Taratasy Handeha Amindrô Galatianin̈y aby Io
6 Rahalahy aby, izikoa misy olo man̈ano raha tsy mety kanefa tsy hainy aby, anarô kristianin̈y matotro* tôkony hifen̈y han̈itsy izy amin-katsaram-pan̈ahy. Ndray izy man̈ano zen̈y, mitandrema fo tsao anao koa mba ho latsaka an̈atin’ny fandriky. 2 Aza vôly mifan̈ampy izikoa fa misy raha sarotro, fôtony izikoa anarô man̈ano zen̈y, anarô han̈atanteraka lalàn̈an’i Kristy. 3 Izikoa misy olo mihevitry izy ho raha kanefa izy tsisy dikany, izy mamita-ten̈a. 4 Olo tsiaraikiaraiky samby tôkony handiniky raha ataony, fa tsy hampiran̈a ain̈inany amin’olo hafa, amy zen̈y izy ho ravoravo amy raha ataony. 5 Fôtony kila olo samby hitondra entan̈anany.*
6 Sôsoko zen̈y koa, lan̈iany olo ampianarin̈y* volan̈an’ny Zan̈ahary tôkony handrasa* raha tsara jiaby amin’olo mampianatra* izy.
7 Anarô aza man̈eky ho voafitaka. Zan̈ahary tsy mety ankadalain̈a. Zay raha afafin’olo fo bakà hijinjainy, 8 fôtony lan̈iany olo mamafy eraka fan̈irian-dratsin’ny nôfotronany hijinja raha ratsy* baka amy fan̈irian-dratsin’ny nôfotronany, fa lan̈iany olo mamafy amy fan̈ahy ndraiky hijinja fiainan̈a mandrakizay baka amy fan̈ahy. 9 Ke alô atsika tsy ho rivan̈a han̈ano ny tsara, fôtony amy fotoan̈a mety atsika hijinja vokatran’izen̈y izikoa atsika tsy kajo.* 10 Ke izikoa mbala azontsika atao,* atsika tôkony han̈ano ny tsara amin’olo jiaby, intsaka eky amin’olo finoan̈a araiky amintsika.
11 Zahava bakà habezan’ny soratra nisoratin’ny tan̈ako amy taratasy handeha aminarô ty!
12 Irô olo jiaby mila sitraka amin’olo* aby io fo izy mifaorse anarô hivosirin̈y io. Kanefa irô man̈ano zen̈y fôtony irô tsy tiandrô hinjehin̈y baka amin’ny hazofijalian̈an’i* Kristy. 13 Irô olo aby io ndray voavositry, irô tsy mitandrin̈y Lalàn̈a, fa anarô tiandrô hivosirin̈y, amy zen̈y irô hahavita hirehareha momba anarô.* 14 Kanefa irarian̈a zaho tsy hirehareha foeky izikoa tsy momba hazofijalian̈an’i* Jesosy Kristy Tômpontsika fo. Fahitako izy bakà, baka taminany nahavy donia ty nivonen̈a,* fa fahitan’ny donia ty izy ndraiky, baka taminany nahavy zaho nivonen̈a. 15 Ny raha maventy tsy oe voavositry na tsy voavositry, fa oe zavaboary vaovao. 16 Irarian̈a lan̈iany olo man̈araka tsarabe* fitsipiky momba fitondran-ten̈a zen̈y, tsy azôvy zen̈y fa Israelin’ny Zan̈ahary, hahazo fiadanan̈a ndreky famindram-pô.
17 Ke manomboko iziô, tsisy olo tôkony han̈ano raha mampanahiran̈a zaho, fôtony amy vatan̈anaka zaho mitondra lamariky mankamarin̈y fa zaho mpanompon’i Jesosy.
18 Rahalahy aby, irarian̈a Jesosy Kristy Tômpontsika han̈aboaka hatsaram-pan̈ahy miavaka aminarô, nohon’ny toe-tsain̈y tsara anan̈anarô. Ameny.