Taratasy handeha amindrô Kôlôsianin̈y aby io
2 Tiako ho hainarô fa zaho mifen̈y mare amy zen̈y zaho hahavita han̈ampy anarô ndreky irô a Laodikia an̈y ndreky irô olo hafa jiaby mbala tsiary nahita zaho.* 2 Mivolan̈a zen̈y zaho baka irô* hahazo fankahirezan̈a ndreky hiray sain̈y tsarabe sady hifankatia. Hahazo hatsaran̈a* jiaby koa irô, fôtony haindrô tsarabe sady mazava tsarabe amindrô ino sekire masin̈in’ny Zan̈ahary. Sekire masin̈y io Kristy. 3 Nasitrikin’ny Zan̈ahary amy Kristy ao aby fahendrena jiaby ndreky fahaizan̈a jiaby.* 4 Mivolan̈a zen̈y zaho, amy zen̈y tsisy olo hamitaka anarô amin’ny hevitry maharesy lahatra. 5 Fa ndray zaho* tsy aminarô an̈y, jerinaka jiaby an̈y. Ravoravo zaho mahay* fa milamin̈y tsara anarô sady mino Kristy tsarabe.
6 Anarô nan̈eky Kristy Jesosy Tômpo, ke alaiva tahaka fo izy aviô areha fo volan̈anany.* 7 Eraka raha efa nampianarin̈y anarô, ataova raha hampafatatra finoan̈anarô tsarabe, amy zen̈y izio tsy ho voahozongozon̈o, karaha kakazo araiky mamahatra ndreky miôrin̈y tsarabe in̈y. Aviô, anarô aza vôly man̈ano mersy Zan̈ahary.
8 Tandrema tsao misy olo hamitaka anarô amy filôzôfỳ ndreky hevitry mamitaka sady tsisy dikany, fôtony raha aby zen̈y baka amy fomban-drazan̈a nifandovan’olombelon̈o ndreky baka amy toe-tsain̈in’ny donia ty, fa tsy baka amy Kristy; 9 fôtony bakà, anan̈an’i Kristy aby toetrin’ny Zan̈ahary. 10 Baka taminany nazahoanarô raha jiaby nilainarô. Izy mbala an̈abon̈abon’ny* fitondrasan̈a jiaby ndreky fahifan̈a jiaby. 11 Ke, fôtony anarô mino Kristy, anarô nivosirin̈y fa anarô fo tsy nivosirin’ny tan̈an’olo. Anarô bakà vôly nan̈araka sitrapôn’ny vatan̈anarô mpanota. Karaha zen̈y famosiran̈a olo mpan̈ara-dia Kristy zen̈y. 12 Anarô bakà niaraka nalevin̈y taminany tamy batisanany, aviô anarô koa niaraka natsangana taminany, fôtony anarô mpan̈ara-dia izy sady mino angôvon’ny Zan̈ahary, araiky nanangana izy tamy maty.
13 Aviô, ndray anarô naty baka tamin’ny hadisovan̈anarô salakady tsy voavositry, anarô nivilômin’ny Zan̈ahary baka anarô ho tafikamban̈a amy Kristy. Zan̈ahary bakà tsara fan̈ahy amintsika, ke izy nan̈ambela hadisovan̈a jiaby vitantsika 14 ndreky namafa* lalàn̈a voasoratra man̈aboaka fa atsika mpanota. Nifoan̈any zio tamin’izy namantsiky zio tamin’ny hazofijalian̈a.* 15 Baka tamin’izio* nahavitany nandresy irô fanjakan̈a ndreky manam-pahifan̈a aby io, ndreky nampibonginy irô io tamasom-bahoaka misy hangalany baràka irô. Irô io nataony gadra baka iô nindesiny tan̈atin’ny filaharam-be* fataon’olo mpandresy.
16 Ke, aza ambelanarô hisy olo foeky hitsara anarô momba raha hoaninarô ndreky raha higiahanarô na momba fankalazan̈a fety na momba fankalazan̈a fanjava tondroen̈a na momba fitandreman̈a sabata. 17 Irô raha aby io kandindon̈on’ny* raha mbala ho avy, fa Kristy ny ten̈a izy. 18 Irô olo man̈ano sary manetry ten̈a ndreky mivavaka amin’ny anjely aby io aza ambelanarô hanakan̈a anarô tsy hahazo valisoa io. Irô “man̈izingizin̈y”* raha hitan’ny masondrô fo, aviô raha tsisy dikany foeky mampipoerapoera irô, fôtony toe-tsain̈in’olombelon̈o mibeko irô, 19 ke irô efa tsy mitambatra amy loha eky; tsy azôvy loha io fa Kristy. Kanefa loha io man̈amia raha jiaby ilain’ny vatan̈a* ndreky mahavy ratsambatan̈a jiaby hitambatra tsarabe, baka amy fisian’ny van̈ivan̈in’ny taolan̈a ndreky hozatra. Aviô mbala loha io fo koa ampiasain’ny Zan̈ahary hampitombo vatan̈a io.
20 Izikoa anarô niaraka naty tamy Kristy sady efa tsy nan̈eky han̈araka toe-tsain̈in’ny donia ty eky, nan̈ino basy anarô mbala karaha raha an̈isan’ny donia ty fo ke man̈araka didy aby ty: 21 “Aza mangala, aza man̈andran̈a, aza mikasiky”? 22 Irô io didy momba raha ho ravan̈a izikoa fa hoanin̈y na higiahan̈a, sady irô io raha fampianaran̈an’olombelon̈o fo. 23 Ndray irô raha aby io zahan̈a karaha fahendrena, irô io tsy man̈ampy olo hiady amy fan̈irian̈an’ny nôfotro. Zen̈y ny raha misy fôtony olo aby io fo mifidy raha tiandrô hatao amy raha momba fivavahan̈a, aviô irô tsy basiny man̈ano sary manetry ten̈a fo fa irô mbala mampijaly ten̈a koa.