Taratasy Voanalohany Handeha Amindrô Korintianin̈y aby Io
16 Momba famorian̈a vola han̈ampian̈a irô olo masin̈y aby io, anarô tôkony han̈araka toromariky namezako irô fiangonan̈a aby a Galatia an̈y. 2 Isaka andra voanalohany amin’ny herin̈iandra, anarô tôkony hanaokan̈a vola arakaraka zay anan̈anarô, amy zen̈y lera zaho avy, efa tsisy famorian̈a vola eky hatao. 3 Zaho koa fa avy an̈y, zaho han̈iraka irô lelahy aby nikenarô amy taratasinarô in̈y hitondra fan̈amezan̈a an-tsitrapô nataonarô handeha a Jerosalema an̈y. 4 Fa izikoa zaho mba mila mandeha an̈y koa, irô hiaraka aminaka handeha an̈y.
5 Ho avy aminarô an̈y zaho izikoa fa baka mandalo a Makedonia, fôtony zaho io efa handalo a Makedonia. 6 Zaho mety hidôkodôko hely aminarô an̈y, na mety hidôko an̈y paripivitan’ny ririn̈iny foeky, amy zen̈y anarô hahavita han̈atitratitry zaho lera zaho mandeha amy tany handihanako. 7 Zaho baka tsy raha tihielan̈a fo hizaha anarô, fa zaho man̈anten̈a hidôkodôko miaraka aminarô, izikoa imboan’i Jehovah. 8 Kanefa zaho hidôko a Efesosy eto parapavian’ny Fetin’ny Pantekaoty, 9 fôtony misy varavaran̈a maventy nibiafin̈y man̈oloan̈a zaho misy hahavitako mampitombo fanompoan̈anaka; kanefa maro mpanohitry.
10 Izikoa Timoty avy aminarô an̈y, ataova raha hahavy izy tsy havozovozo lera izy miaraka aminarô, fôtony izy man̈ano asan’i Jehovah, karaha ataoko koa. 11 Ke aza ambela hisy olo tsy han̈isy fôtiny izy. Tatahia* izy, misy haviany aminaka atỳ soa aman-tsara, fôtony zaho ndreky irô rahalahy aby io efa miambin̈y izy.
12 Momba Apolosy rahalahintsika ndraiky, zaho niangavy izy mare handeha aminarô an̈y miaraka amindrô rahalahy aby io. Izy ziôty mbala tsendriky mieritreritry handeha an̈y, fa mbala han̈an̈y fo izy lera izy afaka.
13 Anarô miambesa fo, baka iô mioren̈a tsarabe amy finoan̈a, aviô mifen̈a fo ho hisy korazy ndreky hatanjaka.* 14 Raha jiaby ataonarô, ataova am-pitiavan̈a.
15 Hainarô fa fianakavian̈an’i Stefanasy voaloham-bokatra ta Akaia, aviô irô nahafoe ten̈a nikarakara irô olo masin̈y aby io. Ke zaho ziô mampirisiky anarô, rahalahy aby, 16 baka anarô tsy vôly han̈eky olo karaha zen̈y ndreky olo jiaby miaraka miasa sady miasa mare. 17 Ravoravo zaho fa aminaka eto Stefanasy ndreky Fortonato baka iô Akaïko, fôtony irô man̈ampy zaho mare. Anarô baka tsy iô. 18 Irô mankahery* zaho sady mankahery anarô. Ke ankasitraha olo karaha irô io.
19 Sambitsara zen̈y anarô, volan̈indrô fiangonan̈a aby an’Azia atỳ. Akoila ndreky Priska aviô fiangonan̈a mivory an-tran̈ondrô ao mandefa sambitsara maventy aminarô amy Tômpo ao. 20 Sambitsara zen̈y anarô, ho rahalahy jiaby. Mifan̈anaova ôroko masin̈y izikoa fa mifan̈ano mbalatsara.
21 Zaho Paoly, mandefa sambitsara nisoratin’ny tan̈ananaka ty aminarô.
22 Izikoa misy olo tsy mankatia Tômpo, anò izy ho voaozon̈o. A Tômponay e, mavia anao! 23 Irarian̈a Jesosy Tômpo han̈aboaka hatsaram-pan̈ahy miavaka aminarô. 24 Matokisa anarô fa anarô jiaby tafikamban̈a amy Kristy Jesosy io tiako aby!