Taratasy handeha amindrô Hebreo aby io

6 Ke, fôtony atsika efa tsy an̈atin’ilay vo mianatra fampianaran̈a fôtotro momba Kristy, alô atsika hifen̈y fo ho matotro, ke tsy himpodimpody hianatra fampianaran̈a fôtotro aby ty eky: Fampianaran̈a momba fibibahan̈a amin’ny asa maty ndreky finoan̈a Zan̈ahary, 2 fampianaran̈a momba batisa* ndreky petra-tan̈ana, fampianaran̈a momba familaoman̈a olo maty ndreky fitsaran̈a mandrakizay. 3 Ia, alô atsika hifen̈y fo ho matotro, sady hitavandra Zan̈ahary han̈ampy atsika.

4 Olo sasany efa nahazo hazavan̈a sady efa nahazo kadô tsy vangaim-bola baka an-dan̈itry ndreky efa nahazo fan̈ahy masin̈y. 5 Irô koa efa nan̈andran̈a volan̈a tsara baka amy Zan̈ahary ndreky efa nahita hatsaran̈a* ho hisy amy donia ho avy.* 6 Fa ndray zen̈y, irô mbala nivadiky fo sady nanohitry fampianaran̈a marin̈y. Ke irô efa tsy pôsibla hampian̈a hibebaka eky, fôtony irô mira nimpody namantsiky Zanakan’ny Zan̈ahary tamin’ny hazofijalian̈a sady nangala baraka izy tamason’olo. 7 Olombelon̈o bakà mety ampitovisin̈y amy tany. Mahazo hatsaran̈a baka amy Zan̈ahary tany araiky izikoa fa matetiky hilatsahan’ny mahalen̈y, ke man̈amia vokatra ilain’ny mpambôly. 8 Fa izikoa ndraiky fatsiky ndreky ahi-dratsy ny raha maniry amy tany io, tsisy raha ilàn̈a izio foeky. Tsy ela izio ozon̈iny, ke farany izio iroan̈a.

9 Fa ndray iô raha nivolan̈inay tiô aby in̈y, rahalahy ndreky ranabavy tianay aby, matoky zahay fa ho tsara raha handalo aminarô, ary matoky koa zahay fa anarô man̈ano raha hazahoan̈a famonjian̈a. 10 Fôtony bakà, Zan̈ahary tsy mety han̈ano raha tsy rariny ke han̈adin̈a raha jiaby efa vitanarô ndreky raha mbala ataonarô han̈ampian̈a irô olo masin̈y aby io, nohon’ny fitiavanarô an̈aran̈anany. 11 Ary tianay izikoa anarô mifen̈y hazoto karaha zen̈y fo, amy zen̈y anarô hatoky firaka amy farany fa ho tanteraka raha antin̈ainarô. 12 Ia, tianay izikoa anarô tsy kamo, fa hangala tahaka irô olo handova fampan̈antinan̈a aby io. Handova fampan̈antinan̈a aby zen̈y irô, fôtony irô mino sady mahari-draha.

13 Zan̈ahary koa fa nampan̈anten̈a Abrahama fa hitahy izy, izy nifanta tamin’ny ain̈inany tômpiny, fôtony efa tsisy olo eky an̈abon̈abonany ke nety nifantàny. 14 Ke ho izy: “Zaho hitahy anao, ke hataoko marobe taranakanao.” 15 Abrahama koa fa nahadin̈y niambin̈y, tiô izy vo nahazo fampan̈antinan̈a zen̈y. 16 Olombelon̈o bakà mifanta amin’olo bebendrô. Ke irô koa fa mifanta, vita edy malo, fôtony vava nataondrô io antoko ara-dalàn̈a fa irô mivolan̈a ny marin̈y. 17 Karaha zen̈y koa, Zan̈ahary koa fa nanapa-kevitry han̈aboaka mazava tsarabe amindrô olo mandova fampan̈antinan̈a io fa tsy miova fikasan̈anany,* izy nifanta misy han̈amezan̈a toky fa azo antoko raha zen̈y. 18 Ia, fampan̈antinan̈a ndreky fanta nataon’ny Zan̈ahary tamintsika in̈y mahavy atsika ho tapa-kevitry angôvo jiaby tsy hamôsotro fan̈antinan̈a natao tamintsika.* Sady atsika mitady fiaraovan̈a aminany, aviô irô raha aroe aby io tsy miovaova foeky, baka iô Zan̈ahary tsy mahay mavandy. 19 Fan̈antinan̈antsika io vatofantsikin’ny* fahin̈anantsika, ary izio azo antoko sady tsy voahozongozon̈o. Baka amy izio koa mahavy atsika ho tafitsaka ambadikin’ny ridô, 20 tsy aia zen̈y fa amy tany nandihanan’i Jesosy. Izy niditry an̈y alohantsika amy zen̈y izy han̈abian̈a lalan̈a himboàntsika. Izy nanjary mpisôron̈obe karaha Melkizedeka, ary izy mpisôron̈obe mandrakizay.