Taratasy Handeha Amindrô Romanin̈y aby Io

9 Amy maha mpan̈ara-dia Kristy zaho, zaho mivolan̈a ny marin̈y; zaho tsy mavandy, aviô feon’ny fieritreretan̈anaka taritin’ny fan̈ahy masin̈y mitsangana vavolombelon̈o miaraka aminaka momba raha ty: 2 Malahelo mare zaho an̈atin’ny fônaka ao sady miasaloha fo. 3 Izikoa fan̈irian̈anaka fo, sitrany zaho tafisaraka amy Kristy ke ho voaozon̈o, izikoa zen̈y fomba han̈ampian̈a irô rahalahiko aby io, tsy azôvy zen̈y fa irô havako erakan’ny nôfotro aby io;* 4 irô io Israelita. Irô io natsangana ho zanaka, namezan̈a voninahitry, nan̈anaovan̈a fifan̈ikian̈a, baka iô namezan̈a Lalàna ndreky fanompoan̈a masin̈y aviô fampan̈antinan̈a. 5 Irô io taranakandrô dadilahibe aby io, aviô baka tamindrô io koa niboahan’i Kristy, izikoa erakan’ny nôfotro. Irarian̈a Zan̈ahary, araiky an̈abon’ny raha jiaby, hiderain̈a mandrakizay! Ameny.

6 Kanefa, zen̈y tsy mivolan̈a fa tsy tanteraka volan̈an’ny Zan̈ahary. Fôtony tsy kila taranakan’Israely jiaby zay ke ten̈a “Israely.” 7 Aviô tsy midika irô taranakan’i Abrahama ke zanaka aby irô jiaby. Kanefa ty raha voasoratra: “Baka amin’i Isàka havian’ny araiky kahian̈a taranakanao.” 8 Dikan’izen̈y, tsy irô zanaka erakan’ny nôfotro aby io ny ten̈a zanakan’ny Zan̈ahary, fa irô zanakan’ny fampan̈antinan̈a aby io izy konten̈a* ho taranaka io. 9 Ty baka raha volan̈in’ny fampan̈antinan̈a io: “Amy taon̈o ho avy karaha ziô zaho ho avy, ke Saraha hanan-janaka lelahy.” 10 Tsy tamy zen̈y fo raha zen̈y nandalo, fa tamy Rebeka niteraka amban̈a tamy lelahy araiky, tsy azôvy zio fa Isàka dadilahibentsika. 11 Irô tsaiky aby io baka mbala tsendriky teraka, aviô irô mbala tsendriky nan̈ano raha tsara na raha ratsy, Zan̈ahary efa nan̈ambara tsialohaloha azôvy hifidiny. Ke safidinany tsy miankiny amy raha ataon’olo araiky, fa zay tiany fo fidiny. 12 Ty raha nambara Rebeka: “Araiky zôky hanompo* araiky zandry”, 13 eraka raha voasoratra ty: “Jakoba tiako, fa Esao ndraiky halako.”

14 Ke ino basy raha hivolan̈intsika? Zan̈ahary ma man̈ano raha tsy rariny? San̈atria! 15 Karaha ty baka ho izy tamy Mosesy: “Zaho hamindra fô amy zay olo tiako hamindran̈a fô, aviô zaho hahinakinaka zay olo tiako han̈aboahan̈a hinakinaka.” 16 Ke raha zen̈y tsy miankiny amy raha irin’olo araiky na amin’ny ezaka ataony,* fa miankiny amy famindram-pôn’ny Zan̈ahary. 17 Fôtony ty raha nambaran’ny Soratra Masin̈y tamy* Faraon: “Ty ny ten̈a antony mahavy zaho mbala man̈ambela anao ho velon̈o: Han̈aboahan̈a angôvonaka aminao, ndreky han̈ambaran̈a an̈aran̈anaka eran-tany.” 18 Ke izy mamindra fô amy zay olo tiany hamindran̈a fô, fa ambelany hierin̈y olo ndraiky zay olo tiany hierin̈y olo.

19 Ke anao hivolan̈a aminaka: “Nan̈ino ma izy mbala man̈amia tsin̈y fo? Azôvy ma mahavita manohitry sitrapônany?” 20 Kanefa azôvy ma anao olombelon̈o io ke masaky mamalivaly Zan̈ahary? Raha nibolibolain̈a ma hivolan̈a amy mpan̈amboatra izy: “Nan̈ino zaho nataonao karaha ty?” 21 Karakôry tsara? Izio ma mpanefy tanimanga tsy manan̈a fahifan̈a amy tanimanga? Izy ma tsy afaka mampiasa bolongan’ny tanimanga araiky fo han̈amboarany bakôly fampiasain̈a amy raha misy hajany* ndreky bakôly fampiasain̈a amy raha tsisy hajany?* 22 Ke izikoa Zan̈ahary tihan̈ampatra helokonany ndreky han̈aboaka angôvonany, kanefa izy mandefitry ndreky mahari-draha amy bakôlin’ny heloko* ndray irô io vain̈y haripaka, izy ma tsy manan̈a zò han̈ano zen̈y? 23 Ke akôry fo basy izikoa izy nan̈ano raha zen̈y fôtony izy tihan̈aboaka voninahitrinany maventy amy bakôlin’ny famindram-pô;* irô io efa noman̈iny tsialohaloha hamezan̈a voninahitry zen̈y, 24 tsy azôvy zen̈y fa atsika olo nikahiany, tsy baka tamy Jiosy fo fa baka tamy firenena hafa koa? 25 Zen̈y raha nambarany amy bokin’i Hosea; ho izy ao: “Irô olo aby tsy olonaka aby io handeha hikahiako: ‘Olonaka’, aviô man̈angy tsy tiako in̈y handeha hikahiako: ‘Tiako.’ 26 Amy toeran̈a nivolan̈ako tamindrô karaha ty: ‘Anarô tsy olonaka’, iô edy hivolan̈ako amindrô: ‘Anarô zanakan’ny Zan̈ahary velon̈o.’”

27 Tsy zen̈y fo fa, Isaia nandronton̈o karaha ty momba Israely: “Ndray maro miran̈a jia an-dranomasin̈y hamaraozan’ny zanakan’Israely, vitsy* fo ho voavonjy. 28 Fôtony Jehovah hitsara tany ty, ke izy hankefa raha zen̈y amy fomba feno sady tsy hirekireky foeky.”* 29 Baka iô koa ty raha nambaran’Isaia tsialohaloha: “Izikoa Jehovah Tômpon’ny tafiky tsy nan̈ambela taranaka nintsika, ôtrizay atsika efa karaha Sodoma, aviô atsika efa miran̈a Gomora.”

30 Ke ino basy raha hivolan̈intsika? Ndray irô olo hafa firenena aby io tsy nifen̈y hanjary olo marin̈y, irô nanjary olo marin̈y fo; ia, irô nanjary olo marin̈y fôtony irô nan̈aboaka fa irô manan̈a finoan̈a. 31 Kanefa Israely ndraiky, ndray irô nitady han̈araka lalàn̈an’ny fahamarin̈ana, irô tsy nahavita nan̈araka lalàn̈a zen̈y. 32 Ino antony? Fôtony tamin’irô nitady han̈araka izio, irô nieritreritry fa baka amy raha ataondrô mahavy irô hanjary olo marin̈y, fa tsy baka amy finoan̈a. Irô navoatsikon̈o tamy “vato mampavoatsikon̈o”, 33 eraka raha voasoratra ty: “Hitanao, zaho han̈apetraka vato mampavoatsikon̈o ndreky lampimbato mandavo a Ziona ao, kanefa lan̈iany olo mino izio tsy ho diso fan̈antinan̈a.”