Taratasy voanalohany handeha amindrô Tesalônianin̈y aby io
2 Hainarô tsarabe, rahalahy aby, fa tsy very bôriny dianay taminarô tan̈y. 2 Hainarô bakà fa ndray zahay nalain̈a baraka ta Filipỳ tan̈y, Zan̈aharintsika nan̈ampy zahay hasaky* hitory vaovao tsara momba izy aminarô, ndray naresaka mare fan̈injehan̈a. 3 Fôtony zahay koa fa mampirisiky anarô, raha volan̈inay tsy miôrin̈y amy raha diso, aviô zahay tsisy jery ratsy aminarô na tihamitaka anarô. 4 Zahay nifidin’ny Zan̈ahary han̈ambara vaovao tsara io, ke tsy hamparavoravo olo antony mahavy zahay mivolan̈a fa hamparavoravo Zan̈ahary. Izy mandiniky fô.
5 Hainarô tsarabe bakà fa zahay tsiary ndraiky nandroboko olo, na nihatsaravelatsihy misy hazahoanay raha. Zan̈ahary mahita.* 6 Zahay tsiary ndraiky nitady rady tamin’olo, na taminarô zen̈y na tamin’olo hafa. Baka iô ndray zahay apôstôlin’i Kristy, zahay tsy nanahiran̈a anarô foeky ke nitaky vola taminarô. 7 Ndray zahay aby tsara fan̈ahy taminarô, karaha ataon’ny reny mampinono mikarakara zanany tiany in̈y. 8 Faran-draha tianay eky anarô, ke zahay tsy basiny tapa-kevitry han̈ambara vaovao tsara momba Zan̈ahary aminarô fo fa, vôn̈ono koa zahay hirisiky fahin̈ananay misy han̈ampian̈a anarô, fôtony anarô tianay mare.
9 Hainarô tsarabe, rahalahy aby, fa zahay tsy nitsitsy angôvonay fa zahay niasa mare. Tamy fotoan̈an’ny zahay nitory vaovao tsara momba Zan̈ahary taminarô, zahay niasa mare matsan̈a alin̈y misy hazahoanay raha ilainay, amy zen̈y zahay tsy hanahiran̈a anarô foeky.* 10 Anarô ndreky Zan̈ahary vavolombelon̈o fa zahay tsy nivadiky sady nan̈ano ny marin̈y baka iô tsisy tsin̈y tamy fomba nan̈ampianay anarô. 11 Hainarô tsarabe fa zahay tsy vôly nandrisiky anarô ndreky nankahery anarô aviô nan̈amia torohevitry anarô tsiaraikiaraiky, karaha ataon’ny baba amy zanany, 12 amy zen̈y fomba fiainan̈anarô hamparavoravo Zan̈ahary. Izy nikaiky anarô hiditry amy Fanjakan̈anany ndreky amy voninahitrinany.
13 Zen̈y koa mahavy zahay tsy vôly man̈ano mersy Zan̈ahary, fôtony anarô koa fa naharen̈y volan̈an’ny Zan̈ahary nitorianay taminarô, anarô nan̈eky fa izio volan̈an’ny Zan̈ahary fa tsy volan̈an’olombelon̈o, ary zen̈y tsarabe izy. Sady volan̈an’ny Zan̈ahary io man̈ampy anarô.* 14 Anarô bakà, rahalahy aby, nangala tahaka irô fiangonan̈an’ny Zan̈ahary aby a Jodia* an̈y, fôtony anarô koa mba nampijalian’olo tanàna araiky aminarô, karaha ataondrô an̈y ampijaliandrô Jiosy aby io koa. 15 Irô Jiosy aby io foeky bakà namono Jesosy Tômpo ndreky irô mpaminan̈y aby io, aviô koa irô nan̈enjiky zahay. Sôsoko zen̈y, raha ataondrô tsy mamparavoravo Zan̈ahary sady tsy mahatsara olo foeky, na azôvy zen̈y na azôvy, 16 fôtony irô tihanakana zahay tsy hitory amindrô olo hafa firenena aby io, amy zen̈y irô io tsy ho avotro. Raha ataondrô zen̈y mahaimanôsoko fahotan̈andrô fo, ke Zan̈ahary han̈ampatra helokonany amindrô.
17 Rahalahy aby, zahay koa fa tsy maintsy nisaraka* taminarô tan̈atin’ny fotoan̈a fôhiky (vatan̈anay fo ndraiky fa tsy fônay), zahay nifen̈y angôvo jiaby nitady fomba hifanojoan̈a aminarô ndraiky, fôtony zahay tihahita anarô* mare. 18 Ke zen̈y nahavy zahay efa tseky nandeha taminarô tan̈y. Ia, tsy indraiky fo zaho* nan̈aohatra nandeha tan̈y fa indroe aby. Kanefa Satana nanakana zahay.* 19 Ino ma fan̈antinan̈anay? Azôvy ma haravoan̈anay ndreky satroboninahitry mampirehareha zahay man̈oloan̈a Jesosy Tômpontsika, an̈atin’ny fotoan̈a impodianany? Tsy efa anarô edy? 20 Ia, efa anarô edy voninahitrinay ndreky haravoan̈anay.