Taratasy Faharoe Handeha Amindrô Korintianin̈y aby Io
11 Tiako izikoa anarô mba mandefitry aminaka amin’ny halifahan̈a hely ataoko. Ny marin̈y aminany ane anarô efa mandefitry aminaka e! 2 Zaho mamaraha anarô karaha ataon’ny Zan̈ahary mamaraha anarô,* fôtony zaho lastiô nampan̈anten̈a anarô fa anarô hanjary vadin’ny lelahy araiky, tsy azôvy zen̈y fa Kristy. Ke anarô tiako hamezan̈a izy karaha ataon’ny virjiny madio in̈y. 3 Zaho mavozo tsao anarô ho voafitaka karaha i Eva, araiky nifitahin’ny bibilava tamin’ny hafitsian̈a in̈y, ke ho robaka jerinarô aviô anarô tsy han̈araka Kristy amy fô jiaby ndreky amy fahadiovan̈a tôkony man̈eva izy. 4 Izikoa baka misy olo avy ke mitory momba Jesosy hafa ankoatran’ny araiky efa nitorianay, na mampirisiky anarô hanan̈a toe-tsain̈y hafa ankoatran’ny araiky efa nanan̈anarô, na mitory momba vaovao tsara hafa ankoatran’ny araiky efa nikenarô, tsy mampan̈ino anarô mandefitry amin’olo karaha zen̈y. 5 Fahitako izy baka, tsisy raha foeky man̈aboaka fa zaho ambany izikoa ampiran̈iny amindrô apôstôlinarô tsara loatra aby io. 6 Zaho ndray tsy ten̈a mahay mivolan̈a, zaho ndraiky ten̈a manan̈a fahaizan̈a. Efa naboakanay anarô tsarabe raha zen̈y tamy lafiny jiaby ndreky tamy raha jiaby.
7 Ravoravo zaho nan̈ambara vaovao tsara momba Zan̈ahary taminarô, ary anarô tsy nangalako vola foeky. Ke nanota ma zaho izikoa zaho nanetry ten̈a baka anarô hampanongain̈a? 8 Karaha raha namaky fiangonan̈a hafa in̈y zaho izikoa fa nan̈eky nampiandrô,* misy hanompoako anarô. 9 Kanefa tamy zaho niaraka taminarô ndreky tamy zaho sahiran̈a in̈y, zaho tsy nanahiran̈a olo foeky, ndray azôvy zen̈y ndray azôvy, fôtony irô rahalahy baka a Makedonia eto nan̈amia raha nilaiko, salakady maro koa. Ia, zaho nifen̈y fo baka tsy hanahiran̈a anarô tamy lafiny jiaby, ary zaho mbala hifen̈y fo han̈ano zen̈y. 10 Izikoa mbala aminaka ato fo fahamarin̈anan’i Kristy, zaho tsy vôly hirehareha momba irô faritry a Akaia an̈y. 11 Fôtony nan̈ino? Fôtony anarô tsy tiako? Zan̈ahary mahay fa anarô tiako.
12 Fa tohizako fo raha efa ataoko ziô io, amy zen̈y hifody vavandrô olo aby mitady antony han̈aporofoan̈a fa irô miran̈a zahay misy hireharehandrô amy raha vitandrô.* 13 Olo karaha zen̈y baka apôstôly sandoko ndreky mpiasa mamitaka aviô miaboko ho apôstôlin’i Kristy. 14 Raha zen̈y tsy mahagaga, fôtony ndray Satana fo miaboko ho* anjelin’ny mazava. 15 Ke tsy mahagaga izikoa irô mpanomponany aby io koa mba miaboko ho mpanompon’ny fahamarin̈ana. Kanefa arakaraka raha ataondrô fo hiafarandrô.
16 Tsisy olo tôkony hieritreritry fa zaho ty olo adala. Fa ndray misy aminarô mieritreritry karaha zen̈y, ikia fo zaho ndray adala, amy zen̈y zaho koa mba hanan̈a antony hely hireharehan̈a. 17 Fa zaho mivolan̈a zen̈y ziô io tsy raha man̈araka môdelin’ny Tômpo, fa mivolan̈a karaha olo adala, matoky ten̈a loatra sady mirehareha. 18 Maro baka olo mirehareha erakan’ny nôfotro,* ke zaho koa mba hirehareha. 19 Anarô baka ny farany “misain̈y”, ke ravoravo anarô mandefitry amin’olo adala. 20 Ia, anarô mandefitry amin’olo man̈andevo anarô, mandany fanan̈ananarô, mandrava raha anan̈anarô, man̈ano irô an̈abo mandilatra anarô, ndreky mamango tefaka saoranarô.
21 Mangala baraka zahay volan̈anaka zen̈y, fôtony raha zen̈y karaha man̈aboaka fa zahay malemy.
Kanefa raha sakin’olo—mivolan̈a karaha olo adala zaho zen̈y—mba sakiko koa. 22 Irô ma Hebreo? Zaho koa. Irô ma Israelita? Zaho koa. Irô ma taranakan’i Abrahama? Zaho koa. 23 Irô ma mpanompon’i Kristy? Karaha olo lefaka zaho mamaly fa zaho koa mba mpanompon’i Kristy, ary mbala miavaka mandilatra irô: Mbala maromaron’ny asa nataondrô asa nataoko, zaho ny ten̈a matetiky nampidirin̈y prizon, baka iô tsy avoa kônty foeky popoko navoa zaho, aviô impirimpiry zaho efa tseky naty. 24 Indimy aby irô Jiosy aby io namopoko zaho in-40 latsaka araiky, 25 Intelo aby zaho nipopòn̈a tamy kakazo, indraiky zaho nitorotorahan̈a vato, intelo zaho vaky sambo, alin̈y araiky ndreky andra araiky zaho tavela tan-dranomasin̈y; 26 zaho matetiky nan̈ano dia lavitry, tseky nidiran’andra tamy ten̈arano, tseky nidiran’andra tamy mpandrava, tseky nidiran’andra tamin’olo firenena araiky aminaka, tseky nidiran’andra tamin’olo hafa firenena, tseky nidiran’andra tan-tanàna, tseky nidiran’andra tan-tany paiky, tseky nidiran’andra tan-dranomasin̈y, tseky nidiran’andra tamindrô rahalahy sandoko aby io. 27 Zaho niasa mare salakady nifen̈y angôvo jiaby, matetiky tsy nahita tôro, silaon̈o ndreky sakara, matetiky tsisy hanin̈y, nanintsy aviô tsisy lamba.*
28 Sôsoko raha ambelan̈a aby zen̈y, misy raha koa mampiasaloha zaho isan’andra: Zaho miasaloha momba fiangonan̈a jiaby. 29 Azôvy ma malemy ke zaho tsy malemy? Azôvy ma voatsikon̈o* ke zaho tsy meloko mare?
30 Izikoa zaho tsy maintsy mirehareha, zaho hirehareha amindrô raha man̈aboaka fahalimian̈anaka aby io. 31 Zan̈ahary Baban’i Jesosy Tômpo, Araiky tôkony derain̈a mandrakizay, mahay fa zaho tsy mavandy. 32 Niambesan’ny governera nitindren’ny mpanjaka Areta tsarabe tanànan’ny Damaskosy misy hanambaoran̈a zaho, 33 kanefa irô rahalahy aby io nampiasa antômby nampijotsoan̈a zaho baka tamy lafenaitra tamy riban’ny tanàna io, ke zaho tafilefa.