Taratasy nisoratin’i Jakoba
5 Anarô mpan̈arivo aby io, anarô mitoman̈iza ndreky miafatrafara, fôtony anarô io hijaly mare. 2 Fanan̈ananarô efa lò, aviô lambanarô efa lanin’ny kàka. 3 Volamenanarô ndreky volafotsinarô efa rofesin̈y mare, ary rofesin̈y amindrô raha aby io han̈ampanga anarô ndreky hihinan̈a nôfotronarô. Hanjary karaha môtro amin’ny andra farany in̈y raha navorinarô. 4 Irô mpiasa aby nampiasainarô hamory vokatra tamy tsabonarô aby in̈y tsy vôly mitarain̈y, fôtony tsy nifainarô karamandrô. Navy ampôti-tsofin̈in’i Jehovah Tômpin’ny tafiky tarain̈indrô ndreky tretrendrô nila vonjy zen̈y. 5 Anarô niadan̈a mare sady nan̈eram-pô nan̈ano zay raha tianarô ambony tany eto. Aviô anarô* nihinan̈a ke nanjary vondraka mare, karaha biby ankavondrahin̈y parapavian’ny andra hamonoan̈a izy in̈y. 6 Anarô nan̈ameloko ndreky namono olo marin̈y. Zen̈y mahavy izy manohitry anarô.
7 Ke anarô, rahalahy aby, mifen̈a hanan̈a faharetan̈a parapavian’ny fotoan̈a himpodianan’ny Tômpo. Zahavanarô bakà irô mpambôly aby io! Irô tsy vôly miambin̈y fotoan̈a hiboahan’ny vokatra maro tsara* baka amy tany. Ia, irô mahadin̈y miambin̈y fo rango amy fanombohan’ny asara firaka amin’ny asara vita. 8 Anarô koa mba mifen̈a hanan̈a faharetan̈a; aviô hankafatara fônarô, fôtony efa marikitry fotoan̈a himpodianan’ny Tômpo.
9 Rahalahy aby, anarô aza min̈on̈on̈o* aminarô samby anarô,* amy zen̈y anarô tsy hitsarain̈a. Zahavanarô bakà! Mpitsara kony efa mitsangana am-baravaran̈a io ay! 10 Rahalahy aby, alaivanarô tahaka irô mpaminan̈y nivolan̈a tamin’ny an̈aran̈an’i Jehovah aby io, fôtony irô tsy vitan’ny niatriky raha sarotro fo fa mbala nanan̈a faharetan̈a koa. 11 Atsika afaka mivolan̈a fa sambatra* irô olo nahavita niaritry aby in̈y. Efa ren̈inarô fa Joba nahavita niaritry, ke maro hatsaran̈a namezan’i Jehovah izy. Hita baka amy zen̈y fa, Jehovah ten̈a be fitiavan̈a* sady mamindra fô ankitin̈y.
12 An̈abon’ny raha jiaby, rahalahiko aby, anarô voleza mifanta, na amy lan̈itry zen̈y, na amy tany, na amy raha hafa. Aviô volan̈anarô koa fa “Ia” tôkony ia, izikoa fa “Ehe” tôkony ehe, amy zen̈y anarô tsy hitsarain̈a.
13 Aminarô ao ma misy olo miaritry ny mafy? Izy tôkony hivavaka fo. Misy olo ravoravo ma ao? Ambilà izy han̈ano hira fideran̈a.* 14 Aminarô ao ma misy olo marary? Izy mila mikaiky anti-pan̈ahin’ny fiangonan̈a, baka irô hivavaka ndreky han̈ôsotro menaka aminany, amin’ny an̈aran̈an’i Jehovah. 15 Vavaka atao am-pinoan̈a karaha zen̈y hampajanga olo marary* io, ary Jehovah han̈arin̈y izy. Aviô, izikoa olo io nanota, Zan̈ahary han̈ambela hadisovan̈a nataony.
16 Anarô tôkony hifamaosa fahotan̈a nataonarô, baka iô anarô tôkony hifampivavaka, amy zen̈y anarô ho janga. Vavaka fiangavian̈a ataon’olo marin̈y bakà misy vokany mare sady ten̈a mahavita man̈ampy olo.* 17 Elia olombelon̈o karaha atsika,* kanefa izy koa fa nivavaka mare beky mahalen̈y tsy ho latsaka, tsy latsaka ankitin̈y mahalen̈y tamy tany io tan̈atin’ny telo taon̈o sy tsiota fanjava. 18 Izy baka tiô nivavaka ndraiky koa, ke latsaka mahalen̈y, aviô tany io namokatra.
19 Rahalahy aby, izikoa misy araiky aminarô voafitaka ke miala amy fahamarin̈ana, aviô misy olo mahavita mampimpody izy, 20 tsara hainarô fa olo mahavita mampimpody izy, ndreky man̈ampy izy hiala tamy raha ratsy nataony io hamonjy olo mpanota io tsy ho foaty, sady hanaron̈o fahotan̈a marobe.