Taratasy handeha amindrô he Letter to the Filipianin̈y aby io
1 Baka amy Paoly ndreky Timoty, mpanompon’i Kristy Jesosy, handeha amy mpianatran’i Kristy Jesosy ndreky olo masin̈y jiaby a Filipỳ an̈y, an̈isan’izen̈y anti-pan̈ahy* ndreky mpikarakara fiangonan̈a:
2 Irarian̈a Zan̈ahary Babantsika ndreky Jesosy Kristy Tômpo han̈aboaka hatsaram-pan̈ahy miavaka* aminarô sady han̈amia anarô fiadanan̈a!
3 Zaho tsiary tsy man̈ano mersy Zan̈aharinaka isaka zaho mahatsiaro anarô. 4 Zaho ravoravo fo isaka zaho mivavaka mare ninarô jiaby, 5 fôtony anarô nifen̈y mare nan̈ambara vaovao tsara ndreky nahavy zio nahainiparitaka fo, rango tamin’ny andra voanalohany* firaka ziôty. 6 Ty bakà raha atokisako: Zan̈ahary efa nanomboko nan̈ano asa tsara taminarô, ke izy hankefa asa io parapavian’ny andran’i Kristy Jesosy. 7 Rariny izikoa zen̈y raha iritriretiko momba anarô, fôtony anarô tiako mare.* Anarô koa bakà mba nan̈aboahan̈a hatsaram-pan̈ahy miavaka karaha zaho ke anarô nan̈ampy zaho, na tamy zaho nigadra zen̈y, na tamy zaho niaro vaovao tsara, na tamy zaho nifen̈y hahazo zò ara-dalàn̈a han̈ambara zio.
8 Zan̈ahary vavolombelon̈o fa zaho ten̈a ngaoma anarô jiaby, fôtony anarô tiako mare karaha itiavan’i Kristy Jesosy anarô koa. 9 Ke zaho tsy vôly hivavaka baka hahaihitombo fo fitiavan̈anarô, aviô baka ho hainarô tsara sady hazava aminarô tsarabe sitrapôn’ny Zan̈ahary. 10 Mivavaka fo koa zaho baka ho hainarô ino raha ten̈a maventy, amy zen̈y anarô tsy hisy tsin̈y sady tsy hampalemy finoan̈an’olo* sasany, parapavian’ny andran’i Kristy. 11 Amy zen̈y koa Jesosy Kristy han̈ampy anarô ho feno vokatran’ny fahamarin̈ana, ke raha zen̈y hahavy Zan̈ahary hahazo dera ndreky voninahitry.
12 Ke tiako ho hainarô, rahalahy aby, fa raha andalaovako ziôty io nahavy vaovao tsara nahainiparitaka fo. 13 Nanjary hain’olo jiaby an̈isan’ny Maramila Mpiambin̈y Kaisara ndreky olo hafa jiaby* fa, baka amy zaho mino Kristy mahavy zaho migadra. 14 Ke azon’ny zaho migadra, ankamaraozandrô rahalahy aby io* nanjary nahazo angôvo. Mahaimisy korazy fo koa irô mitory volan̈an’ny Zan̈ahary sady tsy mavozovozo foeky man̈ano zen̈y.
15 Marin̈y ndraiky fa olo sasany mitory momba Kristy fôtony irô be fô ndreky tia mifan̈oesa, fa antony tsara ndraiky mahavy olo sasany mitory. 16 Ia, baka amy fitiavan̈a mahavy irô mitory momba Kristy, fôtony haindrô fa zaho voatendry hiaro vaovao tsara. 17 Tsy antony tsara ndraiky mahavy irô olo be fô ndreky tia mifan̈oesa aby io mitory, fa irô raha tihimalo* fo. Irô bakà tihampidriky prôblemo aminaka, kanefa zaho efa mifehy silisily. 18 Fa zen̈y tsy man̈ino. Ndray izy man̈ano zen̈y ane, na antony tsara na antony ratsy mahavy irô mitory, sabo efa ren̈in’olo fitorian̈a momba Kristy, ke raha zen̈y mamparavoravo zaho. Sady zaho mbala ho ravoravo fo, 19 fôtony haiko fa zaho ho voavonjy baka amy fiangavian̈a ataonarô ndreky fan̈ampian’ny fan̈ahin’i Jesosy Kristy. 20 Zaho matoky tsarabe sady man̈anten̈a fa zaho tsy ho men̈atra foeky, ke zaho tsy havozo hivolan̈a, amy zen̈y baka aminaka* hahavy Kristy hahazo voninahitry, karaha ela jiaby zay firaka ziôty, na velon̈o eky zaho na maty.
21 Fa izikoa zaho edy: Velon̈o zaho, nin’i Kristy; maty zaho, mahazo tombony. 22 Ke zaho koa mbala velon̈o,* zaho hahavita hamokatra fo amin’ny asanaka. Kanefa, izikoa kabaron’ny ho foaty va ho velon̈o zen̈y, tsy ambarako aia hifidiko. 23 Vakivaky lohanaka mandiniky safidy aroe io, fôtony zaho ten̈a tiho afaka amy vatan̈a ty ke hiaraka amy Kristy; ary zaho matoky fa zen̈y mbala tsara lavitry. 24 Kanefa, tsaratsara aminany zaho midôko amy vatan̈a ty, fôtony zen̈y ny ten̈a mahatsara anarô. 25 Atokisako raha zen̈y, ke haiko fa zaho mbala ho velon̈o sady mbala hiaraka aminarô jiaby fo, baka anarô hahaihahavita be fo amy fanompoan̈a Zan̈ahary ndreky ho ravoravo fôtony anarô mino; 26 amy zen̈y baka aminaka hahavy fatokisanarô Kristy Jesosy hitombo, lera zaho tafiaraka aminarô ndraiky.
27 Aboaha amy fomba fiainan̈anarô fa anarô mpan̈ambara* vaovao tsara momba Kristy, amy zen̈y, na ho avy an̈y eky zaho ke hahita anarô, na zaho tsy an̈y, ho ren̈iko fa anarô miôrin̈y tsarabe sady miray sain̈y karaha olo araiky, baka iô mifan̈ampy beky anarô hino vaovao tsara fo, 28 aviô tsy man̈eky hampitahôrin’ny fahavalonarô foeky. Zen̈y bakà porofo fa irô io haripaka, fa anarô ndraiky hivonjen̈a; ary raha zen̈y baka amy Zan̈ahary. 29 Anarô bakà tsy raha namezan̈a voninahitry hino Kristy fo, fa hijaly baka aminany koa. 30 Anarô mandalo raha sarotro karaha lay nandalaovako, ary eraka raha ren̈inarô, mbala zen̈y fo raha iain̈ako firaka ziôty.