovah. 17 Ndray ino ndray ino raha volan̈inarô na raha ataonarô, ataova amin’ny an̈aran̈an’i Jesosy Tômpo raha aby zen̈y; aviô man̈anaova mersy Zan̈ahary Babantsika amin’ny an̈aran̈an’i Jesosy Tômpo.
18 Anarô man̈angy, ikia vadinarô, fôtony zen̈y raha tôkony hataon’ny mpan̈ara-dia Tômpo. 19 Anarô lelahy, tiava fo vadinarô, aviô aza meloko mare* amindrô. 20 Anarô zanaka, areha fo volan̈an’ny raimandreninarô, fôtony zen̈y raha mamparavoravo Tômpo. 21 Anarô baba, aza mampameloko zanakanarô, amy zen̈y irô tsy halemy trôko. 22 Anarô mpiasa,* ataova amy fô raha jiaby han̈irahan’olo mampiasa anarô* anarô. Aviô, tsy lera irô man̈ara-maso anarô fo anarô tôkony han̈ano zen̈y, karaha raha handeha hamparavoravo olombelon̈o in̈y, fa nohon’ny anarô mavozo Jehovah. 23 Zay raha ataonarô, ataova amy fô jiaby karaha raha nin’i Jehovah in̈y fa tsy nin’olo, 24 fôtony hainarô fa baka amy Jehovah hazahoanarô kadô, tsy ino zen̈y fa lova. Manompoa Kristy, fôtony izy ny ten̈a Tômpo. 25 Lan̈iany olo man̈ano raha ratsy tsy maintsy hahazo valin’ny raha ratsy nataony, ary mitovy fo fomba hitsaran’ny Zan̈ahary olo jiaby.