Taratasy Handeha Amindrô Efesianin̈y aby Io
2 Sôsoko zen̈y, anarô nivilômin’ny Zan̈ahary, ndray anarô naty baka tamin’ny hadisovan̈anarô ndreky fahotan̈anarô, 2 tsy ino zen̈y fa raha nataonarô taloha tamin’ny anarô nan̈ano raha fataon’ny* donia ty ndreky nan̈araka mpitondra mibeko tsiko. Tsiko io toe-tsain̈y* manjaka amy ziôty amindrô zanakan’ny tsy fan̈arehan̈a volan̈a aby io. 3 Ke, karaha irô, atsika nan̈atanteraka fan̈irian̈an’ny nôfotrontsika, eraka raha tian’ny nôfotrontsika ndreky masaka tan̈atin’ny jerintsika. Ary rango atsika vo teraka, atsika efa zanakan’ny heloko karaha olo jiaby. 4 Kanefa Zan̈ahary ten̈a mamindra fô, aviô nohon’ny fitiavan̈a maventy naboakany tamintsika, 5 atsika nivilôminy aviô nakambany tamy Kristy, ndray baka tamin’ny hadisovan̈antsika nahavy atsika naty.—Baka tamin’ny hatsaram-pan̈ahy miavaka nahavy anarô voavonjy.— 6 Tsy zen̈y fo fa, atsika nivilôminy aviô nakambany tamy Kristy baka iô koa atsika namezany plasy amy faritrin’ny lan̈itry miaraka aminany,* fôtony atsika tafikamban̈a amy Kristy Jesosy, 7 amy zen̈y, amy donia* ho avy, haboakany fa tsisy erany salakady ten̈a be ankitin̈y hatsaram-pan̈ahinany miavaka, lera Izy han̈ano raha maro tsara amintsika* tafikamban̈a amy Kristy Jesosy.
8 Baka amin’ny hatsaram-pan̈ahy miavaka zen̈y nahavy anarô voavonjy nohon’ny finoan̈anarô, ary raha zen̈y tsy baka amy raha nataonarô, fa kadô baka amy Zan̈ahary. 9 Ia, zio tsy vokatran’ny ezaka nataonarô foeky, amy zen̈y tsisy olo hanan̈a antony hireharehan̈a. 10 Atsika asa tan̈anan’ny Zan̈ahary,* aviô nohon’ny atsika mpan̈ara-dia Kristy Jesosy, atsika niasain̈a han̈ano asa tsara efa noman̈in’ny Zan̈ahary tsialohaloha handeha hataontsika.
11 Ke alaivanarô onon̈o fa taloha, rango anarô vo teraka,* anarô olon’ny donia ty. “Tsy voavositry” nikahiandrô olo kahian̈a “voavositry” aby io anarô, tsy azôvy irô io fa olo aby nivosirin̈y tamy nôfotro sady nivosirin’ny tan̈an’olo. 12 Tamy fotoan̈a zen̈y, anarô tsy nahay* Kristy, anarô tsy nifandray tamy firenenan’Israely, anarô tsy tafiditry tamy fifan̈ikian̈a momba fampan̈antinan̈a; anarô tsisy fan̈antinan̈a aviô anarô tsisy Zan̈ahary foeky tamy donia ty. 13 Fa anarô ziô tafikamban̈a amy Kristy Jesosy, ke ndray lavitry Zan̈ahary anarô taloha, anarô ziô nanjary narikitry izy baka tamy lion’i Kristy. 14 Fôtony izy nampihavan̈a atsika. Izy araiky nahavy atsika, antòkon’olo aroe io, nanjary araiky ndreky nandravan̈a riba nampisaraka atsika. 15 Baka amy nôfotronany nan̈afoan̈any raha nahavy atsika ho mpifahavalo, tsy ino zen̈y fa Lalàn̈a misy didy maro, amy zen̈y antòkon’olo aroe tafikamban̈a aminany io hanjary olo vaovao araiky, misy hisian’ny fihavanan̈a, 16 ndreky hampihavan̈a tanteraka antòkon’olo aroe io amy Zan̈ahary baka amin’ny hazofijalian̈a,* amy zen̈y atsika hanjary vatan̈a araiky fo, fôtony baka tamy nifatesany nan̈afoan̈any raha nahavy atsika ho mpifahavalo. 17 Ke izy navy aviô nan̈ambara vaovao tsaran’ny fihavanan̈a taminarô, tsy azôvy zen̈y fa anarô lavitry Zan̈ahary taloha, ndreky tamin’olo narikitry izy, 18 fôtony baka taminany nahavy atsika, tsy azôvy zen̈y fa antòkon’olo aroe io, mahavita man̈aton̈o Baba. Mitovy fo bakà fan̈ahy azontsika jiaby.
19 Ke anarô ziô efa tsy vahiny na hafa firenena eky, fa anarô firenena araiky amindrô olo masin̈y aby io sady an̈isan’ny fianakavian̈an’ny Zan̈ahary. 20 Anarô naôrin̈y tan̈abon’ny fôtotro, tsy ino zio fa irô apôstôly ndreky mpaminan̈y aby io, fa Kristy Jesosy ndraiky vato fehizoro. 21 Tran̈o io jiaby tafikamban̈a aminany, aviô koa raha jiaby mifôtotro izio tafikamban̈a tsara sady milamin̈y tsarabe. Mahaimanonga fo tran̈o io ke manjary tempoly masin̈y nin’i Jehovah. 22 Anarô koa mba tafikamban̈a aminany, ke anarô miaraka aôrin̈y baka anarô hanjary tran̈o pitrahan’ny Zan̈ahary, fôtony ao fan̈ahinany.