Taratasy Voanalohany Handeha Amindrô Korintianin̈y aby Io

15 Rahalahy aby, zaho mampatsiaro anarô vaovao tsara nambarako taminarô, araiky nikenarô salakady natokisanarô in̈y. 2 Baka amy zio koa mahavy anarô hivonjen̈a, izikoa tsy hialanarô foeky vaovao tsara nambarako taminarô. Izikoa tsy zen̈y, tsisy varany foeky nahavy anarô nanjary mpino.

3 Ty koa an̈isan’ny raha voanalohany nianarako ke nampianariko anarô: Eraka raha koran̈in’ny Soratra Masin̈y, Kristy naty nohon’ny fahotan̈antsika, 4 ke izy nalevin̈y baka iô natsangana tamy maty tamin’ny andra fahatelo, eraka raha koran̈in’ny Soratra Masin̈y, 5 aviô izy niboaka tamy Kefasy,* baka iô tamindrô 12 Lahy. 6 Tafaran’izen̈y, izy niboaka tamy rahalahy mandilatran’ny 500 indraiky mipaka; ankamaraozandrô io mbala miaraka amintsika eto, fa sasany ndraiky efa naty.* 7 Izy baka tiô niboaka tamy Jakoba, aviô tamin’ny apôstôly jiaby. 8 Baka iô tamy farany amizay, izy niboaka taminaka koa, karaha amy tsaiky teraka tsy ampy fanjava in̈y.

9 Zaho baka ny farany hely amin’ny apôstôly, aviô zaho tsy man̈eva kahian̈a apôstôly, fôtony zaho nan̈enjiky fiangonan̈an’ny Zan̈ahary. 10 Fa baka tamin’ny hatsaram-pan̈ahy miavaka naboakan’ny Zan̈ahary taminaka nahavy zaho karaha ty io. Tsy very bôriny hatsaram-pan̈ahy miavaka naboaka taminaka io, fôtony zaho niasa mare mandilatra irô jiaby. Kanefa, tsy zaho izy niasa mare io, fa hatsaram-pan̈ahy miavaka naboakan’ny Zan̈ahary taminaka. 11 Ke na zaho na irô, karaha zen̈y ataonay mitory, aviô karaha zen̈y koa nahavy anarô nino.

12 Izikoa zahay mitory fa Kristy natsangana tamy maty, nan̈ino fo basy sasany aminarô mivolan̈a fa fitsanganan̈a amy maty zen̈y tsisy? 13 Izikoa baka tsisy ankitin̈y fitsanganan̈a amy maty zen̈y, dikan’izen̈y Kristy tsy natsangana tamy maty. 14 Izikoa Kristy tsy natsangana tamy maty, very bôriny fitorian̈a ataontsika, aviô very bôriny koa finoan̈anarô. 15 Tsy zen̈y fo fa, atsika koa hanjary vavolombelon̈o sandoko man̈ambara raha tsy marin̈y momba Zan̈ahary, fôtony atsika man̈ambara fa Kristy natsanganan’ny Zan̈ahary tamy maty. Kanefa izikoa olo maty tsy hatsangana, izy tsy nety ho nanangana Kristy. 16 Fôtony izikoa olo maty tsy hatsangana, ndray Kristy koa mba tsy natsangana tamy maty. 17 Tsy zen̈y fo fa, izikoa Kristy tsy natsangana tamy maty, tsisy dikany foeky finoan̈anarô, baka iô anarô tsy ho afaka amy fahotan̈anarô. 18 Aviô, very koa lan̈iany mpan̈ara-dia* Kristy efa naty aby in̈y. 19 Izikoa amy fiainan̈a ty fo atsika man̈anten̈a Kristy, atsika ny ten̈a mampahinakinaka amin’olo jiaby.

20 Fa Kristy efa natsangana tamy maty; izy voaloham-bokatra amindrô olo maty aby io. 21 Karaha ataon’ny fahafatesan̈a baka amin’olo araiky, fitsanganan̈a amy maty koa baka amin’olo araiky. 22 Karaha ataon’ny baka amin’i Adama mahavy olo jiaby maty, baka amy Kristy koa mahavy olo jiaby ho velon̈o. 23 Kanefa samby amy filaharany aby irô tsiaraikiaraiky: Kristy voaloham-bokatra, aviô vo irô olon’i Kristy aby io, an̈atin’ny fotoan̈a impodianany. 24 Baka iô, amy farany, Fanjakan̈a hampodiny amy Zan̈aharinany sady Babany, izy koa fa baka nandravan̈a fitondrasan̈a jiaby ndreky fahifan̈a jiaby baka iô angôvo. 25 Izy baka tsy maintsy manjaka, parapan̈anaovan’ny Zan̈ahary irô fahavalo jiaby ambanin’ny vitinany. 26 Aviô, hifoan̈ana fahavalo farany, tsy ino zen̈y fa fahafatesan̈a. 27 Fôtony efa “nataon’ny Zan̈ahary ambany fahifan̈anany* aby raha jiaby.” Kanefa Zan̈ahary koa fa nivolan̈a fa ‘nataony ambany fahifan̈anany aby raha jiaby’, mazava tsarabe fa tsy tafiditry an̈atin’izen̈y Araiky nahavy raha jiaby ambany fahifan̈anany. 28 Fa lera raha jiaby hatao ambany fahifan̈an’ny Zanaka, Zanaka io lastiô han̈eky fahifan̈an’ny Araiky nahavy raha jiaby ambany fahifan̈anany, amy zen̈y Zan̈ahary hanjary raha jiaby amin’olo jiaby.

29 Izikoa tsy zen̈y baka, ino edy hatsaran̈a ho azondrô izikoa irô hatao batisa baka ho foaty? Izikoa olo maty tsy hatsangana foeky, nan̈ino fo basy irô hatao batisa baka ho foaty? 30 Aviô koa, nan̈ino ma zahay mirisiky fahin̈ananay fo?* 31 Isanandra zaho kalikaly ho foaty. Marin̈y ankitin̈y raha zen̈y, rahalahiko aby. Ary ravoravo mare koa zaho fôtony anarô mihavan̈a tsarabe amy Kristy Jesosy Tômpontsika. 32 Izikoa zaho niady tamy biby dỳ ta Efesosy, karaha nataon’ny lelahy sasany,* ino ma hatsaran̈a azoko amy zen̈y? Izikoa olo maty tsy hatsangana, “alô atsika hihinan̈a ndreky higiaka, fôtony amaray atsika ho foaty.” 33 Anarô aza man̈eky ho voafitaka. Naman̈a ratsy mandrobaka fahazaran̈a tsara.* 34 Anarô mila tontohitry ke man̈ano ny marin̈y, aviô aza zatra manota. Olo sasany baka tsy mahay Zan̈ahary foeky. Hampamen̈atra anarô antony hivolan̈ako zen̈y.

35 Kanefa hisy olo hivolan̈a: “Akôry hananganan̈a olo maty? Karakôry ma vatan̈andrô lera irô hatsangana?” 36 Anao tsy mandiniky! Tsy maintsy maty antsendriky raha afafinao zay izy vo velon̈o. 37 Aviô anao koa fa mamafy, tsy raha efa maniry* ny afafinao fa zisty voan-draha fo antsendriky, na voam-barimbazaha eky izio na voan-draha hafa. 38 Fa zio baka iô amezan’ny Zan̈ahary vatan̈a erakan’ny itiavany izy, ia, voan-draha tsiaraikiaraiky samby amezany vatan̈a. 39 Tsisy mitovy nôfotron’ny raha manam-pahin̈ana jiaby: Hafa nôfotron’olombelon̈o, hafa nôfotron’aomby, hafa nôfotron’ny vôron̈o, baka iô hafa nôfotron’ny laoko. 40 Hafa vatan̈an’ny raha an-dan̈itry an̈y, aviô hafa vatan̈an’ny raha ambony tany atỳ. Tsy mitovy voninahitrindrô vatan̈a aby an-dan̈itry an̈y ndreky nindrô vatan̈a aby ambony tany atỳ. 41 Hafa voninahitrin’ny masoandra, hafa voninahitrin’ny fanjava, baka iô hafa voninahitrindrô lakintan̈a aby io. Ny marin̈y aminany, samby isany voninahitrin’ny lakintan̈a tsiaraikiaraiky.

42 Karaha zen̈y koa momba familaoman̈a olo maty. Izio vatan̈a mety lò izikoa fa afafy, fa vatan̈a tsy mety lò ndraiky izio izikoa fa atsangana. 43 Voabaraka izio izikoa fa afafy, fa be voninahitry ndraiky izio izikoa fa atsangana. Malemy izio izikoa fa afafy, fa mahery ndraiky izio izikoa fa atsangana. 44 Vatan̈a erakan’ny nôfotro izio izikoa fa afafy, fa vatan̈a ara-pan̈ahy ndraiky izio izikoa fa atsangana. Izikoa misy vatan̈a erakan’ny nôfotro, dikan’izen̈y misy koa vatan̈a ara-pan̈ahy. 45 Ty baka raha voasoratra: “Adama, lelahy voanalohany, nanjary raha* manam-pahin̈ana.” Adama farany ndraiky nanjary fan̈ahy azahoan̈a fiainan̈a. 46 Kanefa, tsy vatan̈a ara-pan̈ahy ny voanalohany. Fa vatan̈a erakan’ny nôfotro antsendriky, iô amizay vo vatan̈a ara-pan̈ahy. 47 Lelahy voanalohany baka amy tany sady namboarin̈y tamy laposiera,* fa lelahy faharoe ndraiky baka an-dan̈itry. 48 Karaha araiky namboarin̈y tamy laposiera fo irô namboarin̈y tamy laposiera; aviô karaha araiky baka an-dan̈itry fo irô an-dan̈itry an̈y. 49 Karaha ataony atsika mitovy endriky amin’ny araiky namboarin̈y tamy laposiera, atsika koa hitovy endriky amin’ny araiky baka an-dan̈itry.

50 Kanefa, ty raha ambarako anarô, rahalahy aby: Nôfotro ndreky lio tsy afaka mandova Fanjakan̈an’ny Zan̈ahary, aviô raha mety lò tsy afaka mandova raha tsy mety lò. 51 Hitanarô! Anarô an̈ambarako sekire masin̈y ty: Tsy atsika jiaby io ho foaty, fa atsika jiaby samby hivoan̈a 52 an̈atin’ny fotoan̈a fôhiky hely, indraiky mipỳ maso fo, izikoa fa man̈ena trompety farany. Trompety koa fa man̈ena, hatsangana lan̈iany olo maty ke hanjary tsy mety lò, aviô atsika hivoan̈a. 53 Vatan̈a mety lò ty tsy maintsy hiova vatan̈a tsy mety lò, aviô vatan̈a mety maty ty tsy maintsy hiova vatan̈a tsy mety maty. 54 Kanefa lera vatan̈a mety lò ty hanjary tsy mety lò, aviô lera vatan̈a mety maty ty hanjary tsy mety maty, ho tanteraka raha voasoratra ty: “Hifoan̈ana mandrakizay fahafatesan̈a.” 55 “A fahafatesan̈a, aia fandresen̈anao? A fahafatesan̈a, aia raha findesinao mitrebitry* in̈y?” 56 Fahotan̈a io fitrebiky mahavy fahafatesan̈a, aviô baka amy Lalàn̈a angôvon’ny fahotan̈a.* 57 Kanefa atsika man̈ano mersy Zan̈ahary, fôtony atsika amezany fandresen̈a baka amy Jesosy Kristy Tômpontsika.

58 Ke nohon’izen̈y, rahalahiko tiako aby, anarô tôkony hiôrin̈y tsarabe ndreky tsy ho voahozongozon̈o, baka iô ho be atao amin’ny asan’ny Tômpo, fôtony hainarô tsarabe fa tsy very bôriny asa mare ataonarô nin’ny Tômpo.