Taratasy Voanalohany Handeha Amindrô Korintianin̈y aby Io
3 Ke, rahalahy aby, zaho tsy nahavita nikoran̈a taminarô karaha atao mikoran̈a amin’olo erakan’ny fan̈ahy, fa karaha amin’olo erakan’ny nôfotro, ia, karaha mikoran̈a amy tsaiky hely amy Kristy ao. 2 Anarô nampigiako ronono fa tsy nampihinaniko hanin̈y mahery, fôtony anarô mbala tsy fatatra tsarabe. Ary firaka ziô anarô mbala tsy fatatra fo, 3 fôtony anarô mbala erakan’ny nôfotro. Izikoa anarô samby anarô be fô sady mankany, tsy olo erakan’ny nôfotro edy anarô zen̈y sady man̈ano raha karaha fataon’olo amy donia ty? 4 Fa lera sasany mivolan̈a: “Zaho nin’i Paoly”, fa sasany ndraiky mivolan̈a: “Zaho nin’i Apolosy”, tsy miran̈a amy raha ataon’olo amy donia ty fo raha ataonarô zen̈y?
5 Sady, ino ma i Apolosy? Aviô, ino ma i Paoly? Mpanompo nan̈ampy anarô hanjary mpino fo kony irô io ay, eraka fanompoan̈a namezan’ny Tômpo irô tsiaraikiaraiky. 6 Zaho nambôly, Apolosy nandrôzy, fa Zan̈ahary ndraiky tsy vôly nampitombo; 7 ke tsy araiky mambôly na araiky mandrôzy ny ten̈a raha,* fa Zan̈ahary araiky mampitombo. 8 Araiky fo olo* mambôly ndreky olo mandrôzy io, kanefa irô samby hahazo valisoandrô arakaraka asa mare nataondrô. 9 Fôtony zahay io mpiara-miasa amy Zan̈ahary, baka iô anarô io vilon’ny Zan̈ahary ndreky tran̈o aôrin̈in’ny Zan̈ahary.
10 Eraka hatsaram-pan̈ahy miavaka naboakan’ny Zan̈ahary taminaka, zaho nan̈apetraka fôtotro, karaha fataon’ny mpan̈amboatra tran̈o araiky ten̈a mahay,* kanefa olo hafa man̈ôrin̈y an̈abon’izio. Ke olo tsiaraikiaraiky tôkony hitandrin̈y fo amy fomba han̈oren̈any raha an̈abon’ny fôtotro io. 11 Fôtony tsisy olo afaka man̈apetraka fôtotro hafa ankoatran’ny araiky efa napetraka io, tsy azôvy zen̈y fa Jesosy Kristy. 12 Izikoa misy olo man̈ôrin̈y amy fôtotro io ke mampiasa volamena, volafotsy, vatosoa, kakazo, bozaka, na mololo, 13 ho hita tsarabe* asan’olo tsiaraikiaraiky lera avy andra fisedran̈a, fôtony môtro han̈abaribary izio, ke môtro io han̈aboaka man̈ano akôry aby asan’olo tsiaraikiaraiky. 14 Izikoa raha naôrin̈in’olo araiky mbala tavela an̈abon’izio iô fo, izy hahazo valisoa. 15 Fa izikoa may asanany, izy ho matiantoko. Izy ndraiky ho avotro, kanefa izy ho karaha raha navaotan̈a baka tan̈atin’ny môtro.
16 Tsy hainarô ma fa anarô io tempolin’ny Zan̈ahary aviô fan̈ahin’ny Zan̈ahary an̈atinarô ao? 17 Izikoa misy olo mandravan̈a tempolin’ny Zan̈ahary, izy haripakan’ny Zan̈ahary; fôtony masin̈y tempolin’ny Zan̈ahary, ary anarô lastiô tempoly zen̈y.
18 Aza misy mamita-ten̈a: Izikoa misy aminarô mihevi-ten̈a fa izy misy jery amy donia ty,* ambilà izy hanjary adala, amy zen̈y izy hanjary misy jery. 19 Fôtony amy Zan̈ahary, halifahan̈a fahendrenan’ny donia ty; ty baka raha voasoratra: “Hafitsian̈an’olo misain̈y fo amandrihany izy.” 20 Aviô koa: “Jehovah mahay fa tsisy dikany raha iritriretin’olo misy jery aby io.” 21 Ke, aza mirehareha momba olo; fôtony ninarô aby raha jiaby: 22 Na i Paoly zen̈y, na i Apolosy, na i Kefasy,* na donia ty, na fiainan̈a, na fahafatesan̈a, na raha ziôty, na raha ho avy. Ninarô aby raha jiaby. 23 Anarô ndraiky nin’i Kristy, fa Kristy ndraiky nin’ny Zan̈ahary.