Taratasy nisoratin’i Jakoba

2 Rahalahiko aby, mba mino Jesosy Kristy Tômpontsika be voninahitry edy anarô izikoa man̈avakavaka va? 2 Ohatra ziô, misy olo man̈ano peratra volamena ndreky misikiny lamba tsara mare mandeha man̈aton̈o fivorian̈anarô, aviô misy olo masikiny man̈ano lamba maloto miditry ao, akôry hataonarô? 3 Izio ma araiky misikiny lamba tsara mare in̈y tiatianarô ke hivolan̈anarô karaha ty: “Anao mipitraha amy sezy eto”,* fa amin’ny araiky masikiny in̈y ndraiky anarô hivolan̈a: “Mitsangàna iô fo”, na: “Mipitraha ambany iô”?* 4 Izikoa zen̈y raha ataonarô, tsy ndraiky man̈avakavaka edy anarô zen̈y va? Aviô mba mety edy fomba hitsaranarô olo?

5 Tandrin̈esanarô ty, rahalahiko tiako aby: Tsy irô olo iritriretin’olo amy donia ty fa masikiny ma nifidin’ny Zan̈ahary hanjary mpan̈arivo finoan̈a, ndreky hanjary mpandova Fanjakan̈a nampan̈antin̈ainy fa hamezany lan̈iany olo tia izy? 6 Kanefa anarô tsy man̈isy fôtiny olo masikiny. Tsy irô olo mpan̈arivo aby io ma izy mampijaly anarô ndreky man̈antsorintsory anarô handeha amy fitsaran̈a an̈y? 7 Tsy irô io koa ma izy tsy nan̈isy fôtiny an̈aran̈a tsara namezan̈a* anarô in̈y? 8 Kanefa, tsara raha ataonarô izikoa arehanarô tsarabe lalàn̈an’ny Mpanjaka voasoratra amy Soratra Masin̈y ao ty: “Anao mila tia olo karaha ataonao tia ain̈inao.” 9 Fa izikoa anarô tsy vôly man̈avakavaka olo, anarô manota; ary izikoa lalàn̈a zahan̈a, anarô mpandika lalàn̈a.

10 Izikoa bakà misy olo mitandrin̈y Lalàn̈a jiaby, kanefa baka iô misy araiky amindrô io tsy avoatandriny, manjary diso fo izy amy Lalàn̈a jiaby. 11 Ohatra, Zan̈ahary ziô efa nivolan̈a: “Aza mandiadia vady”, aviô koa ho izy: “Aza mamono olo.” Ke izikoa anarô tsy mandiadia vady fa anarô ndraiky mamono olo, mbala mpandika lalàn̈a fo anarô. 12 Aboaha amy raha volan̈inarô ndreky amy raha ataonarô fo fa anarô mbala hitsarain̈a mifan̈araka amy lalàn̈a arehan’olo afaka.* 13 Hitsarain̈a tsisy indrafô lan̈iany olo tsy mamindra fô. Famindram-pô io mahavita mandresy fitsaran̈a.

14 Rahalahiko aby, mba misy varany edy izikoa misy olo mivolan̈a fa izy mino Zan̈ahary kanefa raha zen̈y tsy aboakany amy raha ataony? Finoan̈anany zen̈y ma hahavita han̈avotro izy? 15 Izikoa misy rahalahy ndreky ranabavy tsisy lamba sikinin̈y* baka iô tsy ampy hanin̈y,* 16 kanefa misy aminarô mivolan̈a amindrô karaha ty: “Tsaratsara ay! Irarian̈a anarô hafana ndreky ho voky tsarabe fo!”, kanefa anarô tsy man̈amia irô raha ilaindrô,* ino edy varan’izen̈y? 17 Karaha zen̈y koa fa, finoan̈a koa tsy aboaka amy raha atao, izio maty.

18 Fa misy olo ziô hivolan̈a: “Anao mino, fa zaho ndraiky tsy basiny mino fo fa man̈aboaka zen̈y amy raha ataoko. Aboaha zaho bakà anao mino* zen̈y, fa haboakako anao amy raha ataoko ndraiky fa zaho mino. 19 Anao mino fa araiky fo Zan̈ahary, tsy zen̈y? Pare zen̈y! Fa ndray irô demony aby io koa mba mino sady mangôrohôro. 20 Anao ma tsy mandiniky? Tsy hainao ma fa finoan̈a io koa tsy aboaka amy raha atao, tsisy dikany? 21 Abrahama dadilahibentsika* ma tsy nambara fa marin̈y baka tamy raha nataony, izy koa fa baka nan̈ano sôron̈o Isàka zanany tan̈abon’ny alitara? 22 Hitanao baka amy zen̈y fa izy nino, fôtony raha zen̈y naboakany tamy raha nataony, ke zen̈y nahavy finoan̈anany nanjary lavorary. 23 Ke tanteraka marin̈y raha nivolan̈in’ny Soratra Masin̈y ty: “Abrahama nan̈aboaka fa izy nino Jehovah, ke izy nikonten̈a ho olo marin̈y.”* Zen̈y nahavy Jehovah nivolan̈a fa izy kamaradiny.

24 Hitanarô baka amy zen̈y fa, baka amy raha ataon’olo araiky han̈ambaran̈a fa izy olo marin̈y, fa tsy zisty baka amin’izy mino fo. 25 Azonarô onon̈o Rahaba, man̈angy makorely in̈y? Tsy baka tamy raha nataony ma nahavy izy nambara fa marin̈y, tafaran’izy nan̈ano karibo an-tran̈o irô mpitsikilo* aby in̈y ndreky nan̈ampy irô nilefa?* 26 Ia, marin̈y ankitin̈y fa maty vatan̈a izikoa tsisy fahin̈ana; karaha zen̈y koa fa, maty finoan̈a io izikoa tsy aboaka amy raha atao.