Taratasy Faharoe Handeha Amindrô Korintianin̈y aby Io
2 Ty fanapahan-kevitrinaka: Zaho tsy han̈ano raha hampalahelo anarô, lera zaho mimpody mamangy anarô. 2 Izikoa baka zaho han̈ano raha hampalahelo anarô, azôvy basy hamparavoravo zaho izikoa tsy olo nalahelo baka tamy raha nataoko fo? 3 Nisoratiko raha zen̈y beky zaho tsy hampalahelo olo tôkony hamparavoravo zaho lera zaho avy. Zaho baka matoky fa raha mamparavoravo zaho mba mamparavoravo anarô jiaby koa. 4 Tomoan̈y fo zaho izikoa fa nanoratra taratasy taminarô, fôtony zaho nijaly* sady niasaloha mare tan̈atin’ny fônaka tato. Ndray zen̈y, tsy hampalahelo anarô han̈anaovako zen̈y fa misy hahaizanarô fa anarô ten̈a tiako.
5 Izikoa nisy olo nan̈ano raha nampalahelo olo hafa, izy tsy nampalahelo zaho, fa izy nan̈ano raha nampalahelo presky anarô jiaby. Azafady izikoa somary nahitsihitsy volan̈anaka. 6 Ampy olo in̈y sazy namezan’ny ankamaraozanarô izy. 7 Anarô ziô ndraiky tôkony ho vôn̈ono han̈ambela hadisovan̈anany sady ho tsara fan̈ahy koa fa man̈ano zen̈y, ke han̈amia korazy izy tsao izy ho rivan̈a baka amin’ny* alahelo dila loatra. 8 Ke zaho mampirisiky anarô: Ameza toky izy fa mbala tianarô. 9 Ty koa antony nanoratako taminarô: Misy hahitako izikoa anarô man̈araka volan̈a amy raha jiaby. 10 Zay hadisovan̈a ambelanarô mba ambelako koa. Ny marin̈y aminany baka, zay hadisovan̈a nambelako (izikoa nisy raha tôkony nambelako edy), nambelako misy han̈ampian̈a anarô sady Kristy lastiô vavolombelon̈on’ny raha zen̈y, 11 baka atsika tsy ho voafitakan’i* Satana fôtony haintsika teti-dratsinany.*
12 Zaho koa fa navy ta Troasy han̈ambara vaovao tsara momba Kristy, ke nisy varavaran̈a nibiafin̈y nan̈oloan̈a zaho nahavitako nan̈ano asan’ny Tômpo, 13 tsy nilamin̈y jerinaka fôtony Titosy rahalahiko tsy hitako tan̈y. Ke nataoko veloma foeky irô rahalahy aby io, baka iô zaho niala ta Makedonia.
14 Fa isaoran̈a Zan̈ahary, araiky tsy vôly mitariky atsika amy laharan̈an’ny mpandresy miaraka amy Kristy, ndreky mampiasa atsika han̈aparitaka* han̈itrin’ny fahaizan̈a momba Izy amy tany jiaby! 15 Fôtony amy Zan̈ahary, lera atsika mitory momba Kristy, atsika miran̈a han̈itry tsara amindrô olo hivonjen̈a aby io ndreky amindrô olo haripaka aby io. 16 Amindrô haripaka, izio fôfokon’ny fahafatesan̈a mitariky amy fahafatesan̈a, fa amindrô hivonjen̈a ndraiky, izio han̈itrin’ny fiainan̈a mitariky amy fiainan̈a. Ke azôvy mahafeno fepetra amy raha zen̈y? 17 Zahay. Fôtony zahay tsy mandafo* volan̈an’ny Zan̈ahary karaha ataon’olo maro; amy maha irakan’ny Zan̈ahary zahay, tsisy fihatsarambelatsihy foeky zahay izikoa fa mikoran̈a man̈oloan̈a Zan̈ahary ndreky miaraka amy Kristy.