Vaovao Tsara Nisoratin’i Lioka
8 Tsy ela tafaran’izen̈y, izy nandeha nitety tanàbe ndreky tambanivolo, nitory ndreky nan̈ambara vaovao tsara momba Fanjakan̈an’ny Zan̈ahary. Niaraka taminany irô 12 Lahy aby io 2 ndreky man̈angy sasany efa niboahan’ny* fan̈ahy ratsy ndreky efa janga tamin’ny aretin̈y nahazo irô: Maria kahian̈a Magdalena, araiky niboahan’ny demony fito; 3 Johana vadin’i Koza mpiandraikitry raha tan-tran̈on’i Heroda; Sosana; aviô man̈angy maro hafa koa. Irô io samby nampiasa fanan̈anandrô hikarakaran̈a Jesosy ndreky mpianatranany.
4 Nisy vahoaka marobe vory taminany tiô, niaraka tamin’olo baka tamy tanàna isan-karazany. Ty fan̈oharan̈a nikoran̈iny tamindrô: 5 “Nisy mpamafy niboaka hamafy voam-barinany.* Izy koa fa namafy, sasany tamy voam-bary aby io latsaka tamôron-dalan̈a ke navoadiadia, baka iô nisy vôron̈o navy nihinan̈a irô io. 6 Sasany ndraiky latsaka tamy lampimbato, kanefa nalazo voam-bary aby io koa fa naniry fôtony tsisy rano. 7 Sasany ndraiky latsaka tan̈atin’ny raha maniry feno fatsiky; irô io niaraka naniry tamy raha maniry feno fatsiky aby io ke rakotro tao voam-bary vo naniry aby io. 8 Fa voam-bary sasany ndraiky latsaka tamy tany tsara, ke irô io koa fa nitombo, samby nazahoan̈a voany 100.” Izy koa fa baka nivolan̈a raha aby zen̈y, izy nivolan̈a mare karaha ty: “Lan̈iany manan̈a sofin̈y hindesin̈y mitandren̈y, mitandrin̈esa.”
9 Irô mpianatranany aby io nan̈ontany izy dikan’ny fan̈oharan̈a in̈y. 10 Ke ho izy: “Anarô nimboan̈a hahay dikan’ny sekire masin̈y momba Fanjakan̈an’ny Zan̈ahary, fa amin’olo hafa aby io ndraiky, fan̈oharan̈a ikoran̈ako amindrô. Amy zen̈y ndray irô mizaha, tsisy raha ho hitandrô; aviô ndray irô maharen̈y, tsy ho haindrô aby dikan’ny raha ren̈indrô. 11 Ty dikan’ny fan̈oharan̈a in̈y: Voam-bary in̈y volan̈an’ny Zan̈ahary. 12 Voam-bary aby tamôron-dalan̈a in̈y miran̈a amin’olo aby maharen̈y hafatra io, kanefa baka iô avy Devoly man̈ombotro izio an̈atin’ny fôndrô ao, amy zen̈y irô tsy hino ke tsy ho avotro. 13 Irô tan̈abon’ny lampimbato aby in̈y ndraiky koa fa maharen̈y hafatra io, ravoravo irô man̈eky izio, fa irô fo tsisy vahatra. Mino hely irô an̈atin’ny fotoan̈a fôhiky, kanefa izikoa fa avy fotoan̈an’ny fitsapan̈a, irô efa vôly* edy. 14 Aviô irô latsaka tamy raha maniry feno fatsiky aby in̈y, olo maharen̈y hafatra io, kanefa rikian̈a irô azon’ny asaloha, ndreky harian̈a, baka iô plezira misy amy fiainan̈a ty. Hafatra io amizay rakotro tsy hita foeky* ke manjary tsy mamoa. 15 Fa irô tamy tany tsara aby in̈y ndraiky, miran̈a amin’olo manan̈a fô tsara ndreky madio, ke irô koa fa maharen̈y hafatra io, izio ajarisindrô an̈atin’ny fôndrô, aviô irô mamoa sady miaritry.
16 “Tsisy olo, izikoa fa baka mamelon̈o lalampon̈o, handrakotro izio amy raha na han̈ano izio ambanin’ny fandrian̈a. Fa izio ataony amy plasy fasian̈a lalampon̈o, amy zen̈y olo miditry ao hahita hazavan̈a. 17 Fôtony tsisy raha asitriky ke tsy mbala haboaka, na raha asitriky farany mare ke tsy ho hay foeky na tsy hibolain̈y. 18 Ke tandrema tsarabe fomba fitandrin̈esanarô, fôtony lan̈iany olo manan̈a, mbala hamezan̈a beben’ny efa anan̈any; fa lan̈iany olo tsy manan̈a ndraiky, ndray raha iritriretiny fa anan̈any fo mbala hadoso aminany.”
19 Tamy zen̈y, navy mamany ndreky rahalahiny aby io, fa irô fo tsy nahavita nan̈aton̈o narikitry izy fôtony naro loatra olo. 20 Ke nisy olo nivolan̈a taminany: “Mamanao ndreky irô rahalahinao aby io mitsangana an-tany ao. Irô zen̈y tihahita anao.” 21 Ho izy tamindrô: “Irô olo aby mitandren̈y ndreky man̈araka volan̈an’ny Zan̈ahary aby ty mamako ndreky rahalahiko.”
22 Tandraraiky izy ndreky mpianatranany aby io niondran̈a sambo; ho izy tamindrô: “Alô atsika hitsaka andaforehin’ny matsabory arỳ.” Ke irô nandeha. 23 Fa tamin’irô mbala nanohy diandrô tan̈atin’ny sambo in̈y, izy tafandry. Naresaka mare tsiko tamy matsabory io, ke nahaifeno rano fo sambondrô, aviô efa mila ho dobo foeky. 24 Ke irô nan̈aton̈o izy aviô izy nifohazindrô karaha ty: “Mpampianatra, a Mpampianatra, atsika kony ho foaty ay!” Ke izy nitsangana, baka iô nivolan̈iny mare tsiko ndreky rano mihetsiky be in̈y, ke vôly. Nanjary kalma amizay andra. 25 Baka iô ho izy tamindrô: “Aia loatra ma finoan̈anarô?” Fa irô navozo mare salakady lany fan̈ahy, ke ho irô samby irô: “Azôvy marin̈y izy ty? Firaka amy tsiko ndreky rano amezany beko, ke man̈araka volan̈anany!”
26 Irô baka iô navy tamy faritry nisy irô Gerasianin̈y aby io, fananjò Galilia. 27 Jesosy koa fa nijotso ke nandeha tantety, izy fanôjy lelahy araiky baka tamy tanàna io tao. Lelahy io nisy demony salakady efa ela mare izy tsy nisikiny lamba, aviô izy tsy nipetraka tamy tran̈o fa nidôko tam-pasan̈a tan̈y fo. 28 Jesosy koa fa tsinjony, niafatrafatra izy baka iô nandohaliky nan̈oloan̈a izy tiô ke nandronton̈o mare karaha ty: “Ino ma dianao atỳ, Jesosy Zanakan’ny Zan̈ahary Farany An̈abo? Mafadiana, aza ampijalian̈a kony zaho ô!” 29 (Fôtony baka, Jesosy efa nan̈iraka fan̈ahy maloto io hiboaka baka tamy lelahy io. Efa matetiky lelahy io nidiran’izio, aviô efa matetiky tan̈ananany ndreky vitinany nifihezin̈y tamy silisily ndreky gadra vy, baka iô nasian̈a olo koa niambin̈y izy. Kanefa nitosahany tan̈y raha namihezan̈a izy, aviô izy nindesin’ny demony io tamy tany mitaokan̈a.) 30 Fa Jesosy nan̈ontany izy: “Azôvy an̈aran̈anao?” Ho izy: “Andian-tafiky”, fôtony maro demony niditry taminany tao. 31 Ke irô tsy vôly niangavy izy baka izy tsy han̈iraka irô handeha an̈atin’ny lavaka tsy hita farany.* 32 Nisy komankory marobe nihinan̈a tsy lavitry bongo tiô, ke demony aby io niangavy izy baka irô hamezany lalan̈a hiditry amindrô komankory aby io. Ke irô nimboany han̈ano zen̈y. 33 Irô demony aby io baka tiô niboaka, aviô irô niditry tamy komankory aby io. Komankory aby io amizay nilomoay namarantan̈a tamy fampan̈a tamy matsabory tan̈y, ke naty an-drano. 34 Izikoa fa hitandrô tsiman̈ajan’ny komankory aby io raha nandalo in̈y, irô nilefa, aviô lôso irô nitantara raha zen̈y tamin’olo tan-tanàna tao ndreky tambanivolo.
35 Ke irô olo aby io niboaka hizaha raha nandalo. Irô navy tamy Jesosy tiô. Lelahy niboahan’ny demony in̈y hitandrô niaraka nipetraka taminany tiô, efa misikin̈y lamba sady efa ao tsara jerinany. Ke irô navozo. 36 Nitantaraindrô olo aby nahita raha nandalo tiô tamindrô fomba nampajanga lelahy nisazaohan’ny demony in̈y. 37 Ke nisy olo maro baka tamy faritry nisy irô Gerasianin̈y aby io niangavy Jesosy hiala tamindrô tiô, fôtony irô navozo mare. Niondran̈a sambo izy, ke lôso. 38 Kanefa, lelahy niboahan’ny demony in̈y tsy vôly niangavy Jesosy han̈ambela izy hiaraka aminany, fa lelahy io nirahiny nandeha sady ho izy taminany: 39 “Mindao anao mody aminarô an̈y, baka iô tantarà amin’olo jiaby raha nataon’ny Zan̈ahary taminao.” Ke lôso izy nitety tanàna io, nan̈ambara raha nataon’i Jesosy taminany.
40 Jesosy koa fa tafimpody, niraisindrô vahoaka aby io tsarabe izy, fôtony olo jiaby efa niambin̈y izy. 41 Fa indriô nisy lelahy kahian̈a Jairo navy; izio mpiandraikitry synagoga. Lelahy io nantaoraka tamy vitin’i Jesosy, salakady niangavy izy handeha an-tran̈onany an̈y, 42 fôtony efa ho foaty zanakanany man̈angy kadiriny 12 taon̈o. Izio zaraiky fo zanany.
Jesosy koa fa nandeha, irô vahoaka aby io nifanefisefy nan̈araka izy. 43 Nisy man̈angy zay nandeha lio tan̈atin’ny 12 taon̈o; tsisy olo foeky nahavita nampajanga izy. 44 Viavy io nan̈aton̈o baka tafara aviô nikasiky kirômborômbo tamy lambanany ambelan̈a, ke lionany nandeha in̈y direkty vôly. 45 Ke ho Jesosy: “Azôvy nikasiky zaho tiô in̈y?” Kanefa tsisy olo nan̈ano nikasiky izy foeky, ke ho Petera: “Mpampianatra, maro kony vahoaka man̈odidin̈y anao ndreky mifanefisefy aminao ay!” 46 Fa ho Jesosy: “Nisy olo nikasiky zaho, fôtony ren̈iko nisy angôvo niala taminaka.” 47 Izikoa fa hitan’ny man̈angy io fa nisy olo nahay raha nataony, nangôrohôro izy nan̈aton̈o baka iô nandohaliky nan̈oloan̈a Jesosy. Nan̈oloan̈a olo jiaby tiô izy nitantara antony nahavy izy nikasiky Jesosy ndreky fomba nampajanga izy tiô ny iô. 48 Fa ho Jesosy taminany: “Zanako, finoan̈anao nampajanga anao. Mindao fa aza miasaloha.”
49 An̈atiny izy mbala mivolan̈a fo, nisy solonten̈an’ny mpiandraikitry synagoga io navy ke nivolan̈a: “Zanakanao naty; aza tabatabain̈a eky Mpampianatra.” 50 Ren̈in’i Jesosy raha zen̈y, ke ho izy taminany: “Anao aza mavozo. Manàn̈a finoan̈a fo fa, ho avotro izy.” 51 Izy koa fa navy tamy tran̈o io, tsisy olo nambelany hiaraka taminany foeky izikoa tsy Petera, Jaona, ndreky Jakoba, aviô baban’ny tsaiky io ndreky reniny. 52 Nitomoan̈y aby olo jiaby sady namango tratra fôtony irô nahinakinaka tsaiky io. Fa ho Jesosy: “Aza mitomoan̈y eky, fôtony tsaiky io tsy maty fa mandry.” 53 Ke izy nimoezandrô,* fôtony haindrô fa tsaiky io maty. 54 Kanefa tan̈anan’ny tsaiky man̈angy io nisambôriny, baka iô ho izy taminany: “A tsaiky ty, mitsangàna!” 55 Ke nimpody ndraiky fahin̈anan’ny* tsaiky io aviô izy direkty nianko, baka iô izy nirahin’i Jesosy namezan̈a raha hoanin̈y. 56 Ravoravo angôvo jiaby raimandrenin’ny tsaiky io, fa irô fo namezan’i Jesosy beko tsy hikoran̈a raha nandalo io amin’olo foeky.