Taratasy nisoratin’i Joda
1 Baka amy Joda, mpanompon’i Jesosy Kristy sady rahalahin’i Jakoba, handeha amin’olo tian’ny Zan̈ahary Babantsika ndreky nifidiny, sady araovany nohon’irô tafikamban̈a amy Jesosy Kristy:
2 Irarian̈a Zan̈ahary tsy vôly hamindra fô aminarô ndreky hankatia anarô, baka iô han̈amia anarô fiadanan̈a. Ary irarian̈a izy han̈ano zen̈y mandilatran’ny efa fataony.
3 Rahalahy ndreky ranabavy tiako aby, zaho efa tseky hanoratra aminarô momba famonjian̈a itambarantsika, fa sitrany zaho mampirisiky anarô hiady mare hiaro finoan̈anarô. Izio namezan̈a irô olo masin̈y aby io indraiky fo, sady maharitry mandrakizay.* 4 Tsy zen̈y bakà izio fa, nisy olo nitsôfotro mangingin̈y tan̈ivon’ny fiangonan̈a, ary efa ela Soratra Masin̈y nivolan̈a fa irô io hisazian̈a. Irô io tsy mavozo* Zan̈ahary, aviô irô tsy men̈atra foeky man̈ano raha tsy manjary, baka iô irô mieritreritry fa tsy man̈ino aby irô ndray man̈ano zen̈y,* fôtony Zan̈aharintsika zen̈y ho irô tsara fan̈ahy.* Tsy zen̈y fo fa, mbala mivadiky amy Jesosy Kristy Tômpontsika koa irô, kanefa atsika io ninany fôtony atsika jiaby efa nivangainy.
5 Efa hainarô tsarabe raha aby zen̈y. Kanefa, mbala tiako hampatsiarôvin̈y anarô fo fa, ndray Jehovah nan̈avotro vahoakanany baka ta Ezipty, mbala naripany fo sasany tamindrô io tafara tatỳ fôtony irô tsy nino izy. 6 Aviô nigadrain’ny Zan̈ahary* mandrakizay amy tany mahiziky mare lan̈iany anjely tsy nan̈ano asa nan̈irahany irô, fa niala tamy plasy tôkony nisy irô tan-dan̈itry tan̈y. Ao irô miambin̈y andra* hitsaran’ny Zan̈ahary irô. 7 Nisazian’ny Zan̈ahary koa irô olo nipetraka ta Sodoma ndreky Gomora ndreky tamy tanàna nan̈odidin̈y irô, fôtony irô nan̈eram-pô nijangajanga* sady nan̈atanteraka fan̈irian̈an’ny nôfotro ke nan̈ano raha tsy fatao, karaha nataondrô anjely aby in̈y. Môtro maharitry mandrakizay* sazy nazondrô, ary raha zen̈y fampitandreman̈a atsika.
8 Raha zen̈y efa haindrô olo nitsôfotro mangingin̈y aby in̈y, fa irô mbala tsy vôly mieritreritry raha tsy manjary fo, ndreky mijangajanga,* aviô irô tsy man̈aja olo manan̈a fahifan̈a sady mankaratsy irô olo manan̈a voninahitry aby io.* 9 Kanefa, Mikael arkanjely ndray nimalo tamy Devoly momba fatin’i Mosesy, Mikael tsy nasaky nitsara izy na nanihitihy izy, fa ho izy tamy Devoly: “Anò Jehovah hivolan̈a anao mare!” 10 Fa irô olo aby io ndraiky mankaratsy raha tsy ten̈a mazava amindrô. Irô io karaha biby tsy mandiniky, aviô irô man̈ano karaha fataon’ny biby in̈y amy raha jiaby ataondrô, ke irô manjary mandroba-ten̈a.
11 Perty irô, fôtony irô nangala tahaka raha tsy manjary nataon’i Kaina, baka iô irô mekimeky han̈ano raha ratsy karaha nataon’i Balama in̈y misy hazahoandrô benefisy. Aviô, karaha nataon’i Kora in̈y, irô nankaratsy olo manan̈a fahifan̈a, ke irô koa mba ho ripaka. 12 Lera anarô man̈ano fety* nohon’ny anarô tihampisy fifankatiavan̈a aminarô samby anarô, irô mba miaraka aminarô iô koa, kanefa irô miran̈a bolongam-bato be* misitriky an̈atin’ny rano. An̈arany fo irô io tsiman̈aja, kanefa irô io tia ten̈a sady tsy mavozo Zan̈ahary foeky. Aviô, irô io miran̈a rôndro tsisy rano hindesin’ny tsiko atỳ arỳ in̈y, ndreky miran̈a kakazo tsy mamoa amy fotoan̈any sady maiky mare ke* nimbotan̈a foeky. 13 Irô io koa mira daroban-dranomasin̈y mihetsiky mare sady man̈aboaka loto, ke raha zen̈y tôkony hampamen̈atra irô. Aviô, irô io mira lakintan̈a tsisy direksion. Irô io handeha hapetrakan’ny Zan̈ahary amy tany mahiziky mare, ke tsisy andra hialandrô ao.
14 Enoka naminan̈y momba irô. Izy taranaka fahafito baka amin’i Adama. Karaha ty ho izy: “Indriô Jehovah navy miaraka amin’ny anjelinany masin̈y marobe* 15 hitsara olo jiaby sady han̈asazy lan̈iany olo tsy mavozo Zan̈ahary. Ia, hisaziany irô nohon’ny raha ratsy jiaby nataondrô ndreky fankaratsian̈a jiaby nivolan̈indrô momba izy.”
16 Irô miasa min̈on̈on̈o sady mitretre momba raha mahazo irô amy fiainan̈a, aviô irô mitady han̈amia fahafaham-pô fan̈irian̈a ratsy an̈atindrô ao fo. Irô midera ten̈a, baka iô irô mandroboko olo beky irô hahazo raha.
17 Fa anarô ndraiky, rahalahy ndreky ranabavy tiako aby, alaivanarô onon̈o fo volan̈a efa nambarandrô apôstôlin’i Jesosy Kristy Tômpontsika aby in̈y. 18 Karaha ty bakà raha fivolan̈indrô aminarô: “Amin’andra farany, hisy mpan̈adroadro* han̈ano zay raha tsy manjary tiandrô hatao.* 19 Irô olo aby zen̈y man̈ano raha hahavy olo an̈ivon’ny fiangonan̈a tsy hiray sain̈y. Irô io olo erakan’ny nôfotro, sady tsy manan̈a fan̈ahy masin̈in’ny Zan̈ahary. 20 Fa anarô ndraiky, rahalahy ndreky ranabavy tiako aby, ankafatara fatokisanarô Zan̈ahary. Aviô ambilà fan̈ahy masin̈y io hiasa an̈atinarô ao lera anarô mivavaka, 21 amy zen̈y anarô ho tian’ny Zan̈ahary fo. Baka iô aza vôly man̈anten̈a fa Jesosy Kristy Tômpontsika hamindra fô aminarô ke han̈abian̈a lalan̈a hazahoanarô fiainan̈a mandrakizay. 22 Aviô aza vôly mamindra fô amin’olo misalasala momba raha inoandrô. 23 Avaota irô, ke antsorita malaky baka irô ho afaka an̈atin’ny môtro. Mifen̈a fo koa hamindra fô amin’olo hafa. Fa ndray zen̈y, anarô mitandrema fo, ke ataova raha hahavy anarô hankahala fitondran-ten̈a voatasin’ny fahotan̈a.*
24 Zan̈aharintsika be voninahitry io mahavita man̈ampy anarô baka anarô tsy hanota* ndreky tsy hisy tsin̈y aviô ho ravoravo mare man̈oloan̈a izy. 25 Zan̈ahary taokan̈a Mpamonjy atsika nampiasa Jesosy Kristy Tômpontsika han̈avaotan̈a atsika. Ninany voninahitry, ndreky fan̈ajan̈a,* ndreky fanjakan̈a, aviô fahifan̈a rango taloha ela be tan̈y ndreky ziôty aviô mandrakizay. Ameny.